Ган бөөрөнцгийн цехийн хамт олон шинэ технологио өөрийн хөрсөнд буулгах шат дараатай ажлууд хийсээр байна. Тухайлбал, ган бөөрөнцөг цувих шугамын индукц дээр нэмэлтээр ролик тавьснаар бэлдцийн савалт багасаж, зуухны ашиглалтын хугацаа уртсах нөхцөл бүрджээ. Мөн 40-ын голчтой ган бөөрөнцөг цувих шугамын цахилгааны схемийг өөрчилснөөр эрсдэлээс зайлсхийж, бүтээмж дээшилсэн байна. Түүнээс гадна тус цехийн ажилчид Баяжуулах үйлдвэрийн Цахилгаан систем автоматжуулалтын албатай хамтарч олон оновчтой ажил хийсэн. Илчийн боловсруулалтын программчлалыг шинэчлэх, 40-ийн шугамын хөргөлтийн системийн бүдүүвч схемийг өөрчилж усны температурыг барих, усны зарцуулалтыг багасгах арга хэмжээ авсан нь хэмнэлтийн бодлогын хүрээнд хийгдсэн багц ажлын нэг юм. Мөн амраах зуухны суурилагдсан хүчин чадал нь 1000 орчим кВт цахилгаан хэрэглэдэг байсныг 600 кВт болгон зардал хэмнэх нөхцөл бүрдүүлжээ.
Нэгдүгээр шугамын зуухны хөргөлтийн системийн холболтыг шинэчилснээр усны зарцуулалтыг мэдэгдэхүйц хэмжээгээр багасгаж чадлаа. Түүнээс гадна эргэлдэх механизмууд дээр хайс хамгаалалт хийж, бүх тоног төхөөрөмж дээр аваарын зогсолтын товчлуур байрлуулж аюулгүй байдлыг хангажээ. Мөн тэд ажлын байранд дуу чимээ хэмжигч электрон төхөөрөмж суурилуулсан ажлаараа ХАБЭА-н хэлтсээс зарласан уралдаанд 2-р байр эзэлсэн. Тус цехийн ажилчид өнгөрсөн онд оновчтой 20-иод ажлыг үйлдвэрлэлд нэвтрүүлж, эдийн засгийн хэмнэлт гаргаад зогсохгүй ажлын байрны нөхцөлийг сайжруулан болзошгүй эрсдэлээс өөрсдийгөө хамгаалан ажилласан байна.
М.ОДГЭРЭЛ
ФОТО: Б.БАТТӨГС
Нар минутад мандаж минутад жаргана.
Үс засуулвал: 
Суудал: 
