Баяжуулагчид бүтээн байгуулалтын эхний хэсгийг ашиглалтад хүлээн авлаа

     Эрдэнэт үйлдвэрийн хөрөнгө оруулалт бүтээн байгуулалтын бодлогын хүрээнд Баяжуулах үйлдвэрийн Өөрөө нунтаглах хэсэгт хүдэр боловсруулах 4-р шугамын өргөтгөл хийгдэж байгаа билээ. Тэгвэл энэхүү бүтээн байгуулалтын эхний ээлжийн  хүдэр бутлах шугамыг ашиглалтад хүлээн авах үйл ажиллагааны нээлт өнөөдөр боллоо. Нээлтийн үеэр   “Эрдэнэт үйлдвэр”  ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнх “Нийт уурхайчид, хамт олондоо Эрдэнэт үйлдвэрийнхээ төрсөн өдөр, 43 жилийн ойн баярын мэндийг дэвшүүлье. Цар тахлын үед Эрдэнэт үйлдвэр үндсэн үйл ажиллагаагаа хэвийн үргэлжлүүлж, техник технологийн өргөтгөл шинэчлэлийн ажлаа зогсолтгүй явуулж байна. Үүний нэг нь өнөөдөр ашиглалтад оруулж байгаа “Өөрөө нунтаглах хэсгийн 4-р шугамын өргөтгөлийн эхний хэсэг болох бутлах шугам юм” гэж онцлоод, энэ ажлыг гүйцэтгэсэн Засвар угсралтын цех, цахилгаан тоног төхөөрөмжийн засварчид, удирдсан инженер техникийн ажилтнууд болон  гүйцэтгэгч компанийн төлөөлөлд талархал илэрхийллээ.   

     Хүдэр бутлах хэсэгт суурилагдсан үндсэн тоног төхөөрөмж нь ABB фирмийн цахилгаан хөдөлгүүр бүхий Мetso Outotec компанид үйлдвэрлэгдсэн Nordberg С-200 маркийн хацарт бутлуур, SEW Eurodrive үйлдвэрийн хөтлүүртэй NHI компанийн хавтант тэжээгүүр, туузан дамжуурга зэргээс бүрдэж байгаа юм. Энэ бутлалтын дамжлага нь цагт 1200-2700 тонн хүдрийг 175-300 мм болгон бутлах хүчин чадалтай аж.

     Эл бүтээн байгуулалтын цахилгаан автоматжуулалтын ажлыг ахалж ажилласан Эрчим зүйн албаны дарга Ц.Намжилдорж “Инженерүүдийнхээ мэдлэг чадвар дээр түшиглэн өөрсдийн нөөц бололцоогоо ашиглаад, цахилгаан автоматжуулалтын зураг, схем, төсөл, угсралт программчлал зэрэг цогц ажлыг өөрсдийн хүчээр зохион бүтээж, хийсэн. Энэ ажил нь ирэх жил өргөтгөлийн үндсэн байгууламжтайгаа хамт дуусах төлөвлөгөөтэй байсан ч хугацаанаас нь  өмнө ашиглалтад оруулснаар тоног төхөөрөмжийн бэлэн, аюулгүй байдлыг хангах, нөөц бий болгож, ашиглалтыг 30-40 хувиар нэмэгдүүлэх, үйлдвэрлэлийн төлөвлөгөөт үзүүлэлтийн биелэлтэд эерэг нөлөөлөх зэрэг олон боломж бүрдүүлж байна. Ингэснээр үйлдвэрлэлийн найдвартай, тасралтгүй үйл ажиллагааг хангах нэгэн давуу тал болох юм” гэж онцоллоо. 

М.Балжинням
Фото Б.Баттөгс