“Эрдэнэт үйлдвэр” ТӨҮГ-ын Судалгаа шинжилгээний хүрээлэнгээс судлаач инженер ажилд авах сонгон шалгаруулалтыг анх удаа цахим хэлбэрээр зохион байгуулав. “Судлаач инженерийн сонгон шалгаруулалтыг бид улсын хэмжээнд зарласан. Цахим шалгаруулалтад нийт 40 орчим инженерүүд оролцож байна. Энэ удаа нэг судлаач инженерийг шалгаруулж авах бөгөөд тус хүрээлэнгийн орчин үеийн дэвшилтэт техник технологи, өндөр хүчин чадалтай багаж төхөөрөмж болон хүдрийн шинж чанарыг тодорхойлох, нөөц тогтоох зэрэг программ хангамж дээр ажиллах чадвартай инженерийг шалгаруулна. Өөрөөр хэлбэл, ажлын туршлага, мэргэжлийн ур чадварыг голлон анхаарна” гэж тус хүрээлэнгийн захирал Ц.Цэнд-Аюуш онцлов.
Судалгаа шинжилгээний хүрээлэн нь Эрдэнэт үйлдвэрийн хүдэр баяжуулах техник технологийг боловсронгуй болгох, ордын нөөц нэмэгдүүлэх чиглэлээр судалгаа шинжилгээ хийх чиг үүрэгтэй. Тус хүрээлэнгийн 55 ажилтны 25 нь судлаач инженерүүд байдаг. Сүүлийн жилд хүрээлэнгийн инженерүүд Эрдэнэт үйлдвэрийн стратегийн томоохон төслийн техник технологийн шинэчлэлийн хүрээнд 28 төрлийн судалгаа шинжилгээний ажил гүйцэтгэжээ. Мөн нэмэлтээр 39 судалгааны ажил хийж буй аж. Цаашид, “Эрдэнэтийн-Овоо”-ны хүдрийн шинж чанар, технологийг нарийвчлан судалж, үйлдвэрийн өндөр хүчин чадлаар ажиллах хугацааг уртасгах, хүдрийн нөөц нэмэгдүүлэх чиглэлээр судалгаа шинжилгээний ажлаа өргөжүүлэх зорилготой ажиллаж байна.
М.Балжинням
Фото Б.Баттөгс
Нар минутад мандаж минутад жаргана.
Үс засуулвал: 
Суудал: 
