Эрдэнэт үйлдвэрийн Автотээврийн цехэд хийгдэж буй парк шинэчлэлтийн талаар цехийн дарга Я.Дамдиндоржоос тодрууллаа.
-Манай цех үйлдвэрийн хэмжээнд хамгийн олон тээврийн хэрэгсэлтэй. Тус цехийн гол зорилгын нэг нь тээврийн хэрэгслийн паркаа хугацаанд нь шинэчлэх явдал юм. Энэ жилийн тухайд уулын ажлын хүрээ 1,5 куб метрээр нэмэгдэж байгаа. Үүнтэй холбоотойгоор парк шинэчлэлтийн хүрээнд нэмж гурван машин авах ёстой. Мөн гурван автомашин шинэчлэхээр төлөвлөсөн. Дээр нь Баяжуулах үйлдвэрийн Хаягдлын аж ахуйн болон Ил уурхайн ажлын хүрээ нэмэгдсэнтэй холбоотой турбин угсрагч катарпиллер, тэсэлгээний цооног түгжигч тусгай зориулалтын автомашин авахаар төлөвлөсөн. Эдгээр тээврийн хэрэгслүүдийг шинэчилснээр манай цехийн технологийн тээврийн хүчин чадал нэмэгдэнэ. Энэ жилийн техникийн бэлэн байдлын итгэлцүүр 0.93 орчим байна. Гурван автомашин шинэчлэхээр техникийн бэлэн байдлын итгэлцүүр 0.06 нэгжээр нэмэгдэх тооцоо гарсан.
-Энэ жилийн техникийн улсын үзлэгт хэзээнээс хамрагдах вэ?
-Манай цехэд Авто тээврийн үндэсний төвөөс албан ёсоор мэдэгдэл ирүүлсэн. Үйлдвэрийн газрын Ерөнхий инженерийн баталсан хуваарийн дагуу манай цех болон бусад авто тээврийн хэрэгсэлтэй, бүтцийн нэгжүүдийн автомашинууд үзлэгт хамрагдаж эхэлсэн. Өнөөдрийн байдлаар манайд 320 орчим тээврийн хэрэгсэл бүртгэлтэй байна. Үүний 303-ыг ашиглаж байгаа. Энэ нь нийт тээврийн хэрэгслийн 95 хувийг ашиглаж байна гэсэн үг. Үлдсэн техникүүдийн хувьд ашиглалтын хугацаа дууссан. Төрийн өмчийн бодлого, зохицуулалтын газар хугацаа нь дууссан техник хэрэгслүүдийн талаарх санал хүсэлтээ хүргүүлсэн. Актлах бичиг баримтаа хүлээж буй тэрэг, техникүүд гэж ойлгож болно.
-Парк шинэчлэлтийн хүрээнд өөр ямар ажлууд хийгдээд байна?
-Авто тээврийн цехийн Зорчих тээврийн хэсэг Солонгос улсад үйлдвэрлэсэн “Hyundai” маркийн таван автобусаар парк шинэчлэлт хийсэн. Эдгээрийг шугамд гаргахад дунджаар нэг автомашинд таван өдөр зарцуулсан. Тус хэсэг нь нэг төрлийн автомашинаар парк шинэчлэлт хийснээр цаашид “Hyundai” маркийн 36 автобус үйлдвэрийн ажилтнуудад үйлчилнэ. Мөн Ус хангамжийн цехийн чиглэлд “County” маркийн хоёр автомашин үйлчилгээнд явдаг. “Hyundai” автобус 60-аас дээш хүн зөөвөрлөх хүчин чадалтай. Зорчигч тээврийн хэсэгт таван автобус ирснээр 15 хувийн парк шинэчлэлт хийгдлээ. Манай Зорчигч тээврийн хэсгийн засварчид төлөвлөгөөний дагуу автобуснуудад урсгал болон техникийн үйлчилгээ хийж ажиллана.
-Баярлалаа.