Наадмын маргааш намар гэдэг. Тасралтгүй ажиллагаатай Эрдэнэт үйлдвэрийн хувьд хавар, зуны ажлаа үргэлжлүүлээд, намар, өвөлдөө бэлдэж эхэлдэг. Ирэх өвлийн бэлтгэл ажил болон үйлдвэрлэлийн цаг үеийн асуудлаар “Эрдэнэт үйлдвэр” ТӨҮГ-ын Үйлдвэрлэл, техникийн хэлтсийн дарга Т.Түмэн-Өлзий дараах мэдээллийг өглөө.
-Эрдэнэт үйлдвэр оны эхний хагас жилийн үйл ажиллагаагаа дүгнэхдээ үйлдвэрлэлийн төлөвлөгөөт үзүүлэлт сайн биелж байгааг онцолж байгаа. Үйлдвэрлэлийн төлөвлөгөөний үзүүлэлт ямар дүнтэй гарсан бэ?
-Манай уурхайчид 2026 оны эхний хагас жилд үйлдвэрлэлийн төлөвлөгөөгөө өндөр үзүүлэлттэй биелүүлж ажилласныг юуны өмнө хэлье. Хагас жилийн тайлангийн хурлаар үйлдвэрлэлийн цех, нэгжүүд хангалттай сайн үнэлүүлсэн. Мөн 7-р сарын үйлдвэрлэлийн төлөвлөгөөг дүгнэж, сар хаалтын дүнгээр үйлдвэрлэлийн үндсэн үзүүлэлтүүд давж биелж байгааг онцлохыг хүсэж байна. Өнгөрсөн 7-р сард бид уулын цул гаргалтыг 290 мянган метр кубээр давуулж, төлөвлөгөөг 110.1 хувиар, хөрс хуулалтын ажил 225.6 мянган метр кубээр илүү гүйцэтгэж, төлөвлөгөөг 117.3 хувиар тус тус биелүүллээ. Тэгвэл нийт хүдэр олборлолтын хэмжээ төлөвлөгөөнөөс 167 мянган тонноор давж, төлөвлөгөө 104.1 хувь, исэлдсэн хүдэр олборлолт 770 мянган тонн буюу 125.4 хувиар биелсэн үзүүлэлттэй гарлаа. Түүнчлэн, өрөмдлөгийн хэмжээг 830 тууш метр, ачаа эргэлтийг 2 сая 43 мянган тонн километр илүү гүйцэтгэж, 106.7 хувиар биелсэн. Өнгөрсөн 7-р сард Баяжуулах үйлдвэрт нийт 3 сая 481 мянган тонн хүдэр боловсруулж, хүдэр дэх зэсийн агуулга 0.372, молибдены агуулга 0.0145 хувийн гүйцэтгэлтэй байна. Зэсийн металл авалт 87.54 хувь, молибдены металл авалт 41 хувьтай байлаа. Энэ хугацаанд хуурай жингээр 50336 тонн зэсийн баяжмал, 424.4 тонн молибдены баяжмал тус тус үйлдвэрлэлээ. Нийт 874 вагон зэсийн баяжмал экспортод ачуулснаар төлөвлөгөөг 62 вагоноор давуулсан. Өөрөө хэлбэл, өнгөрсөн 7-р сард төлөвлөгөөнөөс илүү 4328 тонн зэсийн баяжмалыг экспортод гаргаад байна. Бид борлуулалтын орлогыг нэмэгдүүлэх бодлогын хүрээнд оны эхнээс болон өнгөрсөн 7-р сарын дүнгээр баяжмал ачилтын төлөвлөгөөг тогтмол давуулан биелүүллээ. Ингэснээр оны эхний хагас жилд үйлдвэрлэлийн бүх төлөвлөгөөт үзүүлэлт 100-109.2 хувиар биелсэн. Одоогийн байдлаар, үйлдвэрлэлийн төлөвлөгөөний үзүүлэлтэд нөлөөлөхүйц хүндрэл бэрхшээл гараагүй гэж ойлгож болно.
-Үйлдвэрлэлийн хэвийн, тасралтгүй ажиллагаанд урьдчилсан нарийн төлөвлөгөө хуваарь, бэлтгэл зохион байгуулалт гол нөлөө үзүүлдэг. Хавар, зуны ажлын төлөвлөгөөний хүрээнд үйлдвэрийн “Их зогсолт” чанартай сайн хийгдсэн. Харин энэ жилийн намар, өвлийн бэлтгэл хангах хүрээнд ямар ажлууд төлөвлөсөн бэ? Технологийн бараа материалын нөөц бүрдүүлэлт ямар түвшинд байгаа вэ?
-Эрдэнэт үйлдвэр жилд нэг удаа 48 цагийн хугацаатай технологийн бүрэн зогсолт хийдэг. Эхний хагас жилд багтаан “Их зогсолт” буюу энэ ажлыг амжилттай зохион байгуулж, чанартай гүйцэтгэсэн. Ер нь үйлдвэрлэлийн горим, онцлогоос хамаараад улирлын шинж чанартай ажлыг урьдчилан төлөвлөж, тасралтгүй үргэлжлүүлдэг. Энэ дагуу бид энэ жилийн хавар, зуны ажлаа 99.3 хувийн гүйцэтгэлтэйгээр дуусгаж, одоо намар, өвлийн бэлтгэлээ хангаж эхлээд байна. Үйлдвэрийн газрын Ерөнхий захирлын тушаалаар өвөлжилтийн ажлын төлөвлөгөөг батлан, 27 бүтцийн нэгж нийт 295 ажил хийж хэрэгжүүлэхээр ажилдаа орсон. Өнөөдрийн байдлаар, төлөвлөгөөний гүйцэтгэл 23 хувьтай үргэлжилж байна. Өвөлжилтийн бэлтгэлийн хүрээнд гол анхаарах асуудал гэвэл техник, тоног төхөөрөмжийн бэлэн байдлыг хангахын зэрэгцээ технологийн бараа материал болон түлш, эрчим хүч, шатахууны нөөцийг бүрдүүлэх ажлууд байна. Улс орны хэмжээнд түлш, шатахууны хомсдолтой холбоотой асуудал үүсээд буй ч манай үйлдвэрийн хамт олон урьдчилан төлөвлөсний үр дүнд хангалттай нөөцөө бүрдүүлэн ажиллаж байна. Өнөөдрийн байдлаар, Эрдэнэт үйлдвэр АИ92 бензин 320 хоног, АИ95 бензиний 60 хоногийн нөөцтэй. Дизель түлшний хувьд 14 хоногийн нөөцтэй байгаа бөгөөд зуны түлшний гэрээт нийлүүлэгч НИК компани 4800 тонн түлшийг хуваарийн дагуу нийлүүлэхээр бэлэн хадгалж байгаагаа мэдээлсэн. Энэ тал дээр хангамж, худалдан авалтын хэлтэс, мэргэжилтнүүд анхаарч ажиллаж байгааг хэлэх нь зүйтэй. Тиймээс шатахуун түлшний нөөц бүрдүүлэлт хэвийн, намар, өвлийн бэлтгэл ажил төлөвлөгөөний дагуу хэрэгжиж байна.
Нар минутад мандаж минутад жаргана.
Үс засуулвал: 
Суудал: 
