“Эрдэнэт үйлдвэр” ТӨҮГ-ын Маркетингийн хэлтсийн Олон нийттэй харилцах алба Монголын Сэтгүүлчдийн Нэгдсэн Эвлэлийн Орхон аймаг дахь салбарын шалгаруулалтаар 2021 оны “Шилдэг хэвлэл мэдээллийн байгууллага”-аар тодорч, “Зэс үзэг” цом хүртлээ. Ирэх жил 35 жилийн ой нь тохиох Олон нийттэй харилцах алба “Өнөөгийн Эрдэнэт” сонин, www.erdenetmc.mn, www.erdenettoday.mn вэб сайт, “Эрдэнэт долгион” FM-107.1 радио, “Эрдэнэт” телевиз гэсэн сувгаар Эрдэнэт үйлдвэрийнхээ бодлого хэрэгжилт, үйлдвэрлэлийн үйл ажиллагаа, уурхайчин хамт олныхоо амжилт, ажил үйлсийг сурталчлах, цаг үеийн мэдээ, мэдээллийг уншигч, сонсогч, үзэгчдэд шуурхай хүргэдэг бөгөөд 2021 онд 800 гаруй мэдээллийг дотоодын мэдээллийн урсгалд нийлүүлэн ажиллажээ.
“Зэс үзэг-2021” шагнал гардуулах ёслолын үеэр тасралтгүй үйл ажиллагаатай Эрдэнэт үйлдвэрийн тасралтгүй үйл ажиллагаатай Олон нийттэй харилцах алба хэмээн онцолсон. Энэ албаны эх үүсэл болох “Өнөөгийн эрдэнэт” сонин 2021 онд цахим хувилбартай болж, тогтмол булангуудаа өргөжүүлж, уул уурхайгаар мэргэшсэн сэтгүүлчид нь мэдээ, хөрөг нийтлэл ярилцлага, сурвалжилга, асуудал хөндсөн өгүүлэл зэрэг сэтгүүл зүйн бүхий л төрлөөр бичиж өөрийн сонин болон төвийн хэвлэл мэдээллийн хэрэгслүүдээр уншигчдын хүртээл болголоо. Мэдээллийн www.erdenettoday.mn сайт, цахим хуудас нь үйл ажиллагаагаа өргөжүүлэн дагагчдынхаа тоог нэмэгдүүлж, мэдээллийнхээ төрлийг сошиал контентуудаар баяжуулан, сонирхолтой баримт, инфографикуудыг олон нийтэд цаг алдалгүй хүргэж ажилласан бол “Эрдэнэт долгион” ФМ-107,1 радио нь “Шинэ өглөө” хөтөлбөр, “Зөв санаа”, “Ажилчны үг”, “Эмэгтэйчүүдийн цаг”, “Сэгсрээд үсэр”, “Хоймор”, “Эрдмийн уурхай”, “Хуулийн цаг”, “Өсгөх 10” зэрэг сонирхолтой олон нэвтрүүлгийг сонсогчдын хүртээл болгожээ. Харин “Эрдэнэт” ТВ нь мэдээллийн хөтөлбөрөөс гадна “Уурхайчин бүсгүй”, “Дурсамж”, “Манайхан”, “Нээлттэй Эрдэнэт” тойм хөтөлбөр, “Нээлттэй Эрдэнэт” хэлэлцүүлэг, “Бидний шинэ үе”, “Нээлттэй Эрдэнэт 1 асуулт”, ”Түүдгийн дэргэд” зэрэг сүлжээний нэвтрүүлгүүдийг бэлтгэн үзэгчдэд хүргэлээ. Түүнчлэн хөрөг нэвтрүүлгүүд, баримтат кино, цаг үеийн холбогдолтой сурвалжилгууд, үйлдвэрийн цех, нэгжүүдийн танилцуулгыг бэлтгэн аймаг орон нутаг төдийгүй, төвийн хэвлэл мэдээллийн хэрэгслүүдээр түгээн ажилласан юм.
Орхон аймгийн “2021 оны Шилдэг сэтгүүлч”-ээр ЕТВ телевизийн сэтгүүлч Х.Пүрэвпилжээ, ”Шилдэг зураглаач”-аар NBHD телевизийн зураглаач Ш.Эрдэнэсайхан нар шалгарсан бол “Шилдэг бүтээл”-ээр “Тусгал” телевизийн “Ширээний ном” нэвтрүүлгийг нэрлэлээ.
М.ОДГЭРЭЛ
ФОТО: Б.БАТТӨГС