Жил бүр уламжлал болгон зохиогддог Электроникийн Улсын олимпиад өнөөдөр “Эрдэнэт цогцолбор” дээд сургууль дээр эхэллээ. Электроник, цахилгаан болон автоматжуулалтын чиглэлээр үйл ажиллагаа явуулдаг байгууллагууд болон их, дээд сургуулиудын хамтын ажиллагааг хөгжүүлэх, харилцан туршлага солилцох, энэ мэргэжлийг сурталчлах зорилготой уг олимпиад анх удаа орон нутагт болж байгаагаараа онцлогтой юм. Энэ удаагийн олимпиадыг “Эрдэнэт цогцолбор” дээд сургууль, “Эрдэнэт үйлдвэр” ТӨҮГ, МУИС, Юнител, Мокса инженеринг компаниуд хамтран уг олимпиадыг зохион байгуулж байна. Олимпиадад ШУТИС, МУИС, Батлан хамгаалахын их сургууль, Шинэ Монгол технологийн коллеж зэрэг 6 сургуулийн 9 багийн 45 оюутан оролцож, онолын даалгавар, дадлагын ажил гүйцэтгэн мэдлэг, ур чадвараа сорих юм.
Олимпиад хоёр өдөр үргэлжлэн маргааш шилдгүүдээ тодруулна. Баг, хувийн төрлөөр тус бүр гурван байр шалгаруулна. Шүүгчээр олимпиадад оролцогч зургаан сургуулиас нэг, нэг багш, ахлах шүүгчээр МУИС-ийн багш, доктор профессор Болормаа ажиллах юм.
Олимпиадын нээлтийн үеэр “Эрдэнэт цогцолбор” дээд сургуулийн Эрчим хүч, мэдээллийн технологийн тэнхимийн дэд профессор А.Түвшинжаргалтай уулзахад,
“Эрдэнэт бол Аж үйлдвэрийн хот. Аж үйлдвэрийн парк зэрэг бүтээн байгуулалтын ажлууд хийгдэж буй Эрдэнэт хотод ирээдүйд электроник, автоматжуулалтын мэргэжилтнүүд илүү эрэлт хэрэгцээтэй болно. Иймээс ч энэхүү олимпиадыг Эрдэнэт хотод зохион байгуулж байна. Манай сургууль энэ олимпиадад 2011 оноос хойш тогтмол оролцож байна. 2022 онд тусгай байр, 2023 онд Эрдэм шинжилгээний хурлын илтгэлд хоёрдугаар байр эзэлсэн. Энэхүү олимпиадын дадлага ажлаар бодит систем угсруулдгаараа онцлогтой. Өнгөрсөн жил манай оюутнууд алсын зайнаас удирддаг системийн хөгжүүлэлт хийж оролцсон. Алслагдсан объектуудын температур, чийгшил, галын дохиоллыг хянах, түүнийг удирдан ажиллуулах энэ систем нь Эрдэнэт үйлдвэрт ашиглах бүрэн боломжтой юм” гэлээ.