УДИРДАХ АЖИЛТНЫ ШУУРХАЙ ЗӨВЛӨГӨӨНИЙ ТОЙМ

Эрдэнэт үйлдвэрийн удирдах ажилтнуудын ээлжит шуурхай зөвлөгөөн өнөөдөр боллоо. Өнгөрсөн долоо хоногт ХАБЭА-н зөрчилгүй, байгаль орчны асуудалгүй хэвийн ажиллажээ.

Баяжуулах үйлдвэрийн Хаягдлын аж ахуйн далангийн хүчитгэлийн зураг төслийг яаралтай гаргаж, уулын цул бэлдэх, уг ажлыг нэн даруй эхлүүлэхийг үүрэг болголоо. Одоогоор хүчитгэх далангийн талбайд геологийн өрөмдлөг, туршилтын судалгаа үргэлжилж байна.

Шинээр ажилд орж буй иргэдийн эрүүл мэндийн байдлыг тогтоох, үзлэгийн нэр төрлийг нэмэгдүүлэх, үүнтэй холбоотой журмуудыг шинэчлэн боловсруулах, эрсдэлтэй ажлын байруудад ажиллаж буй ажилтнуудын жил бүрийн урьдчилан сэргийлэх үзлэгийн үр дүнд шинжилгээ хийх үүрэг даалгавар өмнө нь өгөгдсөн. Эрүүл мэндийн сайдын тушаалын дагуу журмыг шинэчлэн боловсруулахаар шийдвэрлэсэн байна. Мөн урьдчилан сэргийлэх үзлэгийн явцын хяналтыг ирэх 7 хоногт хийх бол үзлэг дууссаны дараа эрсдэлтэй ажлын байранд ажиллаж байгаа ажилтнуудын үзлэгийн үр дүнд дүн шинжилгээ хийж танилцуулахаар болов.

Халаалт өгч байгаатай холбогдуулан бүтцийн нэгжүүд шугам хоолойд үзлэг шалгалт хийж, бэлэн байдлыг бүрэн хангах, намар өвлийн бэлтгэл ажлын гүйцэтгэлийг эрчимжүүлэх, төлөвлөгөөт ажлуудыг хугацаанд дуусгах үүрэг өгсөн юм.

Есдүгээр сар гарсаар уулын цул гаргалт +174,000 м³, хөрс хуулалт +241,000 м³ байна. Тайлант хугацаанд 22,56 хувийн агуулгатай 9708 тонн цэвэр зэс агуулсан, 43,040 тонн зэсийн баяжмал үйлдвэрлэн гаргажээ. Харин молибдены баяжмал нийт 125 контейнерыг үйлдвэрлэжээ.

Өнгөрсөн долоо хоногт Ил уурхайд мөчлөгт урсгалт тээврийн системийн 72 цагийн туршилт амжилттай хийгдсэн бөгөөд энэ хугацаанд 58,000 тонн уулын цул тээвэрлэжээ. Энэ үеэр бункерийн хуяг элэгдэж цоорсон асуудал гарсан байна. Энэ нь манай уул геологийн нөхцөл ямар хэмжээнд өөрчлөгдсөн, хүдэр ямар их хатуу болсныг харуулсан. Иймээс Засвар, механикийн завод бункерийг шинэчлэн хийх ажлыг богино хугацаанд гүйцэтгэх үүрэг авч, ажиллаж байна.

Эрдэс баялгийн мэргэжлийн зөвлөл “Эрдэнэтийн-Овоо зэс, молибдены ордыг ашиглах техник, эдийн засгийн үндэслэлийн тодотгол-I” баримт бичгийг баталсан. Тус зөвлөлийн өргөтгөсөн хуралдааны дүгнэлт бүхий ТЭЗҮ-ийн ботиуд ирсэн бөгөөд маргааш ажлын хэсгийн гишүүд болон цех, нэгжүүдийн дарга, инженерүүд гарын үсэг зурж баталгаажуулснаар, Эрдэнэт үйлдвэрийн дараагийн 60 жилийн техник, технологийн шийдэл, үйлдвэрлэлийн өргөтгөл шинэчлэлийн ажлууд тодорхой болж, бэлэн байдал хангагдана.

Хамтын ажиллагаа, нийгмийн харилцааны бодлогын газрын дарга Ц.Бат-Энх “Эрдэнэт” сувиллын цогцолборт оношилгооны тоног төхөөрөмж дутагдалтай, сүүлийн үед эрүүл мэндийн урьдчилан сэргийлэх үзлэгтэй холбоотой гомдол ажилтнуудаас байнга ирэх болсонд анхаарал хандуулахыг хүслээ. Мөн нийгмийн чиглэлийн бүтээн байгуулалтууд, тэр дундаа “Уурхайчин-3” хорооллын барилгын ажил таван жил дамнан үргэлжилж байгаад хяналт тавьдаг холбогдох хэлтсүүд арга хэмжээ авч ажиллах шаардлагатайг сануулав.

Монгол Улсын Ерөнхийлөгчөөр ахлуулсан хүндэт зочид 10 дугаар сарын 03-ны өдөр Орхон аймагт ажиллаж, Эрдэнэт үйлдвэрийн уурхайчидтай уулзалт хийнэ. Бэлтгэл ажлыг бүх түвшинд хангаж ажиллахыг үүрэг болгосноор шуурхай зөвлөгөөн өндөрлөв.