Эрдэнэт үйлдвэрийн Соёл урлагийн цогцолборын дарга Б.Баттулгаас энэ онд хичээллэх дугуйлангуудын үйл ажиллагааны талаар тодрууллаа.
Манай цогцолборын 2023-2024 оны хичээлийн жилийн дугуйлангийн үйл ажиллагаа эхэлж байна. Дугуйлангуудын зорилго нь хүүхэд багачуудын авьяас билгийг хөгжүүлэх, чөлөөт цагийг нь зөв боловсон өнгөрүүлэх, гоо зүй, соёл урлагийн мэдрэмжтэй иргэн болгон төлөвшүүлэхэд оршдог. Энэ онд 19 багштай, 11 төрлийн дугуйлан хичээллэнэ. Өнгөрсөн онд манай дугуйлангуудад 360-аад хүүхэд хамрагдсан. Тэд хичээлийн жилийн хугацаанд олон улсын болон аймаг бүсийн чанартай уралдаан тэмцээнээс 164 багц медаль авсан. Үүнээс харахад жилээс жилд хүүхдүүдийн амжилт өсөж байна. Манай дугуйлангийн ганцаарчилсан төрөлд хамрагдах хүүхэд 120 мянган төгрөгийн төлбөр төлж хичээллэнэ. Бүлгээр хичээллэх хүүхэд 80 мянган төгрөг төлж дугуйланд хамрагдана. Энэ нь зах зээлийн үнэлгээнээс харьцангуй хямд үнэлгээгээр үйлчилж байна гэсэн үг. Манай цогцолборын дуу драмын, загвар гоо зүйн, төгөлдөр хуурын дугуйланд олон хүүхэд хамрагддаг. Төгөлдөр хуур, спорт бүжгийн дугуйлангийн хүүхдүүд уралдаанд арай илүү амжилт үзүүлээд байна.
-Саяхан Соёл урлагийн цогцолборын уран бүтээлчид Нүүдэлчин фестивальд амжилттай оролцлоо. Энэхүү фестивалийн онцлог, ач холбогдол юу байв?
-Манай цогцолбор цехүүдийн болон гадна дотнын захиалгат ажлаа төлөвлөгөөний дагуу биелүүлж ирлээ. Олон улсын “Нүүдэлчин-2023” фестиваль Улаанбаатар хотод болж, 21 аймгийн соёлын өв тээгч 40-өөд уран бүтээлч, ардын авьяастнууд оролцлоо. Үүний 20 нь баялаг бүтээгч Монгол Улсын баатар Эрдэнэт үйлдвэрийн уурхайчдын төлөөлөл авьяас билигтнүүд байсан нь онцлог байлаа. Манай улсын ард түмний ёс заншил, зан үйлийг харуулсан соёлын өв тээгч авьяастнуудын тоглолтыг гадны олон жуулчид үзэж сонирхлоо. Зургаан удаагийн тоглолтыг амжилттай зохион байгууллаа. Энэ үеэр Монгол Улсын Хөдөлмөрийн баатар нэрт хөгжмийн зохиолч Бямбасүрэнгийн Шаравын “Сэрсэн тал” зохиолыг 512 хүний бүрэлдэхүүнтэй үндэсний найрал хөгжмийн баг тоглож, ЮНЕСКО-гийн дэлхийн соёлын өвд бүртгүүлэхээр болсон. Ингэснээр дэлхийд хүлээн зөвшөөрөгдсөн хөгжмийн уран бүтээл болохыг албан ёсоор баталгаажууллаа гэсэн үг. Уг ёслолд Эрдэнэт дуу бүжгийн чуулгын уран бүтээлчид амжилттай оролцлоо.
-Баярлалаа.
Б.БАТТУЛГА: Энэ онд 19 багштай, 11 төрлийн дугуйлан хичээллэнэ
Б.Баттөгс
Зурагчин
Энэ мэдээ танд ямар санагдав?
0
0
0
0
0