Дэлхийн 153 оронд 689 сая гаруй иргэнийг вакцинжуулаад байна

     Дэлхийн хэмжээнд 04 сарын 01-ний өдрийн байдлаар нийт 104 вакцин боловсруулагдаж байгаагаас 291 туршилт явагдаж, тэдгээрээс 13 вакциныг ямар нэгэн байдлаар баталгаажуулсан байна. Харин дээрх тооноос 1-р үе шатандаа яваа нь 29, 2-р үе шатанд 41, 3-р үе шатанд 29 вакцин тус тус туршигдаж байна.

     Дэлхий дахинд Ковид-19 цар тахлын эсрэг вакцинжуулалт эхэлснээс хойш нийтдээ 153 оронд 689 сая гаруй иргэнийг вакцинжуулаад байгаа бөгөөд хоногт 16.3 сая тун хийгдэж байна. Энэ нь дэлхийн нийт хүн амын 4.4%-ийг эзэлж байна. Үүнээс АНУ-д 169 гаруй сая хүн вакцинд хамрагдсан нь хоногт 3 орчим сая тун болж байгаа бөгөөд энэ үзүүлэлтээр нийт хүн амынхаа 75%-ийг хамруулахад 3 сарын хугацаа шаардагдана.

     Харин Монгол улсад вакцинжуулалт эхэлснээс хойш 04-р сарын 07-ны өдрийн байдлаар 414,382 хүн хамрагдсан нь хоногт 24,683 тун хийгдэж байгаа тоо дүн гарч байна. Тэгвэл нийт хүн амаа вакцинжуулалтад хамруулсан хувиараа хамгийн эхэнд Гибралтар улс 89.6%-ийг хамруулснаар багтаж байна. Өөрөөр хэлбэл нийт 33.7 мянган хүн амаасаа 61 мянгыг вакцинжуулаад байгаа юм. Харин өмнө нь вакцинжуулалтынхаа хувиар тэргүүлж байсан Израил улс хоёрт бичигдэж байна. 10 гаруй сая хүн амаа вакцинжуулснаар 55.9%-ийн үзүүлэлттэй байна.

     Тэгвэл БНХАУ-ын хувьд хамгийн их хүн хамруулсан тоогоор АНУ-ын дараа буюу 2-рт бичигдэж байна. Нийт 139,970,000 хүнийг вакцинжуулаад байгаа нь хоногт 4.76 сая тун хийж байгаа дүн юм. ОХУ нийт 11,670,000 хүнд вакцин хийсэн үзүүлэлтээр дээгүүр бичигдэж байна.

Дархлаажуулалтын хүрээнд Монгол Улсын Засгийн газар эхний ээлжинд дөрвөн төрлийн вакциныг Монгол Улсад оруулж ирэх шийдвэр гаргасан. Тухайлбал: 

1. Их Британи-Шведийн "AstraZeneca" компани ба Оксфордын их сургуулийн эрдэмтдийн хамтран гарган авсан Ковид-19-ийн эсрэг AZD1222 вакцин;
2. АНУ-ын Pfizer компани ба Германы “BioNTech” компанийн хамтран бүтээсэн "BNT162b2" вакцин;
3. БНХАУ-ын “Синофарм” компани, Бээжингийн биотехнологийн хүрээлэнгийн хамтран гарган авсан "BBIBP-CorV" вакцин;
4. Ковид-19-ийн эсрэг хамгийн анхны вакцин гэгдэх ОХУ-ын “Спутник-V” /Гам-КОВИД-Вак/ вакцин.

     Одоогоор, БНЭУ-ын буцалтгүй тусламжаар “АстраЗенека”-гийн 150 мянган тун вакцин, БНХАУ-ын буцалтгүй тусламжаар "BBIBP-CorV" вакцины  300 мянган тунг манай улс хүлээн аваад байна.

     Вакцинжуулалт Монголд эхэлснээс хойш ХӨСҮТ-ийн Дархлаажуулалтын албаны дарга О.Дашпагмын мэдээлснээр  хамрагдсан иргэдийн дархлаажуулалтын дараах урвал, хүндрэлийн тандалт судалгаагаар, БНХАУ-ын “Синофарм” үйлдвэрийн “Веро селл” вакцин тариулсан иргэдийн 13 хувьд хэвийн буюу түгээмэл илэрдэг урвал илэрчээ. Тухайлбал, халуурах, бие бага зэрэг арзайх, тарьсан хэсэг газарт өвдөх зэрэг урвал илэрч байгаа аж. Харин өмнө нь “Астразенека” тариулсан иргэдийн дунд хийсэн тандалт судалгаагаар 51 хувьд урвал илэрч байжээ.

     04 сарын 10-наас хоёр дахь тунгийн дархлаажуулалт эхэлнэ. Өөрөөр хэлбэл, Веро селл вакцин тариулсан иргэдийг дөрөвдүгээр сарын 10-наас, “Астразенека” тариулсан иргэдийг дөрөвдүгээр сарын 20-ноос эхлэн хоёр дахь тунд хамруулахаар бэлтгэл ажлаа хангаж байгаа аж.

Мэдээллийн эх сурвалжууд:

1. "Синофарм" үйлдвэрийн вакцин тариулсан иргэдийн 13 хувьд хэвийн урвал илэрчээ (montsame.mn)
2. Covid-19 Vaccine Tracker: Latest Updates - The New York Times (nytimes.com)
3. Status_COVID_VAX_01April2021.pdf (who.int)
4. #Vaccineswork (gavi.org)

Орчуулж, бэлтгэсэн: У.Нармандах