“Залуу ажилтныг дэмжих” хөтөлбөр ахисан шатанд хэрэгжинэ

     “Эрдэнэт үйлдвэр” ТӨҮГ-ын Захиргаа, хүний нөөцийн бодлогын газраас хоёр дахь жилдээ зохион байгуулж буй “Залуу ажилтныг дэмжих” хөтөлбөрийн нээлт өчигдөр боллоо. Уг хөтөлбөр нь залуу ажилтнуудын мэдлэг, ур чадварыг дээшлүүлэн, манлайллыг хөгжүүлж, зөв хандлагатай, хариуцлагатай, тогтвортой ажиллах хүсэл эрмэлзлийг бий болгох зорилготой юм. Хөтөлбөрийн нээлтэд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, бүтцийн нэгжийн удирдлагууд болон хөтөлбөрт оролцогч 100 залуу ажилтан оролцлоо. “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн хөтөлбөрт оролцогч залуучуудад амжилт хүсэж, үйлдвэрлэлийн өнөөгийн үйл ажиллагааны талаар мэдээлэл хүргэсэн. Мөн  Монгол Улсын Хөдөлмөрийн баатар Д.Жаргалсайхан уригдан ирж, Эрдэнэт үйлдвэртэй холбогдсон ажил амьдралын түүхээсээ хуваалцан, залуу ажилтнуудад сургамж, зөвлөгөөгөө хайрласан юм.

     Хүний нөөцийн хөгжлийн цогц хөтөлбөрийн нэг болох “Залуу ажилтныг дэмжих” хөтөлбөрт оролцогчдыг сонгон шалгаруулахдаа тухайн ажилтны хүсэл эрмэлзлийг сонсож, цехийн удирдлагатай зөвшилцөн, 360 градусын аргаар тодруулжээ. Энэ онд ахисан түвшинд хэрэгжих тус хөтөлбөрт 80 ажилтныг шинээр сонгосон бол өнгөрсөн оны хөтөлбөрт оролцогчдоос идэвх санаачилгатай, манлайлагч 20 ажилтанд хөгжлийн хөтөлбөрт дахин оролцох боломж олгосон байна. 

     Хөтөлбөрт оролцогчдын мэдлэг, ур чадвар, хандлагад үнэлгээ хийснээр сургалтын эрэлт хэрэгцээг тодорхойлж, системтэй мэдлэг олгохоор төлөвлөжээ. Ажилтан бүр хувийн төлөвлөгөө гаргаснаар зорилго, хэрэгцээндээ үндэслэн түвшин тогтоох үнэлгээ хийж, ахиц өөрчлөлтийг тодорхойлох боломжтой хэмээн үзэж байна. 

     “Эрдэнэт үйлдвэр” ТӨҮГ-ын Хүний нөөцийн бодлогод тулгуурлан мэдлэг ур чадвартай, үнэ цэнтэй, түлхүүр ажилтныг бий болгоход чиглэсэн энэхүү хөтөлбөр 2020 онд эхэлж, нэг жилийн хугацаанд хэрэгжсэн юм. Уг хөтөлбөрт хамрагдсан залуус хүний хөгжил, харилцаа хандлага, мэдлэг ур чадварын хувьд олон дэвшил гарсан тухайгаа ярьж, хөтөлбөрийн хүрээнд зохион байгуулсан үйл ажиллагаанд сэтгэл хангалуун байгаагаа илэрхийлсэн.