Жилд 39.6 сая тонн хүдэр боловсруулах хүчин чадалтай Баяжуулах үйлдвэрийн тасралтгүй, найдвартай ажиллагааны ард олон хүний уйгагүй хөдөлмөр, хариуцлага, мэргэжлийн ур чадвар бий. Тэдний нэг тод төлөөлөл бол инженер, удирдах ажилтан Л.Ууган-Эрдэнэ юм. Тэрээр Бутлан тээвэрлэх, Өөрөө нунтаглах, Нунтаглан баяжуулах хэсгүүдийн туузан дамжуулгуудын найдвартай ажиллагааг хангах чиглэлээр бодит үр дүнтэй ажлуудыг удирдан зохион байгуулж, нийт 2540 метр туузан дамжуулгын лентийг богино хугацаанд, чанарын өндөр түвшинд шинэчлэн сольж, засварлах ажлыг амжилттай гүйцэтгүүлжээ. Үүний үр дүнд үйлдвэрлэлийн үндсэн үзүүлэлтүүд 100 хувиас даван биелсэн байна. Түүнчлэн, туузан дамжуулгын төлөвлөгөөт засварыг хугацаанаас 24 цагийн өмнө дуусгаснаар 76.8 мянган тонн хүдэр нэмэлтээр боловсруулах боломж бүрдэж, 2.7 тэрбум төгрөгийн эдийн засгийн үр ашиг бий болгосон нь түүний хөдөлмөр зохион байгуулалт, манлайлах ур чадварын бодит илрэл юм.
Инженер Л.Ууган-Эрдэнэ нь техникийн шинэ шийдлүүдийг үйлдвэрлэлд амжилттай нэвтрүүлдгээрээ онцлог нэгэн. Тэрээр нэг, хоёрдугаар шатны нунтаглалтын МШЦ загварын тээрмийн “глухой барабан”-ын резинен хуягийг нөхөн сэргээх аргачлалыг санаачлан хэрэгжүүлж, импортын бүтээгдэхүүнийг орлохуйц чанартай засвар хийснээр зардал хэмнэсэн, оновчтой шийдэл бий болгожээ. Өнгөрсөн онд Баяжуулах үйлдвэрийн үндсэн тоног төхөөрөмжүүдэд хийгдсэн олон чухал техникийн шинэчлэл, засварын ажлыг удирдан зохион байгуулж, 1800 гаруй метр туузыг төлөвлөгөөт хугацаанаас өмнө сольсноор үйлдвэрлэлийн найдвартай ажиллагааг хангаж чадсан байна. Мөн 1К62Д маркийн токарийн суурь машиныг ашиглалтад оруулж, 78,860 ширхэг деталь, эд ангийг дотоод нөөц бололцоогоор үйлдвэрлэснээр засвар, сэлбэгийн зардлыг мэдэгдэхүйц бууруулжээ.
Бүтээмжийн хорооны даргын хувьд Л.Ууган-Эрдэнэ нь бүтээмж, чанарын дугуйлангуудын үйл ажиллагааг идэвхжүүлж, ажилтнуудын санал санаачилгыг бодитоор дэмжин ажилладаг. Түүний удирдлага дор хамт олон 2025 онд дэвшүүлсэн сайн саналуудаа 100 хувь үйлдвэрлэлд нэвтрүүлсэн нь үр дүнтэй удирдлагын тод жишээ юм. Тэрээр ажлын байрны “5 сайн үйлс”-ийг хэвшүүлж, эмх цэгцтэй, аюулгүй ажлын орчныг бүрдүүлэхэд онцгой анхаардаг. Тэрээр зөвхөн тоног төхөөрөмж, техникийн асуудалд анхаараад зогсохгүй, хүн төвтэй удирдлагыг чухалчилдаг манлайлагч юм. Тэрээр залуу, дадлага туршлага багатай ажилтнуудыг сурган хөгжүүлэхэд цаг заваа харамгүй зориулж, тэдний мэдлэг, ур чадварыг системтэйгээр дээшлүүлдэг. Үүний бодит жишээ нь бигнүүрийн хэсгийн мастер Б.Нармандах, бигнүүрчин Г.Энхсайхан нар өнөөдөр өндөр бүтээмжтэй ажиллаж, хэсгийн дарга болон инженер техникийн ажилтны оронд нөөцөд бэлтгэгдэн, орлон болон хавсран бие даан ажиллах түвшинд хүрсэн явдал юм.
Түүний амжилтын түүх хаанаас эхтэй вэ?
Л.Ууган-Эрдэнэ нь Сэлэнгэ аймгийн Баруунбүрэн суманд төрж өссөн. Арван жилийн боловсролоо төрөлх сумандаа эзэмшээд, Дархан хотын Шинжлэх ухаан, технологийн их сургуульд элсэн орж, 2007 онд амжилттай төгсжээ. Төгссөн даруйдаа Баяжуулах үйлдвэрт ажиллах хүсэлт гарган, сонгон шалгаруулалтын шат бүрд амжилттай оролцож, мэргэжлийн шалгалтад тэргүүлэн, олон залуу горилогчдоос ганцаараа шалгаран Баяжуулах үйлдвэрийн Механик боловсруулалт, бигнүүрийн хэсэгт тоног төхөөрөмжийн засварчнаар ажлын гараагаа эхлүүлсэн байна.
Хөдөлмөр, хариуцлага, мэдлэг чадвараараа шат дараалан өсөн дэвшсэн тэрээр 2013 оны арваннэгдүгээр сараас Эрдэнэт үйлдвэрийн Механикийн хэлтэст оношилгооны инженерээр, 2016 оны хоёрдугаар сараас Баяжуулах үйлдвэрийн Механик боловсруулалт, бигнүүрийн хэсгийн даргаар томилогдон өнөөг хүртэл амжилттай ажиллаж байна.
Түүний аав О.Лхагважав хуучнаар Бургалтайн САА-д жолоочоор ажиллаж байсан бол ээж Б.Сайнтөмөр “Хүн эмнэлэг”-т эмийн санчаар 38 жил ажилласан ахмад ажилтан юм. Ажилч хичээнгүй, үнэнч хөдөлмөрийн үнэ цэнийг гэр бүлийн орчноос өвлөж өссөн нь түүний амьдрал, мэргэжлийн замналд чухал нөлөө үзүүлжээ. Гэр бүлийн хувьд эхнэр, хоёр хүүхдийн хамт амьдардаг. Том охин нь БНСУ-ын “Hanseo” их сургуульд суралцаж байгаа бол бага хүү нь орос 19 дүгээр сургуулийн зургаадугаар ангийн сурагч. Эхнэр Х.Урангоо нь Орхон аймгийн Явган алхалтын холбоо ТББ-ын тэргүүнээр ажиллаж, олон нийтийн эрүүл мэнд, идэвхтэй амьдралын хэв маягийг түгээн дэлгэрүүлэх үйлсэд хувь нэмрээ оруулж байна. Л.Ууган-Эрдэнэ бол зөвхөн инженер мэргэжилтэн төдийгүй үйлдвэрлэлийн найдвартай ажиллагааг баталгаажуулагч, хамт олноо нэгтгэгч, бүтээмж, үр ашгийг бодитоор нэмэгдүүлэгч хүн төвтэй манлайлагч билээ.
Нар минутад мандаж минутад жаргана.
Үс засуулвал: 
Суудал: 
