“Эрдмийн баяр” цахимаар боллоо

     “Эрдэнэт үйлдвэр” ТӨҮГ-ын дэргэдэх, ШУТИС-ийн харьяа, Ш.Отгонбилэгийн нэрэмжит “Эрдэнэт цогцолбор” дээд сургуулийнхан 2020-2021 оны хичээлийн жилийн намрын улирлын төгсөлтөө хийлээ. Тус сургуулийн  22 дахь төгсөлтийн  “Эрдмийн баяр” цаг үеийн нөхцөл байдлаас шалтгаалан цахим хэлбэрээр болсон нь онцлог байв. Баярын үйл ажиллагааг “Эрдэнэт цогцолбор” дээд сургуулийн захирал, доктор Д.Зоригтхүү нээж үг хэлсэн бол дараа нь ШУТИС-ийн захирал, доктор, профессор Б.Очирбат, БАТС-ийн захирал, доктор, профессор Г.Баттүвшин нар нийт төгсөгч нарт баяр хүргэж, мэндчилгээ дэвшүүлсэн. Энэ хичээлийн жилд “Эрдэнэт цогцолбор” дээд сургуулийнхан 45 насны түүхэн ойтойгоо золгож, “Эрдэнэт үйлдвэр” ТӨҮГ-ын Ерөнхий захирлын А/542 тоот тушаалаар “Эрдэнэт дээд өргөмжлөл” медаль хүртсэн юм. Энэ бол тус хамт олны Монгол Улсын уул уурхай, аж үйлдвэрийн салбарт шилдэг инженер техникийн ажилтнууд бэлтгэж улс, эх орон, үйлдвэрийн газрын хөгжилд үнэтэй хувь нэмэр оруулсан гавьяаг нь үнэлсэн явдал байлаа. Мөн тус сургууль хичээл, сургалтын үйл ажиллагааг хөгжлийн шинэ шатанд гаргах зорилт дэвшүүлж, боловсролын байгууллагын менежментийн тогтолцоо ISO 21001:2018 стандарт нэвтрүүлэн ажиллажээ. Уг стандартыг хэрэгжүүлснээр ажил олгогчдын шаардлагыг хангасан, өрсөлдөх чадвартай мэргэжилтэн бэлтгэх боломжоо ахиулсан байна. Түүнчлэн “MIT”, “Harvard” зэрэг дэлхийн топ их дээд сургуулиудын онлайн сургалтад ашигладаг “Open edX” платформд шилжиж, багш оюутнууд хамтран сургалтын тоног төхөөрөмж зохион бүтээж, нэвтрүүлсэн зэрэг амжилт бүтээл дүүрэн жил байсныг “Эрдмийн баяр”-аар онцлов. 

     Ирээдүйн инженерийн мэргэжлээ “Эрдэнэт цогцолбор” дээд сургуульд суралцан эзэмшиж, сурлагын голч дүнгээ 3.2 үнэлгээнд хүргэн амжилттай төгсөж буй оюутан М.Азжаргал, Б.Ганцоож, С.Сундуйжанцан нар энэ удаа Эрдэнэт үйлдвэрт ажиллах эрхийн батламж гардсан. Батламжийг тус үйлдвэрийн Ерөнхий захирлын Хамтын ажиллагаа, нийгмийн асуудал хариуцсан орлогч Д.Дэлгэрбаяр гардуулж, баяр хүргэн амжилт хүсэв. Төгсөлтийн баярын үйл ажиллагаанд тус сургуулийн Эрдмийн зөвлөлийн гишүүд, эрдэмтэн багш нар, хамт олны төлөөлөл оролцож, дипломоо гардан авсан нийт төгсөгч нартаа мэндчилгээ дэвшүүллээ. 

М.Балжинням
Фото Б.Баттөгс