“Эрдэнэт цогцолбор” дээд сургуулийг онцлох дипломтой төгсөж, “Эрдэнэт үйлдвэр” ТӨҮГ-т ажиллах эрхийн батламж гардсан үе үеийн төгсөгчдийн уулзалт боллоо. Энэхүү уулзалтыг Захиргаа, хүний нөөцийн бодлогын газар хоёр дахь жилдээ зохион байгуулж, шилдэг төгсөгчдөд мэдлэг, туршлагаа хуваалцах, ахан дүүсийн барилдлага тогтоох боломж олгосноороо онцлог юм. Захиргаа, хүний нөөцийн бодлогын газар 2013 оноос Эрдэнэт үйлдвэрийн дэргэдэх “Эрдэнэт цогцолбор” дээд сургуультай хамтран ажиллаж, онцлох дипломтой төгсөгчдийг Эрдэнэт үйлдвэр ажлын байраар хангаж ирсэн уламжлалтай. Өнгөрсөн хугацаанд тус сургуулийг 49 оюутан 3.2-оос дээш үнэлгээний голч дүнтэй төгсөж, Эрдэнэт үйлдвэрт ажиллах эрхийн батламж гардсан бөгөөд тэд 100 хувь ажлын байраар хангагджээ. Тэдний найм нь богино хугацаанд мэргэжлээрээ чадваржин хөгжиж, инженер техникийн ажилтны зэрэгт шилжсэн байна.
Уулзалтын үеэр Захиргаа, хүний нөөцийн бодлогын газрын дарга О.Отгонбаяр, “Батламжтай оюутнуудыг ажлын байраар хангаад зогсохгүй, мэргэжлээрээ хөгжих, ажлын байрны түвшин ахих чиглэлд судалгаатай ажиллана. Тиймээс онцлох дипломтой шилдэг төгсөгч гэдгээ харуулахын төлөө хичээн ажиллаарай” хэмээн залууст уриалав. Мөн хамгийн сүүлд буюу энэ оны хоёрдугаар сард батламж гардсан таван төгсөгчийг мэргэжлийнх нь дагуу ажиллуулах шийдвэрийг танилцуулахад бүтцийн нэгжийн удирдлагууд баяр хүргэж, ажлын амжилт хүслээ. Харин “Эрдэнэт цогцолбор” дээд сургуулийн захирал Д.Зоригтхүү шилдэг төгсөгчдөдөө хандан, “Сургуулийнхаа нэр хүндийг өндөрт өргөж яваарай, илүү ачаалал дааж, илүү хариуцлагатай, ёс зүйтэй ажиллаарай, үйлдвэрийн соёлд хурдан суралцаж, тасралтгүй хөгжихийн төлөө тэмүүлээрэй” хэмээн захив. Шинэ ажилтнууд амьдралын баталгаа олгосон Эрдэнэт үйлдвэртээ талархсанаа илэрхийлэн, үеийн залуусаа манлайлан, эв нэгдэлтэй, эрч хүчтэй, илүү хичээн ажиллахаа амласнаар уулзалт өндөрлөв.
М.ОДГЭРЭЛ
Б.БАТТӨГС
Нар минутад мандаж минутад жаргана.
Үс засуулвал: 
Суудал: 
