Улсын болон аймгийн Онцгой комиссоос бүх нийтийн хатуу хөл хориог сулруулж, ирэх сарын 2-ныг хүртэл өндөржүүлсэн бэлэн байдлын зэрэгт шилжүүлсэнтэй холбоотойгоор Эрдэнэт үйлдвэрт хэрэгжиж байсан хөдөлмөр зохицуулалтын горимыг цуцалсан байна. Энэ тухай тус үйлдвэрийн удирдах ажилтны даваа гаригийн ээлжит шуурхай дээр Захиргаа, хүний нөөцийн бодлогын газрын дарга О.Отгонбаяр мэдээллээ. Өнөөдрөөс Эрдэнэт үйлдвэр өндөржүүлсэн бэлэн байдлын зэрэгт шилжиж, хөдөлмөр зохицуулалтад хамрагдсан нийт ажилтнуудын 35 хувь нь ажилдаа орж, хэвийн горимд ажиллаж байна. Ковид-19 цар тахлын халдвараас урьдчилан сэргийлэх, уурхайчдаа ажлын байрны тархалтын эрсдлээс хамгаалах зорилгоор Эрдэнэт үйлдвэрийн Ерөнхий захирал тушаал гаргаж, 0-12 насны хүүхэдтэй эцэг эхчүүд, жирэмсэн ээжүүд, нийгмийн цехийн ажилтнууд болон цахимаар ажиллах боломжтой нийт 2158 ажилтанд цалинтай чөлөө олгосон юм. Тэгвэл өнөөдрийн байдлаар 5801 буюу 86.6 хувь нь ажлын байрандаа ирснээр үйлдвэр бүрэн бүрэлдэхүүнээрээ ажиллах хэвийн горимд шилжиж байна. Хэдийгээр хатуу хөл хорио суларсан ч ажлын байранд баримтлах халдвар хамгаалал, тодруулбал амны хаалтаа тогтмол зүүх, гараа ариутгах, хүн хоорондын зай баримтлах зэрэг дэглэмийг чанд мөрдөх, үүнд байнгын хяналт тавьж ажиллах журам хэвээр буйг энэ үеэр онцлов. Өнгөрсөн 3 дугаар сарын сүүлээр эхэлсэн дархлаажуулалтын эхний тунд нийт ажилтнууд 100 хувь хамрагдсан бол хоёр дахь тунд хамрагдсан байдал 93.5 хувьтай байгааг Эрдэнэт сувиллын цогцолбороос мэдээлэв. Үлдсэн хувь нь эхний тунгийн дараах хугацаа хүлээгдэж буйтай холбоотой юм.
Үйлдвэрийн хэмжээнд ХАБЭА болон үйлдвэрлэл хэвийн үргэлжилж, хавар зуны бэлтгэл ажил 48.5 хувийн биелэлттэй байгааг Үйлдвэрлэлийн хэлтсээс мэдээлэлдээ дурьдав. Хаягдлын аж ахуйд Цагаан тоос дарах болон бусад хөтөлбөр, Ус хангамжийн цехийн эргэлтийн усны 3 дугаар шугамын суурилуулалт, Баяжуулах үйлдвэрийн 1 дүгээр тээрмийн цахилгаан хөдөлгүүрийн угсралт, Ил уурхайн цахилгаан хангамжийн өргөтгөл зэрэг хөрөнгө оруулалт, бүтээн байгуулалтын ажлууд төлөвлөгөөний дагуу үргэлжилж байгааг холбогдох цех нэгжийн удирдлагууд онцоллоо. Ээлжит шуурхайн төгсгөлд Ерөнхий захирал Х.Бадамсүрэн цаг үеийн болоод хангамж нийлүүлэлттэй холбоотой тулгамдаж буй зарим асуудлыг цаг алдалгүй яаралтай шийдвэрлэх, цех нэгж бүр дотооддоо халдвар хамгааллын дэглэмийг баримтлан ажиллах чиглэл өгсөн. Мөн тэрээр оны эхний дөрвөн сарын ажлын үр дүн, цар тахлын үед үйлдвэрлэлийн төлөвлөгөөт бүх үзүүлэлтээ давуулан биелүүлсэн уурхайчин хамт олны хичээл зүтгэл, дархлаажуулалтад хамруулсан байдал, байгалийн баялагаа үндэсний баялаг болгож, улс орон, ард иргэдийнхээ сайн сайхны төлөө зориулж буй зэрэг олон эерэг үзүүлэлтийг үндэслэж, ирэх 6 дугаар сарын 1-ний өдрөөс нийт ажилтны цалинг 10 хувиар нэмэхээр шийдвэрлэснийг мэдээлсэн юм.
М.Балжинням
Фото: Б.Баттөгс
Нар минутад мандаж минутад жаргана.
Үс засуулвал: 
Суудал: 
