Аугаа их эх орны дайны ялалтын 76 жилийн ой энэ сарын 9-ний өдөр тохиож байна. Орос-Монгол хоёр орны найрамдалт харилцаанд үнэлж баршгүй ач холбогдол өгсөн энэхүү түүхэн өдрийг манай улс тэр тусмаа Эрдэнэт үйлдвэрийн хамт олон жил бүр өргөн утга агуулга, хүндэтгэл дор тэмдэглэдэг уламжлалтай. Харин сүүлийн жилд дэлхий нийтэд нүүрлээд буй ковид-19 цар тахал өвчний тархалт, эрсдэлийн нөхцөл байдлын улмаас эл түүхэн өдрийн үйл ажиллагааг цахим хэлбэрт шилжүүлэн тэмдэглэж байна. Энэ жилийн тухайд, Дэлхийн хоёрдугаар дайн болон Халх голын дайны ялалтад зориулсан Монгол маркийн үзэсгэлэн, хуучнаар ЗХУ-ын зураачдын дайны эсрэг ухуулах хуудасны үзэсгэлэнг цахимд байршуулан толилуулах юм байна. Мөн Эрдэнэт үйлдвэрийн Соёл урлагийн цогцолборын уран бүтээлчдийн түүхт ялалтын 75 жилийн ойд зориулсан баярын нэгдсэн тоглолт, Аугаа их эх орны дайны ялалтын үнэ цэнэ, түүхэн ач холбогдлын талаар дурсамж ярилцлага Эрдэнэт телевиз болон бусад хэвлэл мэдээллийн хэрэгслээр үзэгчдийн хүртээл болно. Түүнчлэн Эрдэнэт цогцолбор дээд сургуулийн дэргэдэх Орос хэлний төвөөс багш оюутны дунд орос хэл дээрх илтгэлийн уралдааныг зохион байгуулж байна.
Монгол-Оросын найрамдлын “Эрдэнэт” нийгэмлэгээс ялалтын баярын өдөр ”Үхэшгүй мөнхийн хороо” нэртэй дурсамж уулзалтыг зохион байгуулдаг. Энэ жил цахим хэлбэрээр дэлхийн хоёрдугаар дайнд оролцож, эрсдсэн болон эдүгээ амьд сэрүүн буй ахмад дайчдаа дурсаж, дурсгалыг нь хүндэтгэнэ гэж тус нийгэмлэгийн тэргүүн Б.Мажинбуу ярилаа. “Үхэшгүй мөнхий хороо” үйл ажиллагааг 1960-аад оны дунд үеэс Оросын ард түмэн санаачлан эхлүүлж байсан бол эдүгээ дэлхий нийтээр зохион байгуулдаг болжээ. Жил бүрийн ялалтын баярын үйл ажиллагааг ОХУ-ын Ерөнхий консулын газар, Орхон аймгийн ЗДТГ, “Эрдэнэт үйлдвэр” ТӨҮГ, Монгол-Оросын найрамдлын “Эрдэнэт” нийгэмлэг хамтран, хоёр орны найрамдалт харилцаа, хамтын ажиллагааны үүх түүхийг залуу хойч үеийнхэнд таниулж, үлдээх зорилготой тэмдэглэдэг аж.
М.Балжинням
Фото Б.Баттөгс
Нар минутад мандаж минутад жаргана.
Үс засуулвал: 
Суудал: 
