Засвар, механикийн заводын Механик цехийн Сэлбэг хэрэгсэл бэлтгэх хэсэг Мэдлэг түгээх хоёр ажлын байр тохижуулжээ. Эхний мэдлэг түгээх ажлын байрыг токарьчдад зориулан байгуулсан байна. Энд токарьчдын өдөр тутмын ажилд шаардлагатай хэмжих хэрэгсэл, багажийг бодитоор байрлуулснаас гадна суурь машины ашиглалт, ерөнхий бүтэц зохион байгуулалт, мэргэжлийн болон мэдлэгт нэмэр болох мэдээллийг нэг дор төвлөрүүлжээ.
Мэдлэг түгээх орчныг тохижуулахдаа ажилтнуудын санал, хэрэгцээнд тулгуурласан байна. Тухайлбал, өдөр тутам ашигладаг багаж хэрэгсэл, ажлын явцад түгээмэл гардаг алдаа, шаардлагатай мэдээлэл болон тэдгээрийг ямар хэлбэрээр, ямар хэрэгслээр авах хүсэлтэй байгааг судалж, үр дүнг нь орчны тохижилтод тусгасан байна. Мөн 1970-аад оны токарийн суурь машиныг сэргээн засварлаж, үзмэр болгон байрлуулсан нь үйлдвэрлэлийн түүх, техник технологийн хөгжлийг ажилтнуудад таниулах нэгэн сонирхолтой шийдэл болжээ.
Тус цехэд өргөтгөл, шинэчлэлийн ажил үргэлжилж байгаа бөгөөд байр талбайн багтаамж сайтай болохоороо үе үеийн суурь машинуудыг байрлуулсан үйлдвэрлэлийн музей байгуулах хүсэлтэй явдгаа Сэлбэг хэрэгсэл бэлтгэх хэсгийн дарга М.Ханбүргэд ярьсан юм.
Тус хэсгийнхэн Ажлын даалгаврын өрөөгөө мөн “Мэдлэг түгээх ажлын байр” болгон засварлан тохижуулсан байна. Энд “Эрдэнэт үйлдвэр” ТӨҮГ-аас ажилтнууддаа олгодог тусламж, дэмжлэг, хөнгөлөлтийн журам, Захиргаа болон Үйлдвэрчний эвлэлийн хооронд байгуулсан Хамтын гэрээ, чөлөө олголт, ХАБЭА-н дүрэм, журам зэрэг ажилтнуудад шаардлагатай мэдээллийг байршуулжээ. Түүнчлэн, ажилтнуудын эрүүл мэндэд анхаарч, даралт хэмжих аппарат бүхий ширээ, сандлыг эрүүл мэндийн буланд байрлуулсан бол ажлын орчны тав тухыг нэмэгдүүлэх, ажилчдын нүдний ядаргаа тайлах, сэтгэлзүйн тайвшрал мэдрүүлэх зорилгоор загасны том аквариум байршуулсан байна.
Токарьчид хагас тонгойсон байрлалтай ажилладаг учраас эргономик хүчин зүйлээс үүдэлтэй нуруу, хөлийн булчин, судасны өвчлөлд өртөх магадлал өндөр байдаг тул суурь машин бүрийн дэргэд эвхэгддэг сандал байрлуулж өгсөн нь шаардлагатай үед зөв байрлалаа хадгалж, ачааллаа бууруулах боломжийг бүрдүүлсэн практик шийдэл болжээ.
Нар минутад мандаж минутад жаргана.
Үс засуулвал: 
Суудал: 
