Орос хэлний багш нар арга зүйд суралцаж, туршлага солилцов

     2021-2022 оны хичээлийн жилд Орхон аймгийн Боловсрол, шинжлэх ухааны газраас дунд сургуулийн бүх хичээлээр мэргэжлийн арга зүйн сургалтууд зохион байгуулж байна. Энэ ажлын хүрээнд Орос хэлний багш нарын мэргэжлийн арга зүйн сургалтыг Орос 19-р сургууль дээр өнөөдөр зохион байгууллаа. Сургалтад оролцогч багш нар орос хэл дээр яриа сонсох, харилцан ярилцах, хүүхдүүдэд орос хэл заах арга зүйн туршлагаасаа солилцлоо. Сургалтад Ерөнхий боловсролын 12 сургуулийн 25 багш оролцож, монгол хүүхдүүд орос хэл сурахад ямар давуу тал онцлог, саад бэрхшээл байгаа талаар хэлэлцсэн юм. Түүнчлэн, сургалтад оролцсон залуу багш нар туршлагатай багш нарын ажлын арга зүйгээс суралцах, харилцан ярилцах, заах арга барил эзэмших, орос хэлний дүрмийг хэрхэн, яаж тайлбарлах, тухайн хэлний авиа зүйг хэрхэн зөв дуудах талаар хөндсөн нь сургалтын бас нэг онцлог ач холбогдол байв. Энэ үеэр Аймгийн Боловсрол, шинжлэх ухааны газрын ахлах мэргэжилтэн Ч.Сэржнагартай уулзахад: “Сүүлийн хоёр жилийн хугацаанд цар тахлын улмаас шалтгаалан аль ч хичээлийн судлагдахуунаар хүүхдүүд хоцрогдолд орсон. Энэ хоцрогдлыг арилгах, хүүхдүүдийн мартагдсан орос хэлийг хурдан сэргээх, өмнөх сурч мэдсэн зүйлийг бататган, шинэ хөтөлбөр эхлүүлэхэд сургалтын ач холбогдол оршиж байна. Багш нарыг чадавхжуулах зорилготой арга зүйн чиглэлээр үзэсгэлэн гаргалаа. Тухайн сургууль дээр нь ахмад багш нараа урьж, орос хэлний залуу багш нарын хичээлд сууж зөвлөн тусалж байна. Элсэлтийн шалгалтад бэлтгэж буй багш нараа хүлээн авч тусгай хөтөлбөрөөр үйл ажиллагаа зохион байгуулна. Орос хэлний хичээл 7-9-р ангид долоо хоногт хоёр цаг ордог. Энэ бол арай бага цаг. Хөрш орны хэлийг хүүхдүүд заавал сурах ёстой. Цаашид онол, практикийн бага хурал зохион байгуулах, илтгэл тавиулах, хичээл заах ур чадварын уралдаанууд явагдана. Жил бүр Найрамдлын сарын ажлын хүрээнд тусгай хөтөлбөр төлөвлөгөөтэй ажилладаг. Одоо Ялалтын баярыг тохиолдуулан орос хэл дээр цэрэг эх орны сэдэвтэй дуу, шүлгийн уралдаан зохионо. Мөн, Орос хэлний улсын уралдааны хоёрын даваа энэ баасан гарагт аймгийн тавдугаар сургууль дээр болно” гэв.