Эрдэнэт үйлдвэрийн Үйлдвэрлэл, техникийн хэлтсийн Техникийн албаны тэргүүлэх инженер Д.Цэрэнчимэдийг Судалгаа, шинжилгээний хүрээлэнгийн Ерөнхий инженерээр томилсон тухай мэдээллийг танилцуулснаар удирдлагуудын даваа гаригийн ээлжит шуурхай зөвлөгөөн эхэллээ.
Нийгмийн хариуцлагын хүрээнд Сэлэнгэ аймгийн нутагт бичил уул уурхайн үйл ажиллагаанаас эвдэрсэн 2000 гаруй га талбайд техникийн нөхөн сэргээлтийн ажлыг үргэлжлүүлэхээр ажиллаж байна. Өнгөрсөн онд 1200 га талбайд нөхөн сэргээлт хийсэн бол энэ онд үлдсэн 777 га-д нөхөн сэргээлт хийгдэх юм байна. Энэ тухай Байгаль орчин, ногоон хөгжлийн хэлтсийн дарга Ж.Жавхланбат мэдээлэл хийлээ.
Өнөөдөр зэсийн баяжмалын арилжаа “Цан цохих” ёслол Улаанбаатар хотод анх удаа зохион байгуулагдаж байна. Эхний ээлжийн дуудлага худалдаагаар нийт 3000 тонн зэсийн баяжмал худалдаалах бөгөөд уг арга хэмжээнд Эрдэнэт үйлдвэрийн Ерөнхий захирал, холбогдох мэргэжилтнүүдийн хамт оролцож байгаа аж. Хэрэв худалдан авагч шалгарсан тохиолдолд дээрх хэмжээний баяжмал ачилтанд бэлтгэх юм байна.
“Их зогсолт”-д бэлтгэл хангах ажил төлөвлөгөөний дагуу хийгдэж эхлээд байна.Өнгөрсөн долоо хоногт төв штаб хуралдаж, зарим тулгамдаж буй асуудлаар санал солилсон тухай Механикийн хэлтсийн дарга Б.Чинзориг мэдээллээ. Энэ хүрээнд “Их зогсолт”-ын үеэр хийгдэх засвар үйлчилгээнд шаардлагатай тоног төхөөрөмж, сэлбэг материалын хангамжтай холбоотой тендер шалгаруулалтыг хугацаа алдалгүй зарлаж, зохион байгуулахыг холбогдох газар хэлтэст анхааруулав. Одоогоор “Их зогсолт”-той холбоотой 91 тендер шалгаруулалт төлөвлөгдсөнөөс 60 хувийн гүйцэтгэлтэй байгаа юм байна.
Монгол Улсын Ерөнхийлөгчийн зарлигаар бүх нийтээрээ мод тарих үндэсний өдрийг ирэх сарын 11,12-ны өдрүүдэд зохион байгуулахаар төлөвлөж буйг Ногоон хөгжлийн төслийн нэгжээс мэдээлэв. Мөн энэ өдрүүдэд Залуучуудын холбоо, CuMo клуб хамтран Эрдэнэт үйлдвэрийн 1000 залуучуудын “Залуусын хавар” үйл ажиллагаа зохион байгуулах юм байна.