“Цацрагийн хамгаалалт, аюулгүй байдал болон дотоод хяналтын сайн туршлага солилцох, шинэ технологи сурталчлах нь” сэдэвт сургалт явагдаж байна

Ийм нэртэй сургалт Эрдэнэт үйлдвэрийн соёл урлагийн цогцолборт өнөөдөр явагдлаа. Хоёр өдөр явагдах уг сургалт нь  цацраг идэвхт ашигт малтмал болон цацрагийн үүсгүүрийн тусгай зөвшөөрөл эзэмшигч аж ахуйн нэгж байгууллагуудын хооронд тэргүүлэх сайн туршлагуудыг сурталчлах, дотоод хяналтыг бэхжүүлэх, тулгамдаж буй асуудлаар санал солилцох, цөмийн технологийн талаарх мэдлэгийг дээшлүүлэх зорилготой аж. Сургалтад Цацраг идэвхт ашигт малтмал болон цацрагийн үүсгүүрийн тусгай зөвшөөрөл эзэмшигч аж ахуйн нэгж байгууллагуудын төлөөлөл, аймаг, нийслэлийн Мэргэжлийн хяналтын газрын цөмийн болон цацрагийн хяналтын улсын байцаагчид оролцож байна. 

Монгол улсын хэмжээнд явагдаж буй анхны энэхүү сургалтыг Мэргэжлийн хяналтын Ерөнхий газар, Орхон аймгийн Мэргэжлийн хяналтын газар,”Эрдэнэт үйлдвэр” ТӨҮГ хамтран зохион байгуулж байгаа юм. Сургалтын ач холбогдлын талаар Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтсийн дарга Д.Мөнхболдоос тодруулахад, ”Мэргэжлийн хяналтын ерөнхий газартай хамтран энэ сургалтыг зохион байгуулж байна. Монгол улсын хэмжээнд хамгийн их цацрагийн үүсгүүртэй газар бол Эрдэнэт үйлдвэр. Манай үйлдвэрийн цацрагийн биет хамгаалалт, дотоод хяналт шалгалтын талаарх сайн туршлагыг нэвтрүүлэх зорилгоор улс,орон нутгийн мэргэжилтнүүдийн дунд энэ сургалтыг явуулж байна. Маргааш цацрагийн хамгаалалт ямар байгааг Эрдэнэт үйлдвэр дээр очиж бодит байдалтай нь танилцана. Тэгэхээр цацраг хүний нүдэнд харагдаж, гарт баригдахгүй эд учраас аюул эрсдэл ямагт дагуулж байдаг. Одоогийн байдлаар цацрагийн үүсгүүрийг цөөлөх бодлого барин ажиллаж байгаа. Гэвч дэлхий нийтэд цацрагийн үүсгүүр хэмждэг нарийн багаж гарсан юм алга. Иймээс үйлдвэрлэлийн технологийн үйл ажиллагаа, агуулга, менаралоги эрдсийг тодорхойлоход зайлшгүй цацрагийн үүсгүүрийг ашиглаж байна. Тухайн нөхцөлд нь байгаа цацрагийн үүсгүүрүүдийг аюулгүй ашиглах, дотоод хяналт шалгалтын тогтолцоог Эрдэнэт үйлдвэр сайн бүрдүүлсэн. Энэ үүднээс манай үйлдвэрийн туршлага сайн гэж үнэлэгдсэн явдал нь онцлог юм” гэв.