Олон улсын ахмадын өдрийг тохиолдуулан Эрдэнэт үйлдвэрийн Аж ахуй, үйлчилгээний цехийн хамт олон, ахмадуудаа урьж, хүндэтгэлийн үйл ажиллагаа зохион байгуулав.
Хүндэтгэлийн үйл ажиллагааны эхэнд тус цехийн дарга Б.Туяа, зохицуулагч менежер П.Ганзориг нар Аж ахуй, үйлчилгээний цехийн түүхийн эх ундарга болсон ахмадууддаа баярын мэндчилгээ дэвшүүлж, тэдний хөдөлмөр зүтгэлийн үр шимээр өнөөгийн үеийнхэн амжилттай замнаж явааг бахархал дүүрэн илэрхийлсэн юм. Мөн цехийн үйл ажиллагаа, амжилт ололтоо ахмадууддаа танилцуулж, цаашдын зорилт, төлөвлөгөөний талаар товч мэдээлэв.
Эрдэнэт үйлдвэрийн өнгө үзэмж, гадна тохижилт, дотоод тав тухыг бүтээж, хариуцах эрхэм үүргээ нэр төртэй биелүүлсээр ирсэн Аж ахуй, үйлчилгээний цех нийт 170 гаруй ахмадтай. Тэдний 100 орчим нь баярын үйл ажиллагаанд хүрэлцэн ирж, дурсамж дурдатгалаа хөглөхийн зэрэгцээ залуу үеийнхэнд сургаал ерөөлөө айлдаж, баярын өдрөө бахдал баясал дүүрэн тэмдэглэлээ. Энэ үеэр тус цехийн хамгийн өндөр настан, Харуулын албаны даргаар ажиллаж байсан Я.Чүлтэмд хүндэтгэл үзүүлсэн бол зарим ахмадуудаа төр засаг, орон нутгийн болон Эрдэнэт хотын 50 жилийн ойн медалиар шагнасан.
Соёл, урлагийн цогцолборын уран бүтээлчид, цехийн авьяаслаг ажилтнууд уран бүтээлийн дээж, аялгуу эгшгийн цоморлогоосоо өргөн барьж, Эрдэнэт үйлдвэрийн бүтээн байгуулалт, ажил үйлсийн түүхэн замналд сэтгэл, зүтгэлээ зориулж явсан Аж ахуй, үйлчилгээний ахмадууддаа энх тунх байхын ерөөл дэвшүүллээ.
Нар минутад мандаж минутад жаргана.
Үс засуулвал: 
Суудал: 
