Уламжлал ёсоор даваа гаригийн шуурхай зөвлөгөөний эхэнд үйлдвэрийн хэмжээнд ковидын нөхцөл байдал ямар байгааг "Эрдэнэт" сувиллын цогцолбороос танилцуулав. Сүүлийн 72 цагийн хугацаанд 3 тохиолдол илэрч, тархалт багассан ч халдвар хамгааллын дэглэмийг ямагт сахих нь хүн бүрийн үүрэг гэдгийг эмч нарын зүгээс анхаарууллаа. Өнгөрсөн долоо хоногт үйлдвэрийн бүсэд хөдөлмөрийн аюулгүй байдлын ямар нэгэн зөрчил доголдолгүй, үйлдвэрлэлийн үйл ажиллагаа хэвийн өрнөжээ. Байгаль орчин, ногоон хөгжлийн хэлтсийнхэн, Орхон аймгийн ЗДТГ-тай хамтран хэрэгжүүлж буй “Цагаан тоосны сөрөг нөлөөллийг бууруулах” дэд хөтөлбөрийн тайланг хэлэлцэж дүгнэсэн байна. Өнөөдөр энэ хөтөлбөрийн үр дүнг аймгийн ИТХ-ын тэргүүлэгчдийн хуралдаанаар хэлэлцүүлж, цаашид авах арга хэмжээний төлөвлөгөөг батлах юм байна. Үйлдвэрлэлийн төлөвлөгөөт үзүүлэлт хөрс хуулалтын ажлаас бусад нь биелж байгаа бөгөөд үлдсэн хугацаанд цех нэгүүд хамтран хөрс хуулалтын төлөвлөгөөг нөхөж биелүүлэхээр ажиллаж байна. Үйлдвэрийн хэмжээнд өвлийн бэлтгэл 98 хувийн гүйцэтгэлтэй хангагджээ.
Жил бүрийн 12 сарын 25-ны өдрийг Монголын уурхайчдын баярын өдөр болгон тэмдэглэдэг. Энэхүү тэмдэглэлт өдрийг Эрдэнэт үйлдвэр шинэ бүтээн байгуулалтаа хүлээн авч, амжилт ололтоо дүгнэж цэгнэн өнгөрүүлэхээр бэлтгэж байна. Тухайлбал, Ус хангамжийн цехэд хийгдэж буй цэвэр ус дамжуулах 3-р шугамын нээлт болон ирэх онд хэрэгжих шинэ “Хамтын гэрээ”-г үзэглэх үйл ажиллагаанууд болох талаар Захиргаа, хүний нөөцийн бодлогын газраас мэдээллээ.
Хөрөнгө оруулалт, бүтээн байгуулалтын ажлууд үргэлжилж, Баяжуулах үйлдвэрт Нунтаглан баяжуулах хэсгийн хүдэр боловсруулах өргөтгөлийн бутлах шугам өнгөрсөн долоо хоногт ашиглалтад орсон байна. Ил уурхайд баригдаж буй Эмульсийн тэсрэх бодисын үйлдвэрийн барилга байгууламжийн ажил дуусаж, угсралт хийгдэж эхэлснийг цехийн удирдлага мэдээлэв. ДЦС өнөөдрийн байдлаар 5 зуух, 5 турбины горимоор ажиллаж байна. 1-р зуухны засвар дуусаж, хэвийн ажиллаж байгаа бөгөөд одоогоор 21 хоногийн нүүрсний нөөцтэй байгаа аж. Ус хангамжийн цехийн цэвэрлэх байгууламжийн 3-р шугамын бүтээн байгуулалт дуусаж, одоо усан туршилт, улсын комисс хүлээж авах зэрэг ажлууд үлдээд байгааг Ерөнхий механик мэдээлсэн. Мөн Цахилгаан цехийнхэн трансформаторын засварыг бүрэн дуусгаж, дулааны улиралд ажилд оруулахаар төлөвлөж байгаа юм байна. Шуурхайн төгсгөлд Үйлдвэрлэлийн бодлогын газрын дарга П.Батболор цаг үеийн нөхцөл байдалтай холбоотой асуудлаар мэдээлэл хийж, хэд хэдэн чиглэлд анхаарч ажиллах үүрэг өглөө.
М.Балжинням
Фото Б.Баттөгс
Нар минутад мандаж минутад жаргана.
Үс засуулвал: 
Суудал: 
