Эрдэнэт үйлдвэрийн үр ашиг, бүтээмжийг нэмэгдүүлэх, тулгамдсан асуудлыг судалгаа, шинжилгээнд суурилан шийдвэрлэх, үйлдвэрлэлд нэвтрүүлэх боломжтой шинэлэг санаачилгыг тодруулах зорилготой “Бүтээмжийн шийдлүүд” эрдэм шинжилгээний илтгэлийн уралдааны сүүлийн шалгаруулалт өнөөдөр болж, шилдгүүд тодорлоо.
Тус уралдааны тэргүүн байрт Холбоо, мэдээллийн технологи, автоматжуулалтын цехийн Рентген шуурхай шинжилгээний лабораторийн хэсгийн дарга Д.Отгонбаатар, инженер Ж.Галбадрах, мастер Ж.Сайнбилиг нарын хамтарсан “Тоног төхөөрөмжийн гэмтэл, засварын бүртгэлд суурилан сул зогсолтыг бууруулах, урьдчилан сэргийлэх засвар үйлчилгээний өгөгдлийн загвар, статистик боловсруулах үзлэг” илтгэл шалгарч, эзэд нь гурван сая төгрөгийн шагнал хүртэхээр болов.
Харин дэд байрт Цахилгаан цехийн инженер Ц.Гансүхийн “Хяналт удирдлагын SCADA системийн вэб хяналтыг нээлттэй эхийн технологид тулгуурлан шинэчилж, ашиглалтын зардлыг бууруулах нь”, гутгаар байрт Хүний нөөц, захиргааны хэлтсийн дарга О.Отгонбаяр, Тэргүүлэх хүний нөөцийн мэргэжилтэн Б.Болор-Эрдэнэ нарын “Хүний нөөцийн ISO30400 стандартын хэрэгжилт ба ажилтны сэтгэл ханамжаар дамжуулан үйлдвэрлэлийн бүтээмжийг дээшлүүлэх шийдэл” илтгэл тус тус шалгарлаа. Тусгай байрыг Эрдэнэ цогцолбор их сургуулийн ахлах багш С.Цээлээгийн “Эргэлтийн усны химийн найрлагын өөрчлөлт молибдены металл авалтад нөлөөлөх зүй тогтол”, Баяжуулах үйлдвэрийн Бутлан тээвэрлэх хэсгийн удирдлагын багийн “МР-800 бутлуурын хуягийн ашиглалтыг сайжруулах судалгаа” илтгэл эзэлсэн юм.
“Энэ удаагийн уралдаанд 10 бүтцийн нэгжийн 27 ажилтан оролцож, нийт 21 илтгэл ирүүлсэн нь хамт олны мэдлэг, ур чадвар, судалгааны соёл, бүтээлч сэтгэлгээ улам бүр төлөвшиж байгааг харуулсан чухал үзүүлэлт боллоо” гэж Эдийн засгийн хэлтсийн Процессын сайжруулалт, бүтээмжийн товчооныхон үзэж байна. Хоёрдугаар шатанд 10 илтгэл шалгарсан бөгөөд Үнэлгээний комисс эдийн засгийн үр өгөөж, үйлдвэрлэлд хэрэгжүүлэх боломж, бүтээмжид үзүүлэх нөлөөлөл, шинэлэг санаа зэргийг харгалзан үзэж шилдгийг тодруулсан байна.
Нар минутад мандаж минутад жаргана.
Үс засуулвал: 
Суудал: 
