Төгссөн сургууль:
ОХУ, Екатеринбург хот, Уралын политехникийн дээд сургууль, Улаанбаатар хотноо Санхүү, эдийн засгийн дээд сургууль
Мэргэжил:
Цахилгааны инженер, Банк санхүүч, эдийн засагч
Ажилласан туршлага:
1993 оноос Баяжуулах үйлдвэрийн ҮТА-д удирдлагын самбарын операторч, эдийн засагч, эдүгээ Төлөвлөлт, шинжилгээний албаны даргаар ажиллаж байна
Чин хүсэл:
Яруу найргийн охин тэнгэрт ивээгдэн, утга уянгын хорвоод гэрэлтэж яваа найрагч бүсгүй уурхайчдын эгнээнд мөр зэрэгцэн хөдөлмөрлөсөөр 28 дахь жилээ үдэж байна. Эрдэнэт үйлдвэрийн үндсэн цех болох Баяжуулах үйлдвэрийн ар талыг бат найдвартай даадаг тэрээр ажил мэргэжилдээ чадварлаг нэгэн. МЗЭ-ийн гишүүн тэрээр өнөөдрийг хүртэлх хугацаанд 40 гаруй дуу, 4 ном өлгийдөн авчээ. Мөн “Эрдэнэт Монголоо дуурсгана” дуугаар “Морин хуур-2018” наадмаас тусгай байр, “Уурхайн хот” дуугаар “Дуунд мөнхөрсөн Эрдэнэт” уралдаанаас 2 дугаар байрын шагнал тус тус хүртсэн билээ. Хоббигоороо хорвоог зөөллөж яваа Болормаа бүсгүй “Болор цом”-ын эзэн, яруу найрагч Барнангийн Доржпаламын 70 насны ойд зориулсан “Дүүрэн билэг” яруу найргийн наадмаас тусгай байрын шагнал хүртсэн амжилтаар шинэ оноо угтаж байна.
-Таны амьдралын сэргээш?
-Өглөө эртлэн босож ажилдаа ирэхээр өөрийн эрхгүй сэтгэл сэргэдэг. Үйлдвэрээрээ бахархдаг.
-Өөртөө хэвшүүлсэн эерэг дадал?
-Сөрөг бодлыг аль болох бага хадгалах, бусдын бүтээсэн сайн сайханд эргэлзээгүй талархах, хэнтэй ч ижил түвшинд харьцахыг чухалчилдаг.
-Таны ажлын бүтээмжийг дээшлүүлдэг гол зүйл?
-Цехийнхээ Үйлдвэр техникийн албанд 13 жил ажиллаж, технологийн циклийн үйл ажиллагааны онцлог, бусад дэмжих болон туслах хэсгүүдийн чиг үүргийн тухайд хуримтлуулсан мэдлэг маань төлөвлөлт, зардлын бүртгэл, металлын баланс, бараа материалын хэрэгцээ, нөөц бүрдүүлэлтийн хяналт, цалин хөлсний сангийн зарцуулалт, бусад тайлан тооцоо, анализ шинжилгээ хийх, тушаал шийдвэрийн биелэлтийг хангах гэхчлэн Төлөвлөлт, шинжилгээний албаны үйл ажиллагааг удирдан ажиллахад суурь мэдлэг болдог.
-Хийж байгаа ажлын тань онцлог?
-“Эрдэнэт үйлдвэр” ТӨҮГ-ын Баяжуулах үйлдвэр гэхээр хэн бүхэн ойлгох байх. Экспортын бүтээгдэхүүн үйлдвэрлэдэг маш том хамт олон. Ойролцоогоор 1160 ажилтан хоногийн 24 цагт, жилийн 365 хоногт тасралтгүйгээр /2 хоног тэг зогсолт хийдэг/ үйл ажиллагаа явуулдаг. Ийм агуу хөдөлмөрчдийн нэгээхэн эд эс билээ, би.
-Ойрын өдрүүдэд ямар ажил амжуулахаар төлөвлөж байна вэ?
-2021 оны төгсгөл болж байна. Бүтэн жилийн дотор хамт олныхоо хийж бүтээсэн ажлын гүйцэтгэлийг тооцох, тайлагнах том ажил хүлээгдэж байна.
-Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ?
-Эрдэнэт үйлдвэртээ, Баяжуулах үйлдвэртээ 29 дэх жилдээ ажиллаж байна. Анх ажилд ороход минь зааж сургаж, ажилтан болгож авсан удирдлага, ахмад дээд үеийнхэн маань гавьяаныхаа амралтад гарцгааж, бидний болон бидний доод үеийн залуу халаа ид шижигнүүлж байна. Гадаад нөхцөл байдал хүндрэлтэй байгаа ч техник технологийн шинэчлэлд хангалттай хөрөнгө оруулалт хийгдэж, ордын нөөц нэмэгдэж байгаа болохоор үйлдвэрийн маань ирээдүй өнгөрсөн ба одоогоосоо ч гэрэл гэгээтэй төсөөлөгддөг. Бас сайхан нутаг оронд суралцан, мэргэжил боловсрол эзэмшээд, амьдралын аз жаргалыг эдэлж болох Монгол орны хамгийн аятай тухтай хотод ажиллаж, амьдарч байгаадаа сэтгэл хангалуун байдаг.
-Залуучуудад өгөх таны зөвлөгөө?
-Өөрийгөө таньж, хүсэл, сонирхлоо илрүүлж, мэргэжлээ зөв сонгож, дуртай ажлаа хийх нь амжилтаас гадна амьдралын баяр баясгалан авчирдаг юм шүү. Дээд мэргэжил, дээд боловсрол, магистр, докторын дипломоос ч илүү дотоод мэдрэмж, мөрөөдөл, тэмүүлэл, ур дүйгээр ер бусын гайхамшгийг бүтээж, сэтгэл ханамж 100 хувь байх боломжтойг энэ дашрамд хэлье.
-Таны 5 хүсэл?
-Хоббигоо хөгжүүлж, уран бүтээлүүдээ чанаржуулах, олон түмэнд хүргэх
-Эрдэнэт үйлдвэрийнхээ тухай бүтээл туурвих
-Ярианы түвшинд 1-ээс 2 гадаад хэл сурах
-Орос хэлнээс уран зохиолын номын орчуулга хийж үзэх
-Цаг нь болохоор өөртөө олгож байгаагүй чөлөө завыг мэдэрч, аялах
Нар минутад мандаж минутад жаргана.
Үс засуулвал: 
Суудал: 
