Эрдэнэт үйлдвэрийн Техник, технологийн шинэчлэлийн хүрээнд Баяжуулах үйлдвэрийн Шүүн хатаах хэсэг дээр Зэсийн баяжмалын хуучин даралтат шүүлтүүрийг Япон улсын “MCDGC-H1500x94” маркийн даралтат шүүлтүүрээр солих ажил ид өрнөж байна. Энэхүү ажлын явцын талаар Шүүн хатаах хэсгийн дарга Ц.Батболдоос тодрууллаа.
-Зэсийн баяжмал шүүх даралтат шүүлтүүр суурилуулах ажил хэзээ эхлэв, ажил ямар шатанд явна?
-Манай хэсэг дээр Зэсийн баяжмалын даралтат шүүлтүүрийг сольж, Япон Улсын өндөр хүчин чадалтай даралтат шүүлтүүр тавих ажил ид өрнөж байна. Энэ ажил 4-р сарын 24-нөөс эхэлсэн. Одоогоор хуучин шүүлтүүрээ буулгаж байна. Өнөөдрийн байдлаар Засвар, угсралтын цехийн дөрвөн бригад хоёр ээлжээр өглөө 8-16, 16-24 цаг хүртэл, ХМТАЦ-ын БҮТАХ-ийнхэн уртасгасан цагаар ажиллаж байгаа. Мөн манай хэсгийн засварын болон цахилгааны бригадынхан ажиллаж байна. Энэ ажил хоёр дахь долоо хоногтоо үргэлжилж байна. Бид үүнтэй холбоотойгоор богино хугацаанд хуучин шүүлтүүрээ буулгаж, шинэ шүүлтүүрээ угсарч ажилд оруулахаар зорьж байна.
-Хүндрэлтэй асуудал юу байна?
-Шинээр суурилуулж буй тоног төхөөрөмжийг шинэ талбай бэлдээд шууд тавьчихна. Хуучин шүүлтүүрээ буулгаж байгаа болохоор жаахан удаашралтай байгаа. Бид хуучин шүүлтүүрээ дахин ашиглах зорилгоор деталиудыг нь боолтуудаар нь тайлж байна. Аль болох эвдэхгүйгээр авч байгаа болохоор засварын ажил жаахан удаашрах маягтай. Гэхдээ бид батлагдсан хуваарийн дагуу буулгаж дуусна. ЗУЦ-ийн дарга Х.Баяраа амралтын өдрүүдэд хоёр бригадаа ажиллуулахаар шийдвэрлэсэн. Угсралт, монтаж, буулгалтын ажил явж байхад манай засварын бригадынхан хажууд нь труба шилжүүлэх, насосоо салгах зэрэг бусад ажлыг зэрэгцээд хийж явдаг. Бид 14 хоногт хуучин шүүлтүүрээ буулгаж дуусна. Үүний дараа шинээр суурилуулах ажлаа эхэлнэ. Ер нь хуваарийн дагуу ажиллаж дуусгана.
-Шүүлтүүр хэзээ ашиглалтад орох вэ?
-Эрдэнэт үйлдвэрийн Ерөнхий инженер, Ерөнхий механикийн баталсан хуваарийн дагуу 5-р сарын 31 гэхэд шинэ шүүлтүүрээ суурилуулж дуусгана. 6-р сарын нэгнээс залгаж эхэлнэ гэсэн тооцоотой ажиллаж байна.
-Шинэ шүүлтүүр өмнөхөөсөө юугаараа ялгаатай вэ?
-Манайх өмнө нь АНУ-д үйлдвэрлэсэн 78 хавтантай даралтат шүүлтүүртэй байсан. Шинэ шүүлтүүр Япон улсад үйлдвэрлэсэн 94 хавтантай, хамгийн сүүлийн үеийнх. Монголд анх удаа суурилуулж буй зэсийн баяжмалын томоохон шүүлтүүр.
Хүчин чадлын хувьд хуучин шүүлтүүр цагт 70-100 тонн баяжмал шүүдэг байсан бол энэ нь цагт дангаараа 120-130 тонн баяжмал шүүх хүчин чадалтай, өндөр бүтээмжтэй тоног төхөөрөмж.
-Хоногт хэдэн тонн зэсийн баяжмал шүүдэг вэ?
Бид хоногт 1800-2200 тонн зэсийн баяжмал шүүх төлөвлөгөөтэй.
-Шинэ шүүлтүүр ашиглалтад орсны ач холбогдол юу вэ?
-Энэ нь Баяжуулах үйлдвэрийн Өөрөө нунтаглах, Нунтаглан баяжуулах хэсгүүдийн өргөтгөлүүдтэй уялдан хийгдэж байгаа. Энэхүү шинэчлэл нь Эрдэнэт үйлдвэрийн зэсийн баяжмал боловсруулах өсөн нэмэгдэж буй төлөвлөгөөт зорилтыг ханган биелүүлэхэд үр өгөөжөө өгсөн томоохон ажил болж байгаа.
-Энэ жил томоохон бүтээн байгуулалтын өөр ямар ажил хийх вэ?
-Манай хэсэг гурван тоног төхөөрөмжөө дэвшилтэт технологиор шинэчлэхээр зорьж байгаа. Үүний хамгийн томоохон бөгөөд яаралтай ажил нь одоо сольж буй Зэсийн баяжмалын даралтат шүүлтүүр. Ирэх намар молибдены өтгөрүүлэгч, молибдены даралтат шүүлтүүр шинээр суурилуулах юм.