“Эрдэнэт үйлдвэр” ТӨҮГ-ын техник, технологийн шинэчлэлийн хүрээнд Ус хангамжийн цехийн Эргэлтийн ус хангамжийн хэсэгт Япон улсын EBARA фирмийн насос суурилуулж ашиглалтад хүлээн авлаа. Энэхүү насосыг Эрдэнэт үйлдвэрийн эргэлтийн усан хангамжийн системийн технологийн горимд тохируулан үйлдвэрлэжээ. Өндөр бүтээмжтэй, цахилгаан эрчим хүчний хэмнэлттэй EBARA фирмийн эхний насосыг өнгөрсөн тавдугаар сард суурилуулсан юм.
“Манай хэсэг үндсэн таван насосоор Баяжуулах үйлдвэр рүү эргэлтийн ус шахаж технологийн хэрэгцээг хангадаг. 1978 онд суурилагдсан, цагт 3000 м3 ус шахдаг, 2500 кВт цахилгаан эрчим хүч зарцуулдаг, ОХУ-ын ЦН300-197 маркийн насосуудыг цагт 4500 м3 ус шахах чадалтай, 1800 кВт цахилгаан эрчим хүч зарцуулдаг орчин үеийн насосоор солилоо. Өмнө суурилуулсан EBARA фирмийн насос нь тавдугаар сараас өнөөдрийг хүртэл 560 сая төгрөгийн цахилгаан эрчим хүч хэмнээд байна” гэж Эргэлтийн ус хангамжийн хэсгийн дарга Б.Амарсайхан ярилаа.
Насосын асаалт, туршилт тохируулгыг Японы мэргэжилтнүүд ирж, хамтран хийх байсан ч цар тахлын тархалтаас шалтгаалан мэргэжилтнүүд ирэх боломжгүй болсон юм. Тиймээс хэсгийн инженер техникийн ажилтнууд Японы мэргэжилтнүүдтэй онлайнаар холбогдон заавар зөвлөгөө авч, засварчид, цахилгаанчид угсралт тохируулгын ажлыг хийж гүйцэтгэжээ. Ирэх 2021 он гэхэд Ус хангамжийн цехийн Эргэлийн ус хангамжийн хэсгийн үндсэн таван насосыг EBARA фирмийнхээр бүрэн солих аж.
Шинэ насосууд суурилуулснаар технологийн процесст хэрэглэдэг эргэлтийн усан хангамж сайжирч, эргэлтийн усны станцын үндсэн тоног төхөөрөмжийн найдвартай ажиллагаа хангагдаж, ашиглалтын болон цахилгаан эрчим хүчний зардал буурна.
Я.Энхтуяа
Нар минутад мандаж минутад жаргана.
Үс засуулвал: 
Суудал: 
