• Орон нутгаас 31,9 тэрбум төгрөгийн худалдан авалт хийжээ

        Эрдэнэт үйлдвэр ХХК нь сүүлийн дөрвөн жилийн хугацаанд Орхон аймгийн үйлдвэрлэгч компаниудтай 31,9 тэрбум төгрөгийн худалдан авалт хийжээ. Баяжмалын шуудай, ган бөөрөнцөг, ажлын хувцас, түүхий резин, лед гэрэл, электродын үйлдвэрүүдийн бүтээгдэхүүн дийлэнх хувийг эзэлж байна. 2016 онд 5,1 тэрбум, 2017 онд 7,7 тэрбум, 2018 онд 12 тэрбум төгрөгийн нэмүү өртөг шингэсэн бүтээгдэхүүнийг орон нутгийн үйлдвэрлэгчдээс худалдан авчээ. Орхон аймгийн аж ахуйн нэгжүүдтэй 2018 онд 42,5 тэрбум төгрөгийн 244 гэрээ байгуулсан нь өмнөх онтой харьцуулахад 2,2 дахин нэмэгдсэн байна.   У.Цэрэнбат Фото: Б.Баттөгс Дэлгэрэнгүй...
  • Геологийн нөөцийг 60 гаруй жил ашиглана

         Эрдэнэт үйлдвэр ХХК нь анх Монгол, Чехословакийн геологчдын хайгуулын ажлын үр дүнгээс эхлэн өнөөг хүртэл уурхайн ашиглалтын насжилтыг нэмэгдүүлэхээр геологи хайгуулын ажлыг дэлхийн жишигт нийцүүлэн өнөөг  хүртэл гүйцэтгэж байна. Ордын нөөц өсгөх хайгуул, судалгааны ажлыг олон жил үе шаттайгаар хэрэгжүүлж ирсэн. 2017, 2018 онд геологи хайгуулын ажлын үр дүнг нэмэгдүүлснээр хүдрийн баялгийг өсгөж,  ашиглалтын нөөцийг 40 жил, геологийн нөөцийг  60 гаруй жил ашиглах боломжтой боллоо. У.Цэрэн Фото: Б.Баттөгс Дэлгэрэнгүй...
  • Улсын төсвийн орлого нэмэгджээ

        Эрдэнэтийн уурхайчид улсын төсвийн тал хувийг бүрдүүлж, эх орны эдийн засгийн хүнд үед улсаа нуруундаа үүрч явсан түүхтэй. Өнгөрсөн 40 жилийн хугацаанд 854,8 сая тонн хүдэр боловсруулжээ. Сүүлийн гурван жилийн тайлан мэдээнээс харахад улсын болон орон нутгийн төсөвт уурхайчдын төлсөн татварын дүн өссөн байна. Тухайлбал 2016 онд 183,7 тэрбум, 2017 онд 578,6 тэрбум, 2018 онд 654,8 тэрбум төгрөгийн орлого төсөвт төвлөрүүлжээ. Харин үйлдвэрлэлийн түүхэнд зэсийн металл авалт энэ онуудад хамгийн өндөр хувьд хүрсэн байна. У.Цэрэнбат Фото: Б.Баттөгс Дэлгэрэнгүй...
  • Нийгмийн хариуцлагын зардлыг нэмэгдүүлэв

         Эрдэнэт үйлдвэр ХХК нь уул уурхайн хүнд үйлдвэрийн хувьд ажилтнууддаа 24 нэр төрлийн хөнгөлөлт, дэмжлэг, буцалтгүй тусламж үзүүлж, нийгмийн хамгааллын бодлогыг хэрэгжүүлэн ажиллаж байна. Ажилчдын цалинг 2017 онд 10%-аар, ажлын үр дүнгийн урамшууллыг 20 %-аар, 2018 онд цалинг дахин 15% хүртэл нэмэгдүүллээ. Үүний хүрээнд сүүлийн гурван жилд 129,2 тэрбум төгрөг зарцуулжээ. Нийгмийн хариуцлагын хүрээнд компани 2017 онд 60,5 тэрбум төгрөг зарцуулсан бол 2018 онд 24,4 тэрбумаар нэмэгдүүлж 84,9 тэрбум төгрөгт  хүргэсэн байна. У.Цэрэнбат Фото: Б.Баттөгс Дэлгэрэнгүй...
  • Хуульчид 32,8 тэрбум төгрөгийн ашигтай шийдвэр гаргуулжээ

         Эрдэнэт үйлдвэрийн Хууль, эрх зүйн газрын хуульчид өнгөрсөн онд олон улсын арбитрын гурав, дотоодын арбитрын нэг, иргэний 54, захиргааны дөрөв, эрүүгийн 16, зөрчлийн хоёр гээд нийт 80 хэрэгт компанийн эрх ашгийг төлөөлөн ажиллажээ. Тэд иргэний 54 хэрэгт ажилласнаас 38 хэргийг шүүхээр эцэслэн шийдвэрлүүлж, компанид 30,3 тэрбум төгрөгийн ашигтай шийдвэр гаргуулсан байна. Мөн эрүүгийн 16, зөрчлийн 2 хэрэгт  ажилласнаас 12 хэрэг эцэслэн шийдвэрлэгдэж, 4,1 сая төгрөгийн хохирлыг барагдууллаа. Түүнээс гадна захиргааны дөрвөн хэргийн хоёр нь шүүхээр эцэслэн шийдвэрлэгдэж, нийт 2,5 тэрбум төгрөгийг компанид ашигтайгаар шийдвэрлүүлсэн амжилттай ажиллав. Тус газар 2018 онд 16 компани, дөрвөн иргэнээс нийт таван сая ам.доллар, 900 орчим сая  төгрөгийн авлага барагдуулсан байна.      Харуул хамгаалалтыг сайжруулах, гэмт хэргээс урьдчилан сэргийлэх чиглэлээр “Үйлдвэрийн бүс, объектод хүн, тээврийн хэрэгсэл нэвтрүүлэх журам”-ыг шинэчлэн боловсруулан батлуулж, компанийн бүх ажилтнуудад цахим үнэмлэх олгох ажлыг ХМТАЦ-тай хамтран зохион байгуулсан. Журмыг хэрэгжүүлэх зорилгоор “Зочин” үнэмлэхийг хэвлүүлж, Үйлчилгээ, аж ахуйн алба, Гэрээт цагдаагийн хэлтэст хүлээлгэн өгсөн ба гэрээт байгууллагуудын ажилтнуудыг цахим үнэмлэхээр хангах ажлыг зохион байгуулав. Мөн “Компанийн аюулгүй байдал” сарын аяныг зохион байгуулж, Гэрээт цагдаагийн хэлтэс, Дотоодын цэргийн 816 дугаар салбарын харуул, хамгаалалтын бүх  цэгүүдээр хамгаалалтыг сайжруулах олон ажил санаачлан хэрэгжүүлсэн нь үр дүнгээ өгч байна. Энэ онд хэрэгжүүлэх үйлдвэрийн ажилчдын автобусны шалган нэвтрүүлэх систем, харуул хамгаалалтын нэгдсэн систем, камерын хяналтын нэгдсэн төв байгуулах ажлын бэлтгэл хангагдаж байна. Дэлгэрэнгүй...
  • Сэрэмжлүүлэг

         Сүүлийн үед Орхон аймгийн цагдаагийн газарт Эрдэнэт үйлдвэр ХХК-д бараа, ажил үйлчилгээ худалдан авах, гэрээ байгуулахад зуучлах, мөн ажилд оруулж өгөх нэрийдлээр мөнгө өгсөн авсан залилангийн гэмт хэргийн тухай  гомдол удаа дараа ирсэн байна.      Иймд Эрдэнэт үйлдвэр ХХК-ийн зүгээс иргэдэд дараахь мэдээллийг хүргэж байна. Эрдэнэт үйлдвэр ХХК нь бараа, ажил үйлчилгээ худалдан авах, иргэнийг ажилд авах журмууддаа нэмэлт өөрчлөлт оруулснаар худалдан авалтын  болон хүний нөөцийн бодлогоо 2016 оноос хойш олон нийтэд нээлттэй, ил тод болгосон.  Тухайлбал Эрдэнэт үйлдвэр ХХК-ийн Хангамжийн хэлтэс нь үйлдвэрт хэрэгцээтэй бараа материал, тоног төхөөрөмжийн худалдан авалт хийхдээ “Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай”  Монгол Улсын хууль, түүнчлэн компанийн “Бараа, ажил үйлчилгээ худалдан авах ерөнхий журам”-ын дагуу нээлттэй тендер шалгаруулалтын урилгыг компанийн албан ёсны www.erdenetmc.mn цахим хуудасны Худалдан авалт хэсэг дэх Тендерийн урилга дэд буланд байршуулан, олон нийтэд мэдээллийг цаг тухай бүрд ил тод хүргэн ажиллаж байна.      Мөн хүний нөөцийн бодлогын ил тод байдлыг хангах, хангуулах ажлын хүрээнд компанийн албан ёсны www.erdenetmc.mn цахим хуудсаар дамжуулан нээлттэй ажлын байрны зарыг олон нийтэд тогтмол хүргэж байна. Энэ нь тухайн ажлын байрны талаар сонирхсон иргэнд мэдээллийг ил тод хүргэх зорилготой бөгөөд хувь хүний хүсэлт, бичиг баримт, анкетыг цахимаар хүлээн авахгүй байхаар журамлагдсан болно. Иймээс Эрдэнэт үйлдвэр ХХК-иас зарлаж буй нээлттэй ажлын байрны мэдээллийг www.erdenetmc.mn цахим хуудасны Хүний нөөц хэсэг дэх Нээлттэй ажлын байр дэд булангаас авч, холбогдох хаягаар лавлаж тодруулах шаардлагатай юм. Түүнчлэн компанийн дотоод журмын дагуу ажилд орох өргөдөл, хүсэлтээ өөрийн биеэр ирүүлж, мэдээлэл авч байхыг хүсье.        Эрдэнэт үйлдвэр ХХК-тай холбоотой дээрхи мэдээллүүд иргэн та бүхний өмнө ил тод, нээлттэй байдаг бөгөөд залилан мэхлэх гэмт хэргийн золиос болохгүй байхыг сэрэмжлүүлж байна.   ЭРДЭНЭТ ҮЙЛДВЭР ХХК-ИЙН ХУУЛЬ ЭРХ ЗҮЙН ГАЗАР, ОЛОН НИЙТТЭЙ ХАРИЛЦАХ АЛБА Дэлгэрэнгүй...
  • “Эрүүл мэнд” хөтөлбөрийн хэрэгжилтийг сайжруулна

         Эрдэнэт үйлдвэр ХХК ажиллагсдынхаа нийгмийн асуудлыг шийдвэрлэх бодлогын хүрээнд "Эрүүл мэнд" цогц хөтөлбөр боловсруулан, тав таван жилээр хэрэгжүүлэн үр дүнг нь дүгнэдэг. Уг хөтөлбөрийн үйл ажиллагааг хариуцаж ажилладаг  ХАБЭАБОХХ болон Эрдэнэт сувиллалын цогцолборын удирдлага, холбогдох эмч мэргэжилтнүүд өнөөдөр зөвлөлдөж,  2019 оны ажлын төлөвлөгөөгөө хэлэлцлээ.      “Эрүүл мэнд” цогц хөтөлбөрийг илүү үр дүнтэй хэрэгжүүлэхийн тулд эрүүл мэндийн урьдчилан сэргийлэх үзлэг, эмчийн хяналтын зохион байгуулалтыг оновчтой, зөв төлөвлөх талаар хөндөв. Тухайлбал, Мэргэжлээс шалтгаалах өвчний улмаас хувь тогтоолгосон ажилтнуудын бүртгэл, тэдэнд тавих эрүүл мэндийн хяналт, Улаанбаатар хотод онош тодруулахаар явж буй ажилтнуудын үзлэгийн хуваарь, хөдөлмөрийн хүнд нөхцөлд буюу химийн хорт болон цацраг бодистой харьцдаг ажилтнуудын эрүүл мэндийн үзлэг төлөвлөлтийг практик судалгаа, ажилтнуудын санал дээр үндэслэн боловсруулахыг чухалчиллаа.      Мөн эрүүл хүнсээр дамжуулан уурхайчдыг эрүүлжүүлэх алхам хийх нь хамгийн зөв хэлбэр гэж зөвлөгөөний үеэр онцолсон. Эрдэнэт сувиллын цогцолборын дэргэд ажиллаж буй халдвар судлаач, хоол  зүйч, технологичоос бүрдсэн Хүнсний эрүүл  ахуйн хяналтын баг, ХАБЭАБОХХ-ийн Хүнсний эрүүл ахуйч эмч шинээр ажиллах болсон  зэрэг нь дээрх бодлогыг бодитоор хэрэгжүүлэх хөшүүрэг юм.  Ингэснээр ажиллагсдын халуун хоол болон хүнсний эрүүл ахуйн хяналт, шалгалт дээшилж,  эрүүл аюулгүй ажиллах боломж нэмэгдэнэ. “Ажиллагсдын эрүүл мэндийг хамгаалах, эрүүл ахуйн нөхцөл сайжруулах ажлыг  үр дүнтэй, оновчтой зохион байгуулахад энэхүү зөвлөгөөний зорилго чиглэсэн” гэж ХАБЭАБОХХ-ийн Эрүүл ахуйн албаны дарга О.Алтансүх ярилаа.   Дэлгэрэнгүй...
  • Автомат машинаас шаардлагатай бүх тодорхойлолтоо авна

         Эрдэнэт үйлдвэрийн мэдээллийн санг найдвартай баталгаажуулах, ажиллагсдад шаардлагатай баримт бичгийг шуурхай олгох, шат дамжлагыг багасган цаг хэмнэх зорилгоор тодорхойлолт олгох машиныг компанийн хэмжээнд ашиглаж эхэлсэн нь ажилтнуудын талархлыг хүлээж буй оновчтой технологийн нэг болжээ. Анхны машиныг Ерөнхий захиргааны 2 дугаар байранд нэвтрүүлж байсан бол  Ерөнхий захиргааны 1 дүгээр байр болон Засвар механикийн заводад шинээр хоёр машиныг нэмж суурилуулсан байна.  Уг ажлыг Эрдэнэт үйлдвэр ХХК-ийн Ерөнхий захирлын 28 тоот тушаалын дагуу Захиргаа хүний нөөцийн хэлтэс, Холбоо мэдээлэл, технологи автоматжуулалтын цех хамтран зохион байгуулж, гүйцэтгэсэн юм.      Тодорхойлолт авах машин нэвтэрснээр ажилтнууд цалин болон ажлын тодорхойлолт, ХАБ-ын хувийн хамгаалах хэрэгслийн мэдээллийг нэг дороос авах боломжтой боллоо. Түүнчлэн энэхүү боломжийг  илүү өргөн болгох үүднээс  Холбоо мэдээлэл, технологи автоматжуулалтын цехийн мэргэжилтнүүд үйлдвэрийн ажиллагсдын хөдөлмөр, зохион байгуулалтын нэмэлт системийг боловсруулж байна. Уг программыг Монгол Улсын хэмжээнд ашиглаж буй  мэдээллийн нэгдсэн “Хур” системтэй холбосноор бусад олон төрлийн бичиг баримтыг автомат машинаас авах боломжтой болох юм. Тодруулбал,  өндөр насны тэтгэвэрт гарахад маш олон тодорхойлолт бичиг бүрдүүлж, 2 сар хүртэл хугацааг зарцуулдаг байсан бол  дээрх программыг ашиглаж эхэлснээр  ердөө 2-3 минутын хугацаанд шаардлагатай бүх бичиг баримтаа татаж авах юм байна.  Шинэ программыг  оны эхний хагас жилд нэвтрүүлэхээр төлөвлөж байна.   М.Балжинням Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
×

Анхааруулга

JUser: :_load: Unable to load user with ID: 927

Эрүүл мэндээ эрхэмлэгч

24 11-р сар 2014 Нийтэлсэн

     15 настай Д.Дамдиндорж хүү аавыгаа  даган  Сэлэнгийн Цагаан арал руу мал тууж явахдаа Эрдэнэт хороонд саатан хоноглов. Тэр нь  1977 оны зун юмсанж.  Завханы Эрдэнэхайрхан сумын дунд  сургуулийн сурагч сэргэлэн шар хөвгүүн  орос, монгол залуусын бүтээлч хөдөлмөр ундарсан, хөл хөдөлгөөн ихтэй, тэр нэгэн сууринг  гайхан бишрээд л өнгөрч. Багаасаа малын захад өссөн болохоор дунд сургуулиа дүүргээд ч малаа маллалаа.  Эрдэнэт  нутагт  асар  том уулын үйлдвэр шангаа татаж,  илгээлтийн эздийг элсүүлж буй чимээ сураг, алс баруун хязгаарын хөдөө нутгийн  хүүгийн сэтгэлд нэг л ойрхон санагдах болж. Ингээд сэтгэлийн дуудлагаа даган 1980 онд  Эрдэнэтэд ирж, өрмийн машинч мэргэжил эзэмшин, жилийн дараа  Хүдрийн ил уурхайд туслах машинчаар хөдөлмөрийн гараагаа эхэлжээ. Тухайн үед   ажил   үйлсээрээ   алдар нь   түгсэн     өрмийн машинч Д.Жаргалсайханы шавь нь болов.  Хожим багш нь  Монгол улсын хөдөлмөрийн баатар болоход  тун их бахархсанаа ярьж, аргагүй л нүдээ олсон шагнал гээд л баясах. Тэр багшаасаа хөдөлмөрлөх арга барил,  олны дунд биеэ авч явахаас  өгсүүлээд олон эрдэм сурсан гэх.  А.Дамдиндорж 30 дахь жилдээ  өрмийн машинчаар ажиллаж, бригад ахалж,  багшийн эрдмийг  шавьдаа өвлүүлэхээр мэрийж явна. Ажилдаа сэтгэлтэй ханд, машин техникээ арчилж торд, нэг боолт суларсныг ч дор нь чангалчих гээд л залууст зааварлан, өөрөөрөө үлгэрлэнэ. Тэр: “18-р өрмийн бригадын бид найм  нэгэн сэтгэл өвөрлөн, машин техникээ гамтай эзэмшиж,  чармайн ажилласнаар төлөвлөгөөгөө тогтмол давуулан биелүүлдэг. Нэг машин дээр  өрмийн машинч, туслахтайгаа,  4 ээлжээр ажилладаг. Бригад хамт олны ажлын амжилтанд  техникийн бэлэн байдлыг хангаж ажилладаг засварчин, цахилгаанчин гээд олон хүний хөдөлмөр зүтгэл ч нөлөөлдөг. Нэг ээлжинд ажилладаг 5 өрмийн 10 машинч, мастертайгаа 11-үүлээ бас нэгэн  хамт олон. Бид тун ойр харилцаатай байж, бие биендээ тус дэмтэй явдаг.  Хэн нэгнийх нь ах дүү  ямаа самнах, хадлангаа авах үед нь ээлжийн хамт олноороо  очоод тусалчих жишээтэй. Урин цагт амралтаараа  салхинд хамт гарч  голын захад сайхан тухалчихна. Эдэн дотроо би хамгийн ахмад нь.  Өвлийн цагт тэсэлгээтэй өдөр постонд зогсохоос чөлөөлөх зэргээр намайг халамжилна. Манай залуус ийм л хамтач нөхөрсөг, хүнлэг” гээд тэднийгээ магтах. Нэр нь хүртэл эрдэнэтэй баян  хангайг түшиж,  дэлхийн шилдэг үйлдвэрийн нэгэн эд эс нь болж яваагаа  хэн хүнд заяахгүй аз завшаан хэмээж, уул овоогоо шүтдэг. Шилдэг  үйлдвэрийн ажилчин  бусдаас өөр,  манай үйлдвэрийнхэн  аль ч уурхайд очсон биеэ даан ажиллах чадвартай гээд л омогших. Батбаяр, Хүрэлтөмөр, Базарваань, Гүрдагва, Ө.Даваа нарын үе тэнгийн залуустайгаа өрмийн нэгдүгээр бригадад  ажиллаж явснаа дурсаад, тэд маань одоо туршлагатай шилдгүүд болсон гэв.  Тэр  Батзориг, Борхүү,  Ганболор, Эрдэнэ-Очир гэх 4 шавьтай. Борхүү их сургууль төгсөн, мастераар дэвшин ажиллаж байгаа, отгон шавь  Эрдэнэ-Очир нь  өрмийн машинчийн 5-р зэрэгтэй, одоо багшийнхаа туслахаар  ажилладаг аж.   


     А.Дамдиндорж үйлдвэрийн  маань аль ч үеийн удирдлагууд баялаг бүтээж буй ажилчдаа гадаадын ижил төстэй үйлдвэртэй танилцуулдаггүйд  сэтгэл жаахан дундуур явдгаа нуусангүй. Цаашид залуусыг явуулж, юм үзүүлж,  нүдийг нь нээгээсэй гэж хүсдэгээ ч хэлэв.
     А.Дамдиндорж  өөрийнхөө ажил мэргэжлийг уурхайн зүрх  судас нь гэж тодорхойлсон юм.  СБШ-250 МН маркийн аварга машинаар уулын  цул өрөмдөж, тэсэлгээнд бэлтгэх түүний ажил үнэхээр л уурхайн анхны дамжлага төдийгүй зүрх судас нь бололтой. Өрмийн машинчийн доргион чичиргээ, тоос шороо, дуу чимээ ихтэй амаргүй хөдөлмөрт А.Дамдиндорж 30 жил зүтгэхдээ нэг ч удаа эмчийн магадлагаа авч ажлаас чөлөөлөгдөж үзээгүй хүн.  Эрүүл мэндийн замын нээлтийн үеэр “Эрдэнэт” үйлдвэрт олон жил үр бүтээлтэй ажиллаж, өөрийн эрүүл мэнддээ онцгой анхаарч ирсэн 4 хүнийг шалгаруулан унадаг дугуйгаар урамшуулсны нэг нь манай хөргийн эзэн. Түүнээс  эрүүл, эрч хүчтэй байдгийн нууцыг асуухад “ажил амралтаа зөв зохицуулах” гэж товчхон хариулав. А.Дамдиндорж  50 гарсан ч тун шаламгай хөдөлгөөнтэй хүн юм. Хөдөлгөөн, эрүүл агаар хоёрыг  чухалчилдаг бололтой. Долоо хоног бүр зааланд тогтмол очиж сагс, волейбол тоглодог гээд залуудаа  ханиад хүрмэгц, наадмын талбайг гурав тойроод гүйчихэд л  зүгээр болчихно шүү дээ гээд  хүд хүд инээх.
     А.Дамдиндоржийнх 2 хүү, нэг охинтой. Эхнэр О.Оюунчимэг нь Завхан аймгийн Идэр сумын уугуул.  10-р цэцэрлэгт ажилладаг. Том хүү нь БНХАУ-ын  Шиньяаны Их сургуулийг  олон улсын худалдааны мэргэжлээр  төгссөн. Улаанбаатар хотод  Хятадын  хөрөнгө оруулалттай компанид ажилладаг. Бага хүү нь  Геологийн инженерийн сургуулийг ирэх хавар төгсөнө. Охин нь 1-р сургуулийн 10-р ангид суралцдаг.  Хэдхэн  хоногийн өмнө анхны ач хүү нь хорвоод мэндлэн, удам залгах  нуган ачтай болсон тэрбээр баяр  хөөртэй явна. А.Дамдиндоржийн ижий 80 шахсан буурай 9 хүүхэд, ач, зээ, ачинцар, зээнцрийнхээ сайн сайхан явааг харж, насны жаргал эдлэн сууна.
     А.Дамдиндоржийн 2 хүү  тун ч спортлог. Том хүү нь боксын спортын нэгдүгээр зэрэгтэй, Залуучуудын улсын аваргын хүрэл медальтай, Хангарьд спорт клубийн тамирчин явж.  Эрдмийн мөр хөөж, их спортоос алсарсанд аав нь жаахан харамсдаг гэсэн.  Бага хүү нь сагсан бөмбөгийн спортын нэгдүгээр зэрэгтэй. Орхон аймгийн Өсвөр үеийн шигшээ багийн тамирчин байж. Хүүхдүүддээ урлаг, спортоор хичээллэ, өөрийгөө тал бүрээр хөгжүүл гэж сургаж иржээ. Тэрээр  2002 оны “Эрдэнэт” үйлдвэрийн хөдөлмөрийн аварга. Монгол улсын Тэргүүний уурхайчин цол тэмдэгтэй.
     Нутаг усандаа ажилч хичээнгүйгээрээ  алдартай  аав, ээжийнхээ аливаад чин сэтгэлээсээ  хандаж, шударга хөдөлмөрлөөрэй гэсэн  захиасыг дагаж, залуус, үр хүүхэддээ үлгэрлэсээр явна.


Я.ЭНХ

Оюунлаг засварчин

24 11-р сар 2014 Нийтэлсэн

     Улаанбаатар хотод хоёрхон  байсан тооны сонгоны ангитай  сургуулийн нэг  48-р сургуулийн сурагч байхдаа улсын математикийн олимпиадад дээгүүр “давхисан”  П.Уртнасан  хүүхэд байхаасаа тооны ухаанд шимтэн, тэр чиглэлээр л явах мөрөөдөлтэй байж.  Ингээд 1984 онд  уралдаант шалгалтын оноогоороо эхэнд шахуу орсон  болохоор  хүсэж мөрөөдсөн МУИС-ийн математикийн  анги нь байсан ч, гадаадад суралцах “моод”-ыг дагаад ч тэр үү,   тухайн үеийн ЗХУ-ын Беларусс улсын нийслэл Минск хотод үйлдвэрийн тоног төхөөрөмжийн зохион бүтээгч инженер мэргэжлийг сонгожээ. Сургууль нь шугам зураг, тоо бодлого гээд л  хэрийн оюутанд хүнддэхээр даалгавраар  шахах. П.Уртнасан түүнд  түүртсэнгүй, бүр зарим  оюутны шугам зургийг  зурж өгдөг байж.  Оюутны он жилүүд урсан өнгөрч,  сургуулиа  төгсөөд, Улаанбаатар хотын  Байшин үйлдвэрлэх комбинатад тоног төхөөрөмжийн засварчнаас механикаар хүртэл ажиллажээ.  1995 онд Эрдэнэтэд ирж ЗМЗ-дад ажиллаж байгаад,  2000 оноос Баяжуулах фабрикийн Засварын хэсэгт засварчнаар орсноос  хойш өдгөө 14 дэх жилдээ ажиллаж байгаа аж. Хүний амьдралын  өгсөж, урууддаг  жам түүнийг тойрсонгүй. Бор  дарсанд хөлчүүрхэж явсан үе ч байж. Гэлээ ч ухаант хүний ёсоор ухаарч сэхээрснээр  өргөн  мэдлэг, шинийг сэдэж сэтгэх инженерийн ухаанаа гээсэнгүй. Баяжуулах фабрикийн Бүтээмж чанарын дугуйлангуудын төслийн уралдаанд түүний санаачилсан хэд хэдэн төсөл  тэргүүн байр эзэлжээ. Түүний төсөл бусдаас нэг л ондоо. Тооцоолол, үндэслэл, техникийн зураг, томъёоллоос  авахуулаад ашигласан материал  нь ч орос хэл дээрх техникийн номууд байх.  Өөрөөр хэлбэл шинжлэх ухааны үндэслэлтэй, мэргэжлийн түвшинд боловсруулсан  төслүүд  учраас хэрэгжих боломж сайтай байдаг бололтой. Тэр зав л гарвал Технологийн сургуулийн номын санд сууж,  хуучны болон орчин үеийн мэргэжлийн ном уншина.  Тус  сургуульд хэдэн жилийн өмнө онолын механикийн цагийн багшаар ажиллаж байж. Тэр: “Засварчнаар ажиллаад муудсан юм алга. Өөрөө гардан ажилладаг болохоор  хөдөлмөр хялбарчлах, ажиллагааг нь сайжруулах  тал дээр хийх зүйл их гардаг гэв. П.Уртнасан саяхан импорт орлох механик  түлхүүр зохион бүтээжээ. Үүнийг Ерөнхий сайд “Эрдэнэт” үйлдвэртэй танилцах үеэрээ ихээхэн сайшаажээ. Түүнтэй энэ төслийнх нь талаар ярилцсан юм.


   -Энэ  түлхүүрийг  бүтээх болсон шалтгаан юу байв?
   -Тээрмийн торцийг солих, мөн тээрмийн редукторын суурийн боолт гайкийг чангалах, суллахад гар ажиллагаа ихээхэн ордог нь хүндрэлтэй байдаг. Зарим гайкийг 20 кг лантуугаар цохиж суллаж чангалдаг. Гадаадаас захиалан оруулж ирсэн хийн түлхүүр нь боолт гайкнаас 20 мм илүү гарсан тохиолдолд хэрэглэх боломжгүй байдаг. Гэтэл засвар үйлчилгээ хийх үед  боолт нь гайкны толгойноос 100 мм-200 мм илүү гарах тохиолдол олон байдаг. Иймээс тээрмийн засвар дээр хуяг угсрах үеийн боолт гайкийг чангалж суллахад гар ажиллагааг хөнгөвчлөх, эрсдэлийг бууруулах зорилгоор  энэ механик түлхүүрийг зохион бүтээсэн.  
   -Механик түлхүүрийг хаана хэрэглэх боломжтой вэ?
   -Уул уурхайн үйлдвэрүүд бүх төрлийн хүнд машин механизм, тоног төхөөрөмжийн засварын газар, авто засварын сервисүүдэд ашиглаж болно.
     “Эрдэнэт” үйлдвэрт :
         -Тээрмийн хуяг солиход
         -Тээрмийн редукторын цууралт солиход
         -Бутлуурын засварын үед
         -Бусад цех нэгж тухайлбал, Хүдрийн ил уурхай, Авто тээврийн байгууллагын засварын ажлын үед ашиглах боломжтой.
   -“Засварын ажлыг хөнгөвчлөх түлхүүр” төслийг хэрэгжүүлсний ач холбогдол юу вэ?
    -Импорт орлох боломжтой. Энэ бүтээгдэхүүнтэй ижил төстэй импортын түлхүүрүүд нь өндөр өртөгтэйн дээр засварын ажилд тэр бүр нийцдэггүй дутагдалтай байдаг.
    -Засварын үеийн гар ажиллагааг хөнгөвчилж хугацаа хэмнэнэ. Засварын ажлын үед 2-3 засварчин хийх ажлыг дээрх түлхүүрийг тохируулан тавьснаар 1 хүн хийх боломжтой.  
   -Гар ажиллагааг механикжуулснаар гарч болох эрсдэлүүдээс урьдчилан сэргийлнэ.
   -Хэрэглэх боломж ихээхэн өндөр. Тээрмийн хуяг солих үед 65-ээс дээш толгойтой гайкны боолт тодорхой нэг стандартгүй гайкнаас дээш 100-200 мм хооронд илүү гардаг. Энэ тохиолдолд механик түлхүүрийг ашиглахад тохиромжтой. Ялангуяа торцийн хуяг тавих үед гарын эсрэг талд боолт чангалахад хөдөлмөр  хөнгөвчилнө.
    -Энэ түлхүүрийн өртгийг  гадаадын ижил төстэй бүтээгдэхүүний  үнэтэй харьцуулбал?
    -Тус механик түлхүүрийг  Засвар механикийн заводад захиалан хийж байгаа бөгөөд нэг ширхэг  түлхүүрийн өөрийг өртөг нь 452 285 төгрөгөөр гарсан. Импортоор авдаг бүтээгдэхүүний үнэ 5000$ орчим байдаг гэсэн.
    -Энэ төслийн цаашдын зорилт юу вэ?
    -Механик түлхүүрийн зохиогчийн эрхийг баталгаажуулах юмсан гэсэн бодолтой. Энэ түлхүүрийг үйлдвэрлэж, зах зээлд нэвтрүүлбэл манай үйлдвэрт ч эдийн засгийн ач холбогдолтой юм.

     Миний бие үйлдвэрийн хөдөлмөрийн аварга А.Ганхуягийг эхээс мэндлэхийг мэдэхгүй ч “Эрдэнэт” үйлдвэрийн “Хангарьд” клубт ажилласан он цагийг нь мэдэх юм. Тэр зөвхөн төрөлх үйлдвэртээ 30 жил өөрийн хүч хөдөлмөрөө зориулсан хүн. Тэгэхдээ тээрмийн машинчаар 10 жил ажиллаж, баялаг бүтээлцэж явсан нэгэн. Түүний аав үйлдвэрийн анхдагч, рашаан сувиллын хэмээн нэршсэн Авирмэд агсан. Ээж нь Эмнэлэг сувилал, Спорт ордонд бага эмчээр ажиллаж явсан Ичинхорлоо гуай юмсанж. Харин аав нь Завхан аймгийн Шилүүстэй сумынх.  Завханы Отгон, Өвөрхангайн Хужирт, Эрдэнэтийн амралтын баазыг үүсгэн байгуулалцсан болохоор түү-ний аавыг хүмүүс их таньдаг. Завханых, Өвөрхангайнх, Эрдэнэтийнх гэж ярих аж. Харин А.Ганхуяг ахайтан Өвөрхангайн Хужиртад төржээ. Өөрийгөө Эрдэнэтэд 6-р ангидаа ирсэн хэмээн тодотгосон.  Энэ хөргийн эзэн А.Ганхуяг жу-до бөхийн нэгдүгээр зэргийн тамирчин гэж байгаа. Улсын аваргын мөнгө, хүрэл медальтай. 74 килограммын жинд барилддаг тамирчин явсан аж. МУГДасгалжуулагч, багш Шаравын Бат-Оршихын унаган шавийн нэг. Аймгийн арслан Даваасүрэн, аймгийн начин Нэргүй, Батхуяг нартай нэгэн үед хамт бэлтгэл сургуулилт  хийж явжээ. 1984 -1995 онд  Баяжуулах фабрикт  тээрмийн машинч, 1995 оноос “Эрдэнэт” үйлдвэрийн “Хангарьд” спорт клубт хлораторын засварчнаар өнөөг хүртэл ажиллаж байна. Хуягаа ах спорт цогцолборт дулааны тоолуур тавих ажилд мэргэжлийн зүгээс санаачилга гарган,  сантехникийн сүлжээг оновчтой болгон өөрчлөх, дулааны тоолуур тавих ажлыг гардан хийсэн. Спорт ордны барилгын зүүн жигүүрийн хэрэгцээний халуун ус сантехникийн  шугамын их засварын дараа халахгүй болсныг сүлжээнд өөрчлөлт хийж, насос тавьснаар хэрэгцээний халуун усыг горимын дагуу халаажээ. Мөн Спорт цогцолборын халуун хүйтэн усны бүх шугам хоолойг солих их засварын ажилд чадварлаг оролцож, бүх ажлыг чанартай хийснээр  шугам хоолойн цооролт болон бусад гэмтэл гарахгүй болж. Бага танхимын суултын засварын явцад хаагдсан агааржуулалтын шугам хоолойг чөлөөлөх, дүүжин таазаар хаагдсан хэсгийн хоолойг сунгах, агааржуулалтын системийн механик урсгалыг нэмэгдүүлэх санаачилга гарган хэрэгжүүлснээр эрчим хүч хэмнэх нөхцөл бүрдэв.  Үүний үр дүнд тус байгууллага дулаан эрчим хүчийг 60 хувь хэмнэсэн байна.  Энэ мэтчилэн тэрбээр “Хангарьд” паласын цахилгаан, ус дулааныг цогцоор нь хариуцан ажиллана. Хаана ямар ажил хийхээр байна тэнд л А.Ганхуяг дуудагдана.

Жинхэнэ Хангарьдын “торгон цэрэг”. “Хангарьд” клубт түүнийг олон хүн Хуягаа ах хэмээн хүндлэх. 20 жил спорт ордонд ажиллахдаа сантехникийн шугам хоолойн хаана нь юу хийхээ бүрэн мэдэх болсон түүний гүйцэтгэсэн ажлыг тоймлон дурдвал:
   - “Хангарьд” палас болон заал танхимын агаар сэлгэх люкийг автоматаар онгойлгох болсноор танхимын агааржуулалтын системийн ажиллах хугацааг багасган  уг системийн  эрчим хүчний зарцуулалтыг 25 хувиар бууруулав. Дулааны шугам, халаалтын системийн битүүмжлэлийг найдвартай хийжээ.
   - Дулааны эрчим хүчээр  агаарыг халаах зарчмаар ажилладаг  агааржуулалтын систе-мийн хэвийн ажиллагааг хангах засвар үйлчилгээг төлөвлөсөн графикийн дагуу цаг тухайд нь чанартай хийснээр үзэгчдийн ая тухтай байдлыг ханган ажиллаж байна.
   - Халаалтанд зарцуулах дулааны эрчим хүчийг хэмнэх, үр ашигтай зарцуулах, хэвийн ажиллагааг ханган ажиллахад тогтмол санаачилга гарган ажиллаж ирэв.
   - Шугам хоолойд зэврэлт үүсгэхгүйн тулд суваг болон агааржуулалтын  камерт агаарын чийглэгийг аль болох бага байлгах, агааржуулалтын хоолой болон ус зайлуулах дренажийн системийн хэвийн ажиллагааг хангах үзлэг шалгалтыг тогтмол хийж, хэвшснээр үр дүнтэй ажил болж, сэлбэг материалын хэмнэлт гаргав.
   - Дулааны станц тооцооноос илүү дулаан  өгч, эрчим хүчний илүүдэл, үргүй зарцуулалт бий болгох учир энэ байдалд анхааран ажиллаж, гадна агаарын температурт тохируулан ажиллах горим барьж ажилласнаар эрчим хүч хэмнэх нөхцөл бүрдэв.
   - Хлораторын тоног төхөөрөмж, насосны үйл ажиллагааг хэвийн хэмжээнд байлгаж, засвар үйлчилгээг тогтмол хийснээр усан бассейныг тасалдалгүй ажиллах нөхцөлөөр  хангав.
   - Спорт цогцолборын усан бассейны тасралтгүй хэвийн ажиллагааг хангах тоног төхөөрөмж, дамжуулах хоолой, цэвэршүүлэх хэрэгслийн засвар үйлчилгээг тогтмол хийж,  2007 онд Хлораторийн шинэ төхөөрөмжийг суурилуулах, агааржуулалтын системийг шинээр монтажлах ажлыг бие даан гүйцэтгэсэн байна. Энэ том ордны халуун хүйтнийг тохируулах их хариуцлагатай ажил. Аль нэг газраараа халуун алдвал  бөөн асуудал үүснэ гэж тэр хэлсэн. Тэрээр  Эрдэнэт үйлдвэр ХХК-д тасралтгүй  29  жил ажиллахдаа Спорт ордны дулаан хангамж, сантехникийн тоног төхөөрөмж, агааржуулалтын систем, ус хангамж  зэргийн засвар үйлчилгээг хариуцан, спорт ордны хэвийн ажиллагааг хангаж, хөдөлмөр хамгаалал аюулгүй ажиллагааны  зөрчилгүй, техникийн саатал гаргахгүйгээр ажиллаж иржээ. А.Ганхуяг  өөрийн эзэмшсэн мэргэжлээрээ хоёр ажилтныг дагалдуулан сургаж, ажилд нь мэргэшүүлсэн байна. Тэрбээр МЗХ-ны “Хөдөлмөрийн алдар” медаль, Ардын хувьсгалын 80 жилийн болон Эрдэнэт үйлдвэр ХХК-ийн 30 жилийн ойн медаль, Спорт цогцолборын  2004, 2007 оны  “Хөдөлмөрийн аварга” ажилтан юм. Мөн аймгийн Засаг даргын нэрэмжит “Хүндэт жуух”, Орхон аймгийн “Хүндэт тэмдэг”-ээр шагнагджээ. Түүний хариуцдаг усан сан 8000 М3-ын багтаамжтай. 50 цистерн машин ус орно гээд бод. Агуу сонсогдож байгаа биз.  Манайх сантехникийн урсгал засварыг чанартай хийсэн. Халуун хүйтэн усны шугам хоолойг бүрэн шинэчилсэн гэж тэр ярьсан. Мөн гагнуур хийж токарийн машин дээр ажиллана. Цахилгаан, мужааныхаа ажлыг ч хийнэ. Төрд хэрэгтэй зайран гэгчээр “Хангарьд”-д хэрэгтэй хүн нь А.Ганхуяг. Засвараа хийнэ. Нэгэн уран сайхны кинонд олон курс төгссөн Сэмбээ гээд нэг өвгөн гардаг даа. Яг түүн шиг курс бүхэнд сууж олон үнэмлэх өвөртлөөгүй ч хувь хүнийхээ хичээл зүтгэлээр энэ олон мэргэжлийн ажлыг амьдрал дээр сурчээ. Бусад нь түүнээс зөвлөгөө авна. Хийж чадахгүй ажилдаа тусламж хүснэ. Яаж хийхээ асууж лавлана. Тэр бүхэнд хариу өгөх жишээтэй. Хангарьд палас, спорт ордны цахилгаан дулаан, сантехникийн шугам хоолойн хаана нь юу хэрэгтэйг гарын арван хуруу шигээ мэднэ. Тэр  Отгончулуун гэж ганц эрэгтэй дүүтэй. “Эрдэнэт” үйлдвэрийн механикийн хэлтэст ажилладаг. Түүнээс ажилчид нь хувийн журмаар  юм хийж өгөөч хэмээн гуйна. Тэр бүхнийг нь цаг заваа харж байгаад амжуулдаг гэнэ. Манай ээлжээс олон гавьяат төрсөн. Х.Рагчаа, Ерэнпил, Төрбат нарын томчууд. Сайд Санжмятав хүртэл манай  ээлжээс төрөн гарсан  гэж бахархав. Тэр үед бид нэлээн хүнд нөхцөлд ажиллаж байлаа. Одоо ажил их хөнгөрсөн байна. Бид байнга орчны цэвэрлэгээ хийнэ. Хүрз барьсан хөлсөө гоожуулсан нөхөд  даралттай усаар орчноо цэвэрлэж явлаа даа. Одоо үйлдвэр рүү орохоор нэг л сайхан танил орчин угтдаг. Манай ээлжийн даргаар, одоо Баяжуулах фабрикийн дарга Р.Дэлгэр ажиллаж байлаа гэж өнгөрсөн цаг хугацааг дурсаад авлаа. Гэр бүлийнхээ талаар танилцуулахдаа гэргий  Дүгэрхүүгийн Тунгалаг Эмнэлэг сувиллын ажилтан. Манайх хоёр охин, нэг бандитай. Бүгд боловсрол эзэмшсэн. Би үр хүүхэддээ улс эх орондоо үнэнч хөдөлмөрлө гэж захидаг. Хүүхдэд улиг болтол нь залхсан үг хэлдэггүй. Би ажил хөдөлмөрөөр л үлгэрлэхийг боддог гэж ярилаа.

Тэсэлгээчин Ц.БЯМБАДОРЖ

24 11-р сар 2014 Нийтэлсэн

     Энэ удаагийн Аваргууд буландаа Хүдрийн ил уурхайн Өрөмдлөг тэсэлгээний хэсгийн тэсэлгээчин Цэдэн-Ишийн Бямбадоржийг онцолж байна. Тэрээр 1960 онд Ховд аймгийн Дуут суманд эгэл малчин айлын хоймор эзэгнэн төрсөн. Том хүүгийн эрх ямба, үүрэг хариуцлага бүхнийг дааж ирсэн Ц.Бямбадорж араасаа найман дүү дагуулжээ. Ганц эгч нь боловсрол, соёлын салбарт насаараа ажилласан буурай эдүгээ Дархан-Уул аймагт бий. Олуулаа бужигнаж өссөн түүнд хамт олонч, нийтэч зан юу юунаас илүү төлөвшсөн. Ховор инээдтэй, дуу цөөнтэй түүнээс дүү нар нь төдийгүй шавь нар нь эмээнэ. Харин аль хэдийн эрийн цээнд хүрсэн, эхнэр болсон хүүхдүүдээ хараад өөрөөсөө илүү хайрлаж зөөлөрнө. Ц.Бямбадорж нутгийнхаа Хонгор, Жинст уулаар хонь хариулж, Эвтийн рашаанаас ундаалж, Хар ус нуурын усанд өдөржин шумбан тоглож явсан хүүхэд насаа дурсахдаа дуртай. Аавынхаа хурдан бор морийг наадамд унаж уралдахдаа айраг алддаггүй байсан тухайгаа ярихдаа нүд нь сэргэж, дуу нь чангарна. Хурдан бор мориных нь удам угшил одоо ч тасраагүй, Ховд аймгийн алдарт уяач дүүгийнх нь адууны сор болон нутагтаа уралдсаар...
     Тэрээр ээлжийн амралтаараа нутагтаа очиж сэтгэлээ сэргээнэ, багадаа тоглож явсан буйраа эргэнэ, ах, дүү нартайгаа золгоно. Түүнээс гадна эх орныхоо үзэсгэлэнт байгалиар аялах, рашаан сувилалд амрах сонирхолтой. Ингэж л бүтэн жилийн эрч, хүч, энергээ хуримтлуулаад ажилдаа шамдана.      


     Ц.Бямбадорж сумандаа 8 жилийн сургууль дүүргэсэн. Тэрээр 17 настай хүүхэд байхдаа Дуут сумынхаа 20 жилийн ойн наадамд зодогложээ. Аав, ээжийн бөхийн удмыг залгахаар том биетэй мань эр нутагтаа нэр алдартай олон сайн бөхийг өвдөг шороодуулан давж түрүүлэн Сумын заан цол хүртсэн нь амьдралынх нь гэгээн дурсамжийн нэг. Сумын шинэхэн заан цэргийн албанд түвэггүй тэнцэж Улаанбаатар хотын Барилгын цэргийн 130 дугаар ангид хуваарилагджээ. Гэсэн ч хугацаат цэргийн албаны сүүлийн хоёр жилийг Эрдэнэт хотын Барилгын цэргийн 110 дугаар ангид ахлах түрүүч цолтой хаасан байна. Сахилгагүй хүүхэд сэргэлэн цэрэг болж ангийн ахлагч, жагсаалын дарга, офицеруудынхаа итгэлийг хүлээснээр тус цэргийн ангид улиран ажиллах урилга гарджээ. Ц.Бямбадорж 1978-1991 он хүртэл алба хаасан цэргийн ангидаа ахлагч, хөнгөн машины засварчнаар ажилласан. Тэрээр Хүдрийн ил уурхайд тэсэлгээчнээр ажиллаж байгаад “хувьд гарсан” Давааням, Даваажав гэх ихэр найзтай. 1991 оны намар ихэр найз нь “Манайд ажлын байрны орон тоо гарлаа. Чи очиж уулзаач” гэж хэлснээр дэлхийн шилдэг аж ахуйн нэгж “Эрдэнэт” үйлдвэртэй хувь заяагаа холбох замын эхлэл тавигджээ. Хоёр жил Тэсрэх бодисын үйлдвэрт ачигчаар ажиллаад, сургалтын төвийн курс дүүргэж мэргэжлийн тэсэлгээчин болсон. Тэр цагаас хойш Ц.Бямбадорж эдүгээ 23 жил уул тэсэлж, улс орны эдийн засагт хувь нэмрээ оруулсаар явна. Тэрээр Булган хангай нутгийн өгөөж, Эрдэнэтийн овоо ордын хишиг буяныг хүртэж яваагаа азтайд тооцон сэтгэлдээ сүсэглэн идээний дээжээ өргөн залбирна. Энэ сайхан баян хангайг тэслэхдээ сэтгэл нь эмзэглэх ч “Монгол улсыг тэжээж буй дэлхийн тэргүүлэгч үйлдвэрийн нэгэн чухал ажилтан нь би юм шүү. Энэ бол миний ажил, бусдын төлөө хийж буй буянтай үйл” хэмээн өөрийгөө зоригжуулан тайвшруулж ажилладаг гэнэ. Баасан гараг бүр тохиох энэхүү нүсэр ажлыг ил уурхайн 15 тэсэлгээчин хамтын хөдөлмөрөөр гүйцэтгэдэг. Долоо хоногийн эхний өдрөөс бэлтгэл хангана. Тэсрэх бодисын үйлдвэрээс шингэн болон хуурай тэсрэх бодис БелАЗ-аар зөөн авчирч цооногуудыг цэнэглэнэ.
     Ц.Бямбадорж усанд тэсвэртэй эмульсийн тэсрэх бодисыг ашиглах, тэсэлгээний цэнэглэгч СЗМ-15 машиныг шинээр ашиглалтанд оруулах, Нонел системийн тэслэх хэрэгслийг Швед, Орос, Хятадын мэргэжилтнүүдтэй хамтран туршиж үйлдвэрлэлд нэвтрүүлэхэд олон жилийн туршлага, мэргэжлийн ур чадвараараа хамт олноо хошуучлан ажилласан. Ингэснээр цооног ба сүлжээний холболтын шуурхай, найдвартай ажиллагааг хангахын зэрэгцээ тэсрэлтээр үүсэх чичирхийллийн үйлчилгээг багасгах, тэсрэх бодисын энергийг бутлалтанд бүрэн ашиглах боломжийг бүрдүүлсэн юм. Тэрээр сүүлийн 5 жил дотоод тээврийн тэсрэх материал түгээх машин дээр ажиллахдаа төлөвлөгөөт даалгаврыг 102-105 хувь биелүүлж, жилд дунджаар 22 тонн тэсрэх хэрэгсэл, 400 тонн энгийн тэсрэх бодисоор 8700 хөлдүүс цооног цэнэглэх ажлыг цаг хугацаанд нь аюул осолгүй, чанартай гүйцэтгэжээ. Мөн цэнэглэлтийн процессийг хөнгөвчлөх, чанаржуулахад шинэ санаа дэвшүүлж үйлдвэрлэлд нэвтрүүлсэн нь үр дүнгээ өгч байна. Тэсэлгээ явагддаг учраас Эрдэнэт зүрх муутай хүнд хатуу газар гэгддэг. Тэгвэл тэрхүү тэсэлгээг гардан гүйцэтгэж буй түүний эрүүл мэндэд бүр халтай санагдана. Гэсэн ч Ц.Бямбадорж нүдний шил, амны хаалтаас эхлээд хөдөлмөр хамгааллын бүх хэрэгслээ зүүсэн байхад алзахгүй ээ гэх. Тэр үүрэгт ажлаа гүйцэтгэхдээ хамт олондоо үлгэр дуурайлал үзүүлэн хөдөлмөрийн аюулгүй байдал, эрүүл ахуйн хууль, дүрэм, журмыг мөрдлөг болгон, шинэхэн тэсэлгээчин Э.Самбуу, Б.Батбилэг, Б.Баасан нарыг дагалдуулан ажлын дадлага туршлага, аюулгүй ажиллагааны арга барилыг заан сургаж бие даан ажиллах чадварыг эзэмшүүлж байна.
     Ц.Бямбадорж “Би гавьяаны амралтандаа гарвал морь, бөх ярьсан жинхэнэ монгол өвгөн болно доо” гэх. Цагийн эрхээр энэ үе ирэх нь тодорхой. Тэр цагт хийх ажил, хэлэх үг, үйлдлээ мэдэж байна гэдэг бодолтой хүний шинж. Түүний эхнэр Булган аймгийн Тэшиг  сумын  харьяат ажилсаг буриад эмэгтэй бий. Хаяанд буй хадмын нутагтаа тэр байсхийгээд үдлэх дуртай. Эднийх чандмань адил гурван сайхан хүүхэдтэй айл. Голомт залгах ганц хүү нь Хүдрийн ил уурхайн Засварын хэсгийн гагнуурчин. Уурхайчны удмыг ч залгаж явна. Харин хоёр охин нь уул уурхайн мэргэжил эзэмшсэн ч одоохондоо гэргий заяа түшин түүнд дөрвөн хөөрхөн зээ төрүүлээд асарч байна.
     Уулын цул тэслэх өндөр хариуцлагатай ажил гүйцэтгэсэн амжилтаараа 2009, 2013 онд Хүдрийн ил уурхайн “Ажил мэргэжлийн аварга”-аар шалгарч байсан Ц.Бямбадорж могой жилд Эрдэнэт үйлдвэр ХХК-ийн Хөдөлмөрийн аваргаар тодорсон нь олон хүнийг баярлуулсан. Тэрээр “Хамт олон гэдэг нэгэн гэр бүл” хэмээн онцолсон. “Хүдрийн ил уурхай” гэх өнөр гэр бүлийн нэгэн хүндтэй гишүүн, үлгэрлэн дуурайх ажилтан нь яах аргагүй Хөдөлмөрийн аварга Ц.Бямбадорж юм.