Эрдэнэт үйлдвэрт тав дахь жилдээ хэрэгжиж буй Хүний нөөцийн менежментийн тогтолцооны ISO 30400 багц стандарт, тав дахь удаагийн аудитын үйл ажиллагаагаа өнөөдөр нээлээ. 2021 оноос Эрдэнэт үйлдвэрийн хүний нөөцийн бодлого чиглэл, хөгжил дэвшилд шинэ хэм хэмжээ, эргэлт авчрах, орчин үетэй зэрэгцэн алхах зорилгоор Хүний нөөцийн менежментийн тогтолцооны ISO 30400 багц стандартыг хэрэгжүүлж эхэлсэн юм. Хүний нөөц захиргааны хэлтэс, тус стандартыг үйлдвэрийн үйл ажиллагааны хөрсөнд суулгах явцдаа баталгаажуулалтын болон магадлан аудитыг тус бүр хоёр удаа хийлгэн, хамрагдаж ирсэн бол энэ удаа гурав дахь удаагийн магадлан аудитын үйл ажиллагаанд хамрагдахаар нээлтийн хурал зохион байгууллаа.
Хүний нөөцийн багц стандарт хэрэгжиж эхэлснээс өнөөг хүртэлх хугацаанд уг стандартыг хамгийн үр дүнтэй, тогтвортой, үлгэр жишээ нутагшуулж, тасралтгүй сайжруулан авч явж буй байгууллагаар Эрдэнэт үйлдвэр шалгарсан байна. Үүний баталгаа нь олон улсад хүний нөөцийн менежментийн багц стандартыг хэрэгжүүлэгч шилдэг байгууллагын гурван одтой “Exemplary” гэрчилгээг Эрдэнэт үйлдвэр эзэмшиж буй явдал гэж хурлын нээлтийн эхэнд Хүний нөөц, захиргааны хэлтсийн Хүний нөөцийн албаны дарга Б.Одгарьд тэмдэглэсэн.
“Эрдэнэт үйлдвэр” ТӨҮГ-т хэрэгжүүлж буй Хүний нөөцийн менежментийн тогтолцооны ISO 30400 багц стандартын 2026 оны магадлан аудитын үйл ажиллагааг Франц улсын “Афнор” группийн Тэргүүлэх аудитор А.Оленков ахалж, тус группийн Монгол Улс дахь итгэмжлэгдсэн төлөөлөгч “Монсертф” компанийн Баталгаажуулалтын газрын дарга, аудитор Б.Энхтөгс, аудитор Ю.Болортуяа, аудитор, ажиглагч Д.Алтантуяа нарын бүрэлдэхүүнтэй баг гүйцэтгэж зохион байгуулах юм. Магадлан аудитын нээлтийн ажиллагаанд олон улсын тэргүүлэх аудитор А.Оленков, стандартын баталгаажуулалтыг магадлах аудитын зорилгыг танилцуулж, стандартын хамрах хүрээ, тэдгээрт бүрэн хүрч хэрэгжиж буй эсэхийг энэ удаагийн аудитаар тогтооно гэдгийг онцлов. Эрдэнэт үйлдвэрт Хүний нөөцийн менежментийн тогтолцооны багц стандарт хэрэгжээд нэгэнт төлөвшсөн байна. Ийм төлөвшилтэй байгууллагад аудит хийх нь аудиторуудын хувьд сорилт байдаг гэдгийг багийн ахлагч, тэргүүлэх аудитор А.Оленков онцлоод, үл тохирол гэхээс илүүтэйгээр хамтдаа харилцан суралцаж, тасралтгүй сайжруулалт болон шинэчлэлийн боломжуудыг нээхэд, төвлөрч ажиллах болно гэсэн юм. Өөрөөр хэлбэл, тэрээр энэ удаагийн магадлан аудит, стандарт хэрэгжилтийн ахисан түвшний шатанд хийгдэнэ гэж тодорхойлов.
Магадлан аудитын нээлтийн хуралд “Эрдэнэт үйлдвэр” ТӨҮГ-ын Хүний нөөц, захиргааны хэлтсийн дарга, Менежментийн ухааны доктор (Ph.D), Тэргүүлэх аудитор О.Отгонбаяр, “Хүний нөөцийн менежментийн тогтолцооны багц стандартын хэрэгжилт, үр дүн, цаашдын зорилт”-ыг танилцууллаа. Хүний нөөцийн үйл ажиллагааны үндсэн болон дэмжих үйл явцад нийгмийн бүх чиглэлийг хамарч буй тус стандартын хүрээнд Эрдэнэт үйлдвэр, хүний нөөцийн менежментийн тогтолцооны бодлогын бүхий л баримт бичгийг шинэчлэн боловсруулж, жил бүр тасралтгүй сайжруулан баталгаажуулж ирлээ. Сүүлийн жилүүдэд стандартын нийцлийг хангах ажлыг Дотоод хяналт, мониторингийн хэлтэстэй хамтран хийж байна. НҮБ-аас баталсан “Тогтвортой хөгжлийн төлөө” 17 зорилт, Монгол Улс болон Эрдэнэт үйлдвэрийн хөгжлийн үндсэн чиглэл, хэтийн төлөвт тусгагдсан зорилтыг биелүүлэхэд Эрдэнэт үйлдвэрийн менежментийн тогтолцоонд ахиц, сайжруулалтыг авчирсан сайн туршлага болж байгаа зэргээр Хүний нөөцийн ISO 30400 багц стандартын үр өгөөж, ач холбогдлыг мэдээлэлдээ дэлгэрэнгүй дурдлаа. Түүнчлэн, багц стандарт хэрэгжүүлэхэд хамтран ажиллаж буй Чанар хяналтын хэлтэс, Дотоод хяналт, мониторингийн хэлтэс болон хүний нөөцийн мэргэжилтэн, аудитор, ажлын хэсгийнхэнд талархал илэрхийлж, амжилт хүсэв.
Эрдэнэт үйлдвэрт хэрэгжиж буй Хүний нөөцийн менежментийн тогтолцооны багц стандартад хийх магадлан аудитын үйл ажиллагаа гурван өдөр үргэлжилнэ. Аудит хийх эрх бүхий Франц улсын “Афнор” групп, түүний Монгол дахь итгэмжлэгдсэн төлөөлөгч “Монсертф” компани нь хүний нөөцийн багц стандартад аудитын үйл ажиллагаа гүйцэтгэх нээлттэй сонгон шалгаруулалтаар шалгарсан байгууллага юм.
Нар минутад мандаж минутад жаргана.
Үс засуулвал: 
Суудал: 
