Эрдэнэт үйлдвэр цагаан тоос дарах ажлыг өдөр тутам хийж байна. Амралтын өдрүүд болон ажлын уртасгасан цагаар ч цагаан тоос дарах ажил явагдаж байгаа юм. Хаягдлын аж ахуй 2000 гаруй га талбайг эзэлдэг. Үүний 1300 га нь хуурай бөгөөд 900 орчим га талбай нь цагаан тоосны идэвхтэй дэгдэлтийн бүс юм. Баяжуулах үйлдвэрийн Хаягдлын аж ахуйгаас үүсэх тоосжилтыг бууруулахад зам талбайг услах, хөрсөөр хучих, салхины чиглэлийг өөрчлөх, цаг уурын хүнд нөхцөлд ургадаг мод суулгах, тусгай бодис ашиглан гадаргууг бэхжүүлэх зэрэг арга хэрэглэдэг. Гэсэн ч далангийн тогтворжилт, хаягдлын усыг дахин хэрэглэдэг үйлдвэрийн технологид сөргөөр нөлөөлдөг, өртөг өндөр зэргээс шалтгаалан Эрдэнэт үйлдвэр сүүлийн жилүүдэд цагаан тоос босдог талбайг флокулянттай булингаар хучих арга технологи ашиглаж үр дүнд хүрчээ. Ингэхдээ Герман улсын BASF фирмийн урвалж хүлээн авах танк, шахуурга, ус хангамжийн иж бүрдэл, холигч ашиглан цагаан тоосны дэгдэлтийг дарж байгаа юм. Байгаль орчин, ногоон хөгжлийн хэлтсийн албаны дарга Ж.Жавхланбат: “Ард иргэд, Эрдэнэт үйлдвэрээс цагаан тоосны дэгдэлтийг бууруулах талаар ямар ч ажил хийхгүй байгаа мэт ташаа ойлголттой явдаг. Баяжуулах үйлдвэрт цагаан тоос дарах алба байгуулагдсан. Энэ алба тусгай зориулалтын техник ашиглаж байна. Мөн белазаар услах, хөрсөөр хучих, үйлдвэрийн технологийн аргаар цагаан тоос дарах ажлыг гүйцэтгэж байгаа. Энэ жилийн хувьд өвлийн дунд сар хүртэл цас ороогүйгээс хуурайшилттай байна. Өмнө нь салхины хурд 10 метр секунд дэгдэхэд цагаан тоос босдоггүй байлаа. Тэгэхээр салхины хурд 10 метр секундээс дээш дэгдэхээр цагаан тоос босох жишээтэй. Ер нь цас орсон жилүүдэд арван сарын сүүлчээс хоёрдугаар сар хүртэл цагаан тоос дэгддэггүй. Энэ жил хуурайшилттай байгаа болохоор нам дор газраа салхины хурд мэдэгдэхгүй. Харин өндөр далантай, Хаягдлын аж ахуйн задгай талбайд салхины хурд ширүүн байгаа. Энэ нь цагаан тоос босох гол шалтгаан юм. Мөн хотын хогийн цэгийн болон айл өрхийн түлшний хэрэглээний, авто машины утаа униар агаарыг бохирдуулдаг. 1000 орчим га талбайд цагаан тоос дарах ажил хийгдэж байна. Хуучин өвлийн хаялтын ПК-46-50 хэсэгт туршилтын ажилд зориулсан гурван эгнээ зам тавьсан. Өөрөөр хэлбэл, дулааны улиралд тусгай зориулалтын техникүүд шигдэх хүндрэл гардаг. Үүнээс урьдчилан сэргийлж зам тавьсан байгаа. Энэ талбайд гурван өдөр туршилт хийсэн. Полимер урвалж ашигласнаар цас бороо, салхи дэгдэлтэд гадаргууд өөрчлөлт гарсан зүйлгүй, зохих үр дүн гарсан. Бид найман тонн полимер урвалжийг 8,6 га талбайд цацаж хэрэглээд байна” гэв.
Т.Батчулуун
Нар минутад мандаж минутад жаргана.
Үс засуулвал: 
Суудал: 
