• “ХАБЭА ба ажилтны оролцоо-2020” бага хурал боллоо

        “Эрдэнэт үйлдвэр” ТӨҮГ-ын ХАБЭА-н зөвлөл, ХАБЭА-н хэлтсээс хамтран зохион байгуулсан “ХАБЭА ба ажилтны оролцоо 2020” бага хурлыг энэ сарын 15-нд Соёл, урлагийн цогцолборын их танхимд зохион байгууллаа. Цех, нэгжийн төлөөлөл бүхий 450-иад ажилтан оролцсон тус хурал нь хөдөлмөрийн аюулгүй байдал, эрүүл ахуйн чиглэлээр хийж хэрэгжүүлсэн оны ажлаа дүгнэх, ажиллагчдынхаа санал бодлыг сонсох, цаашид хийж хэрэгжүүлэх ажлаа тодорхойлоход чиглэснээрээ онцлогтой. Энэ удаагийн ээлжит бага хуралд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, Үйлдвэрийн бодлогын газрын дарга П.Батболор, Гадаад харилцааны бодлогын газрын дарга Г.Тэнгэр, Захиргаа, хүний нөөцийн бодлогын газрын орлогч дарга Н.Энхболд, ХАБЭА-н хэлтсийн орлогч дарга Б.Баттайван тэргүүтэй бүтцийн нэгжийн холбогдох мэргэжилтнүүд, Орхон аймгийн Мэргэжлийн хяналтын газрын Хөдөлмөр хамгааллын байцаагч нар оролцлоо.     Эрдэнэт үйлдвэр 1978-1998 онд хөдөлмөрийн аюулгүй байдал, эрүүл ахуйн стандартгүй байсан бол 1998-2007 онд Хөдөлмөр хамгааллын удирдлагын систем, 2007-2018 онд Олон улсын чанарын удирдлагын тогтолцооны OHSAS 18001:2007 стандартыг тус тус нэвтрүүлж, 2020 онд ISO 45001:2018 стандартыг хэрэгжүүлэхээр зорин ажиллаж байна. Бага хурлын үеэр ХАБЭА-н хэлтсийн удирдлагууд 2019 онд хийж хэрэгжүүлсэн ажлаа нэгтгэн танилцуулж, холбогдох мэргэжилтнүүд сонирхолтой илтгэл тавьсан юм. Өнгөрсөн онд тус хэлтэс ХАБЭА-н дүрэм журмыг шинэчлэн боловсруулах ажлын хүрээнд 22 журмыг хянан шинэчилж, ажилтны манлайлал, оролцоог нэмэгдүүлснээр 5527 ажилтан бүтээлч санаачилга гарган ажилласан байна. “Мэдээллийн хаалгач” аппликейшны хэрэглээг хэвшүүлснээр ажлын байран дахь зөрчлийн талаар тухай бүрд мэдээлэл хүлээн авч, ажилчдын оролцоотой 140 орчим аюул ослыг илрүүлэн ажиллажээ. Түүнчлэн үйлдвэрийн газрын ХАБЭА-н ажилтнуудын мэргэжил, ур чадварын түвшин тогтоох шалгалтыг 2019 онд амжилттай зохион байгуулж, 122 удаагийн сургалтаар давхардсан тоогоор 9050 ажилтныг хамруулсан байна. Аврах ажиллагааны “Алтан бамбай 2019”, “Safety first” тэмцээнийг жил тутам зохион байгуулснаар үйлдвэрийн ажиллагсдыг идэвхжүүлж, оролцоог нэмэгдүүлэхэд түлхэц өгч байгаа талаар тайлан мэдээлэлд онцоллоо.     Эрдэнэт үйлдвэрийн ХАБЭА-н хэлтэс эдүгээ тусгай үүрэг чиглэл бүхий 3 албатай үйл ажиллагаа явуулж байна. Уурхайчдад хөдөлмөрийн аюулгүй байдлын хууль, дүрэм, журмыг таниулан сурталчлах, үйлдвэрийн найдвартай, тасралтгүй ажиллагааг хангахад мэргэжлийн 80-аад ажилтан мэдлэг, ур чадвараа дайчлан ажилладаг. Бага хурлын үеэр ажилчдыг сэдэлжүүлэхэд томоохон алхам болсон “Өглөөний ХАБ”-ын шилдгүүдийг шагнаж урамшуулан, ажиллагсдын төлөөлөл чөлөөт индэрт санал бодлоо илэрхийллээ. “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн “ХАБ бол бидний нэн тэргүүний ажил. Энэ ажилтай холбоотой хангамжийн асуудал ч нэн тэргүүнд байх ёстой. Эрдэнэт үйлдвэрийн хувьд тулгамдсан асуудал байх ёсгүй тул асуудлаа шуурхай шийдвэрлэж явах болно. Өнөөдөр үйлдвэрийн санхүүгийн байдал бэхжиж, мөнгөний бодлого оновчтой хэрэгжин, аливаа асуудлаа шийдвэрлэхэд санхүүгийн хүндрэл бэрхшээлгүй болсон. Үйлдвэрлэлийг сайн явуулахад гар сэтгэл нийлэн ажиллаж байгаа хэлтсийн хамт олон, ХАБ-ын ажилтнууд та бүхэндээ талархал илэрхийлж, ажлын амжилт хүсье” хэмээн санал бодлоо илэрхийлж, амжилт хүссэнээр бага хурлын үйл ажиллагаа өндөрлөлөө.     Хөдөлмөрийн аюулгүй байдлын дүрэм журмыг сахин биелүүлж, болзошгүй эрсдэлээс урьдчилан сэргийлэхэд уурхайчдыг татан оролцуулах олон ажлыг энэ онд зохион байгуулахаар төлөвлөжээ. И.Чинтогтох Фото: Б.Баттөгс Дэлгэрэнгүй...
  • Улаанбаатар төмөр замынхан Эрдэнэт үйлдвэрийн бүтээмжийн үйл ажиллагаатай танилцлаа

        “Улаанбаатар төмөр зам” Хувь нийлүүлсэн нийгэмлэгийн ажилтнуудын төлөөлөл Эрдэнэт үйлдвэрийн бүтээмжийн үйл ажиллагаатай танилцан, туршлага судалж байна. Тус нийгэмлэгийн Хөдлөх бүрэлдэхүүний засвар, ашиглалт хариуцсан орлогч дарга Х.Амгалан тэргүүтэй 12 хүний бүрэлдэхүүн энэ удаа бүтээмж инновацийн үйл ажиллагаа, хөгжил болон сайн саналын системийн үр дүнгийн талаар хичээл сургалт авлаа.     Эрдэнэт үйлдвэрт бүтээмж инновацийн хөдөлгөөн 2005 оноос эрчимжиж, сайн санал, санаачилга өнөөдрийн байдлаар 32 мянгад хүрээд байгааг мэргэжилтнүүд онцолдог. Энэ нь ажиллагсдын идэвх санаачилга дээшилснийг харуулаад зогсохгүй үйлдвэрлэл эдийн засгийн үр өгөөжид эерэг нөлөө үзүүлснийг ч баталж буй юм.     Тус үйлдвэрийн бүтээмж, инновацийн үйл ажиллагаатай танилцах үеэр “Бид олон газрын бүтээмж, инновацийн сайн туршлагаас судалж, танилцаж байсан. Ажилтнуудынхаа мэдлэг чадварыг сайжруулж, байгууллагынхаа хандлагыг өөрчлөх зорилгоор бусдын сайн туршлага, арга барилаас суралцахыг зорьдог. Үүний ч үр дүнд манай байгууллагын бүтээмж, инновацийн үйл ажиллагаа шинэ тутам боловч зөв ажиллаж байгаа гэж хэлэх байна. Эрдэнэт үйлдвэрт бүтээмж инноваци, сайн саналын систем нь хэдийнээ тогтворжиж, хэвшсэн юм байна. Суралцах, санаа авах зүйл маш их харагдлаа. Хөгжлийн хэлтэс, инновацийн төвийн мэргэжилтнүүд, сургагч багш нарын хичээл, мэдээллүүд өгөөжтэй байна. Цаашид энэ чиглэлээр нягт хамтран ажиллаж, суралцах хэрэгтэй гэсэн санаа төрлөө” гэж Хөдлөх бүрэлдэхүүний засвар, ашиглалт хариуцсан орлогч дарга Х.Амгалан ярилаа. М.Балжинням Фото Б.Баттөгс Дэлгэрэнгүй...
  • Дэлхийн энтэй хүн Шагдарын Отгонбилэг

        Зууны манлай бүтээн байгуулалт Эрдэнэт үйлдвэрийн түүхэн замнал, бахархам хөгжил дэвшилтэй салшгүй холбоотой нэгэн бол Шагдарын Отгонбилэг билээ. Монгол-Оросын хамтарсан уулын баяжуулах Эрдэнэт үйлдвэрийн анхны монгол захирлаар томилогдон ажиллаж байсан төр нийгмийн нэрт зүтгэлтэн Ш.Отгонбилэг агсны улс орон,Эрдэнэт үйлдвэрт оруулсан хувь нэмрийг хойч үеийнхэн мартах учиргүй. Тиймээс ч түүний гэгээн дурсгалыг хүндэтгэн эл өдөр алдар гавьяа, үйл хэргийг  дурсан санах учиртай.      “Эрдэнэт үйлдвэр” ТӨҮГ-ын дэргэдэх Ш.Отгонбилэг агсны нэрэмжит Технологийн сургуулиас түүний төрсөн өдөр буюу жил бүрийн 2 дугаар сарын 1-нийг угтан “Монгол Улсын хөдөлмөрийн баатар Ш.Отгонбилэгийг хэн сайн мэдэх вэ” эссэ бичлэгийн уралдаан зохион байгуулдаг уламжлалтай. Монгол улсын хөдөлмөрийн баатар, техникийн шинжлэх ухааны доктор Ш.Отгонбилэгийн намтар, үйл хэргийг судлах, олон нийтэд түгээн дэлгэрүүлж, сурталчлах, тус сургуулийн үүсэл хөгжилд оруулсан хувь нэмрийг нь тодорхойлж, бахархал болгох зорилготой уг уралдааны шилдэг бүтээлийн дээжээс уншигчдадаа хүргэж байна.     Дэлхийн энтэй хүн Шагдарын Отгонбилэг       Хүний үр сад сайн явахад нутгийн уул толгод нь баярлан өндөлздөг юм гэсэн. Тэгээд л хүний нутаг ус “Төрүүлсэн хүүгээ ” байнга харж нэхэн санадаг байх. Завхан аймгийн Дөрвөлжин  сумын нутагт хоёр буурлын уул гэж хосгүй сайхан хангай бий. “Хойд буурал”-ын ууланд  тэмээний бөх шиг хоёр шовх, элгэн хүрэн байц хадан уулын онь хөтөл дээр туг дарцаг, хадаг яндар намирсан бэсрэг цагаан овоо байдаг. Нутгийнхан Буурлын цагаан овоо гэхээсээ илүү “Сартуулын цагаан овоо” гэнэ.  Энэ л сайхан хайрхнууд нь 1952 оны луу жил нэгэн хүүг өлгийдөн авсан нь тэр нутагт тэнгэрийн хүү мэндэлсэн гэлтэй. Түүний  эцэг нь ардын хувьсгалын анхны партизануудын нэг Хатанбаатар Магсаржавын цэрэг, хожим намын үүрийн анхны дарга, сумандаа удирдах ажил хийж  явсан Гэцэгжавын Шагдар  хэмээх нутаг олондоо хүндтэй нэгэн байлаа. Түүний хань Сайнхувьтын Самбуу гэж малчин удмын  саальчин бүсгүй байв. Тэд хүний орчлонд хувь заяагаа холбосоор  зургаан охин,  хоёр хүү төрүүлж өсгөсний отгон хүү нь энэхүү эсээний баатар Отгонбилэг билээ. Тэр багадаа   өнчрөл хагацал, амьдралын хатууг үзсэн ч, Дөрвөлжин сумын бага сургуулийг онц дүнтэй төгсөн, аавтайгаа   хотын зүг хүлгийн жолоо залжээ. Улсын нийслэлд ирээд төмөр замын  “Хонхор”  өртөөнд суурьшин хэдэн жилийн нүүр үзээд, удалгүй хотын төвд байршин 21-р сургуульд орж, сурлага урлаг спортоор олон аавын хүүгээс онцгойрон, арван жилийн сургуулиа 1970 онд алтан медальтай төгссөн байна. Тэр жилээ  Ангар мөрний зүг,  Эрхүү хотод суралцахаар аяны дөрөө жийв. Авхаалжтай хүү Отгонбилэг аугаа оросын ард түмний амьдрал ахуйг судална, англи  орос хэлийг  ахисан түвшинд сурна, уул уурхайн инженер, улс төрийн эдийн засаг, түүх нийгэм гээд түүний суралцсан эрдэм хязгааргүй байлаа. Сурахын зэрэгцээ  гар бөмбөг, хөл бөмбөг,  хөнгөн атлетикт хүч үзнэ. Аз туршсан тэмцээнд аваргын төлөө өрсөлдөнө.Бидний хэдэн нөхөд ажлын шугамаар  Эрхүүгийн техникийн их сургуультай танилцахаар очиход сургуулийн уул уурхай-маркшейдерийн тэнхимийн хаалган дээр Ш.Отгонбилэгт зориулсан дурсгалын самбар байрлуулсан  нь бидэнд их дотно санагдсан. Тэр үед  агуу удирдагчаар бахархах сэтгэл төрж байв. Баатрын  маань идэр залуу насны амьдрал, хайр дурлал нь Эрхүүгийн тэнгэр дор өрнөжээ. Энд л  эхнэр Туяатайгаа анх танилцаж, энд л эрдэмтэн болох гараагаа тавьсан аж. 1976 онд   оюутан насаа онц дүнтэй үдэж, уул уурхайн инженер- маркшейдерийн улаан диплом өвөртлөн, уул уурхайн яамны удирдлагын мэдэлд очлоо. Уул уурхайн сайд П.Очирбат халуун дотно хүлээн авч, урмын үгээр мялааж   яамны  мэргэжилтнээр  томилжээ.  1978 онд Эрхүүгийн Анагаахын дээд сургуулийг эмзүйч мэргэжлээр дүүргэсэн Дорноговь аймгийн  харьяат Данзандаржаагийн Туяа бүсгүйтэй  амьдралаа холбон тов хийсэн хурим хийв. Эрдмийн мөр хөөсөн энэ  айлын  гишүүн  бүр  ном дагах хувь заяатай хүмүүс гэлтэй. Хүү О.Содбилэг, охин О.Одмаа нар  аав, ээжийнхээ адил номын мөр хөөсөн эрдэмтэй хүмүүс болон өсцгөөсөн.  Угийн  авхаалжтай Отгонбилэг ажил мэргэжилдээ гаршиж,  яамандаа газар, хэлтсийн дарга хийж аспирантурт суралцан, “Эрдэнэтийн орд газрын хүдрийн чанар, агуулгыг дундчилах нь” сэдвээр эрдмийн цол,  докторын зэргийг хамгаалж, Москвагийн Уул Уурхайн Их сургуулийн эрдмийн зөвлөлийнхний талархлыг хүлээлээ.  Судалгааны үр дүн нь уулын ажлын хүндхэн асуудлыг шийдвэрлэж чадсанаараа уул уурхайн шинжлэх ухаанд маш том асуудлыг шийдвэрлэх дөт замыг нээж өгсөн гэж манай эрдэмтэд үнэлдэг.      1989 онд Эрдэнэт үйлдвэрийн захирлаар томилогдоход улс орны эдийн засаг зах зээлд  шилжин хямралд орсон  үе байлаа. Ихэнх үйлдвэрүүд хаалгаа барьсан ийм хүнд үед үйлдвэрийг чадварлаг удирдан зохион байгуулж, хямралыг давж, үйлдвэрлэлийн шинэчлэл хийж, хүдэр олборлолтыг нэмэгдүүлж,  туслах хэсгүүдийг  зохих хэмжээгээр өргөтгөсөн байна. Түүний найзууд нь монголын нэрийг  дэлхийд Эрдэнэт, Отгонбилэг хоёр гаргасан. Энэ хоёроор дэлхий дахин монголыг таньж байгаа гэж ярьдаг нь үнэний хувьтай.  Ш.Отгонбилэгийн гавьяаг төр засаг  үнэлж, 1996 онд Монгол Улсын Хөдөлмөрийн баатар цол олгон, Сүхбаатарын одон,  “Алтан соёмбо” тэмдгээр энгэрийг нь мялаахад баатар маань ачлалт аав ээж хоёроо дурсан санаж, алтан нутгийнхаа  уул усыг санагалзан , уул уурхайн мэргэжилтэй болж, газар шорооныхоо өгөөжийг хүн арддаа   түгээж байгаагийн хаялга гэж жигтэйхэн  баярласан гэдэг.      Эрдэнэтийг боловсон хүчнээр хангах ажил 1976-1986 онд түүний гараар дамжин хэрэгжиж байсан. Ш.Отгонбилэг 1996 оны 11-р сарын 15-нд Технологийн сургуулийг нээж хэлсэн үгэндээ: “Цаашид энэ сургууль сургалт үйлдвэрлэлийг эрдэм шинжилгээ, судалгаа, төслийн ажилтай хослуулсан цогцолбор байх ёстой” хэмээн дурдсаныг онцлон өнөөдөр  сургуулийн хамт олон “Сургалт-Эрдэм шинжилгээ -Үйлдвэрлэл”-ийн таатай орчинг бүрдүүлэх замаар оюуны үйлдвэрлэлээ явуулж  байна. Энэхүү сургуулийг 2001 онд  “Шагдарын Отгонбилэгийн нэрэмжит Технологийн сургууль” болгосон. 2002 онд тус сургуулийг үндэслэгч их хүмүүнд зориулан хүрэл хөшөөг нь үүдэн хойморт нь сүндэрлүүлсэн билээ.  Идэр залуугаасаа эх орныхоо уул уурхайн салбарт зүтгэж,  Эрдэнэт үйлдвэрийг дэлхийн дайтай үйлдвэр болгон удирдан зохион байгуулсан,  улс орныхоо төрийг түшилцэж явсан энэ эрхэм хүн 2001 онд  зуд турханд ядарсан малчин ардад туслахаар ажил үүргээ  гүйцэтгэж яваад Увс аймгийн Малчин сумын нутагт харамсалтайгаар осолдсон. Газрын дээр төрж, тэнгэрийн дор амьдарч байсан тэнгэрлэг сайхан эрхэм хүмүүн тэнгэртээ хальж,  нутгийн сайхан хайрхнууд нь гудайн барааж, түмэн олон эмгэнэн гашууджээ.     Тийм ээ тэр ард түмнээ  эрүүл энх, энх тунх, элбэг хангалуун сайхан амьдралтай байлгах  хүсэл тээсээр хорвоогоос одсон юм. Шилдэг мэргэжилтэн, шаргуу хөдөлмөрч, гарамгай удирдагч, гавшгай бизнесмен, түмэнд нэртэй түүхэнд мөртэй таны  үйл хэрэг үеийн үед дуурсагдах нь гарцаагүй.   Технологийн сургуулийн Номын сангийн эрхлэгч  Д.Цэнд-Аюуш Дэлгэрэнгүй...
  • Эрдэнэт үйлдвэрийнхэн оны эхний 10 хоногт хүдэр олборлолтын төлөвлөгөөг 114 хувиар биелүүлэв

            Шинэ оны эхний сарын 10 хоногийн байдлаар “Эрдэнэт үйлдвэр” ТӨҮГ-ын үйлдвэрлэлийн төлөвлөгөөний биелэлт өндөр үзүүлэлттэй гарлаа. Уурхайчид сарын эхний 10 хоногт 732 мянган метр куб уулын цул гаргаж, төлөвлөгөөг 111 хувиар биелүүлэн ажиллаж байна. Хөрс хуулалтын төлөвлөгөө 107.2 хувиар, хүдэр олборлолтын төлөвлөгөө 114.7 хувиар тус тус биелжээ. Баяжуулагчид энэ хугацаанд 906.56 мянган тонн хүдэр боловсруулсан нь төлөвлөгөөний  биелэлтийг  106.5 хувьд хүргэсэн  байна.       Хүдэр дэх металлын агуулга зэсийнх 95.4 хувь, молибденых 87.9 хувьтай байсан бол зэсийн металл авалтын төлөвлөгөө 100.4 хувь, молибдены металл авалт 107.1 хувиар тус тус биеллээ. Баяжмал дахь металлын агуулга зэсээр 101.2 хувь,  молибденоор 104.3 хувийн гүйцэтгэлтэй гарчээ. Оны эхний 10 хоногт 16002 тонн зэсийн баяжмал, 244.7 тонн молибдены баяжмал ачсан байна. Ачигдсан баяжмалын чанарыг авч үзвэл, зэсийн баяжмал 101.2 хувь, молибдены баяжмал 104.3 хувийн чанарын үзүүлэлттэй гарчээ.   М.Балжинням Фото: Б.Баттөггс Дэлгэрэнгүй...
  • Залуурдагч

        Эрдэнэт үйлдвэрийн 2019 оны Шилдгийн шилдэг ажилтнаар тодорсон Авто тээврийн цехийн Уулын технологийн тээврийн хэсгийн хүнд даацын машины жолооч, сургагч багш Мишиграгчаагийн Болдбаатартай уулзаж ярилцахаар утас цохилоо. Дуу шуу болсон уриалгахан нөхөртэй өдөр уулзахаар цаг товлов. Ээлжийн ажилтай уурхайчид цаг ягштал баримталдаг жишгээр “болзоо”-ндоо минут ч хоцорсонгүй. Инээд алдсан, дулаан төрхтэй энэ эр уулыг нүүлгэх ажилдаа маргааш гарна гэнэ. Бидний уулзалт Говь-Алтай аймгийн тухай яриагаар эхэллээ. Түүний аав Б.Мишиграгчаа Алтай сумын харьяат хүн байжээ. Уулын үйлдвэр байгуулагдах дуулианаар илгээлт өвөртлөн ирж, Эрдэнэт хотыг цогцлоосон анхны барилгачдын нэг төдийгүй Эрдэнэт үйлдвэрийн өрмийн анхны машинч юм. Харин ээж нь одоогийн “Эрдэнэт” сувиллын цогцолборын сувилагч Б.Цолмон гэж зөөлөн гартай, хүнлэг сэтгэлтэй эмэгтэй байв.      М.Болдбаатар хүүхэд байхаасаа уурхайчдын хөдөлмөрийн хүнд хэцүү, зовлон, жаргалыг мэдэрч өссөн. Ээлжинд гарсан аавыгаа их хүлээдэг, аав нь ажлаас бууж ирэхээрээ хоол идчихээд олон цаг сэрэхгүй унтахыг хараад урам нь хугарч бас их өрөвддөг байсан тухайгаа одоо дурсан сууна. Тэрээр 10 жилийн сурагч байхдаа Монгол хэл, уран зохиолын хичээлд илүү сайн, “Номын сайн нөхөр”, онц сурлагатан байв. Багш болохыг битүүхэн мөрөөддөг М.Болдбаатар хүү сургуулиа төгсөөд Улаанбаатар хотод Соёлын техникумын номын санчийн ангид элсэн суралцсан гэдэг. Ном унших сонирхол нь тийш хөтөлсөн хэрэг. Харин тэндээс эрдэм сурахын зэрэгцээ нэгэн насны түшиг хань эрдэнээ олсон. Дундговийн бүсгүйтэй дурлалцаж, дундуур нь цэргийн алба ч хааж, юм юмыг амжуулсан сэргэлэн оюутан явжээ. Болдоо 1987 онд сургуулиа дүүргэж, эхнэр нь Хялганат уруу томилогдоход амьдралын эрхээр дагаж нэг жил номын санчаар ажилласан. Гэсэн ч түүний зүрх сэтгэл Эрдэнэт үйлдвэр хэмээх их айлын нүргээнт амьдралыг санаж байлаа. Сэтгэлийн дуудлагаа тэр дагасан нь оносон. 1990 онд Ил уурхайд жижүүрийн тэрэгний жолоочоор анх ажилд орж, шинэ машин ирэхийг хүлээх зуураа аж ахуйн ажилд хамжилцдаг байв. Зав л гарвал “КСИ”-гийн ойролцоо очоод Белаз хүдэр ачин ирж, буулгаж байгааг хараад зогсдог байснаа дурслаа. Ер нь хүн хөгжих, урагшлах асар их хүсэл шуналтай байх хэрэгтэй гэж шилдгийн шилдэг ажилтан ярьж байна. Анх Эрдэнэт үйлдвэрт ажилд орохсон гэж хүсэж явсан бол дараа нь аварга техник жолоодохсон гэж, Белазын жолооч болсныхоо дараа хамгийн том, хамгийн сайных нь жолоог мушгиж манлайд нь явахсан гэж шунаж хичээсэн цагт амжилт ирдэг. 1991 оны намар М.Болдбаатар Белазын жолооч болох хүсэлтээ илэрхийлэн өргөдөл гаргаснаар даргынхаа өрөөний хаалгыг өдөр бүр онголзуулан шалж, зарим үед зэмлүүлж, сайхан ааштай үед нь тууштай хэмээн магтуулж байж 40 тонны даацтай техникийн жолоо атгасан. Б.Шарав багшийнхаа үг, үйлдэл бүрийг хичээнгүйлэн дагаж ажил мэргэжилдээ жинхэнэ эзэн суусан. Түүгээр ч зогсохгүй уурхайчдынхаа эрх ашгийн төлөө дуу хоолойгоо өргөдөг, зүтгэл сэтгэлийг нь хүртэл өвлөсөн шавь. Тэрээр анх 40 тоннын белаз жолооддог байхдаа зөрж өнгөрөх 110 тоннын 01, 02 дугаартай  белазуудыг бахдан харж, жолооч нараас нь үлгэр дуурайлал авдаг байжээ. Тухайн үед 01 дугаарын белазыг одоогийн Аж үйлдвэрийн гавьяат ажилтан Д.Чадраабал жолооддог байж. Машин дотроо явахдаа ганган, цэмцгэр, цаанаа л нэг гоё харагддаг байсан гэв. Удалгүй 136 тоннын “КАТ” ирэхэд белазын залуу жолооч нараас шалгалт аван байр эзлүүлж хамгийн өндөр оноо авсан хоёр хүнд шинэ тэрэг өгсний нэг нь М.Болдбаатар. Тухайн үед хэн нэгэн “20 гаруй жилийн дараа та бүхнийг хэдэн тонн ачаатай хаана явааг, ачсан хүдэр нь ямар агуулгатайг, түлшний зарцуулалт хэр хэмжээнд байгааг сансраас хянадаг болно” гэж хэлсэн бол мэдрэл муутай нөхөр байна гэж бодох байсан биз. Харин одоо диспетчерийн хяналтын системээр энэ бүхнийг хянаж байна. Эрдэнэт үйлдвэрийн 6600 ажилтны манлайд яваа шилдгийн шилдэг ажилтан маань уурхайн хүнд даацын БелАЗ-75131 загварын 130 тонн даацтай өөрөө буулгагч автомашинаар Х.Сабит, Л.Нармандах, Ч.Батхуяг нарын экипажийн залуусын хамт өнгөрсөн онд 640,6 мянган м.куб уулын цул тээвэрлэж, төлөвлөгөөг 102.1 хувиар, 5,4 сая тн.км ачаа эргэлт гүйцэтгэж, төлөвлөгөөг 102.4 хувиар биелүүлжээ. Тэрээр “Жолооч хүн гэдэг нэгээс нөгөө рүү давхиж очоод ачаа буулгахдаа гол нь биш. Белазынхаа хүчин чадлыг маш сайн мэддэг, бас мэдэрдэг ухаантай байх хэрэгтэй. Даац 136 тонн, белаз өөрөө 107 тонн, нийлээд 240 гаруй тонн жинтэй техникийг жолоодоход хүнээс өндөр ур чадвар шаарддаг. Жолоо мушгихдаа жаахан хэтрүүлж дарахад л ачаа хажуу тийш савирч асгарна. Тэр дээгүүр өөрөө бас журмын нөхөд нь явна. Унасан чулуу машины дугуй сүйтгэнэ. Өнөөдөр белазын нэг дугуйны зах зээлийн үнэ 24000 доллар. Нэг белазанд зургаан дугуй эргэж байгаа гэхээр жолооч анхаарал жаахан алдахад л ямар их гарзтай нь ойлгомжтой. Тиймээс дугуйнд өдөр тутмын арчилгаа чухал. Чулуу хавчуулагдсан бол түүх, аль болох чулуу дайрахгүй явах ур чадварт залуусаа сургахыг хичээдэг” гэж ярьсан юм. М.Болдбаатар белазын VPRS-E2A 33.00R51 загварын дугуйг 2019 онд нормоос 17,5 мянган км илүү гүйлгэж үйлдвэрт 10 орчим сая төгрөгийн хэмнэлттэй ажиллажээ.     Тэрээр одоогоор 10 гаруй шавьтай. Цаашид энэ тоо хэдэн арваар өснө. Учир нь тэр саяхнаас сургагч багш болжээ. Технологийн тээврийн “аялал”-даа гарахын зэрэгцээ өөрийн мэдлэг, чадвараа залууст зааж сургах эрхэм үүрэг түүнд оногдсон. Хамгийн сүүлд БелАЗ-75131 загварын автомашины удирдлагын цахилгаан тохируулгын хянах дэлгэцийн гарын авлага санаачлан гаргаж жолооч нартаа зааж сургажээ. Үүний үр дүнд хөдөлмөрийн бүтээмж дээшилж, автомашины хүчин чадлыг бүрэн ашигладаг болсон тухай хэсгийн дарга нь ярив.     Уулзах төдийд эрч хүч, халуун сэтгэл мэдрүүлдэг хүн байдаг. Тийм л хүмүүсийн нэг нь М.Болдбаатар гэлтэй. Эрдэнэсийн үйлдвэртээ 28 жилийн хөдөлмөрөө бүрэн зориулсан энэ эгэл агаад энгүй хөдөлмөрийн эзний хэлэх ярих нь ухааны уурхай юм. Аюулгүй ажиллагаа, машин техник эзэмших эв дүй, ажлын арга барил, амрах соёл, биеэ ажилд бэлтгэх чадвар гээд буй биеэрээ үлгэр дуурайлал, амьд “гарын авлага”. Аварга техникийн жолоо атгасан залуурдагч өнөөдөр залуу ажилчдыг араасаа дагуулах залуурч болж.      Олон жилийн өмнө М.Болдбаатар Дундговь аймагт айлын найранд суужээ. Дэргэд нь суусан өвгөн “Миний хүү, тэр белаз гэдэг унаа чинь ямархуу эд байдаг юм дээ?” гэж асууж. Мань хүн “136 тонн ачаа ачдаг, долоон метр өндөр, өргөн нь зургаан метр...” гээд ойлгуулчих санаатай техникийн тодорхойлолт хэлсэн чинь өөдөөс нь “ЗИЛ-130” чинь хэдэн тонн билээ?” гэж. Болдоо хариуд нь “Таван тонн. Миний машин 27 “ЗИЛ 130” машины ачааг нэг дор ачна шүү дээ, ах минь” гэтэл таг болчихож. Хэсэг дуугүй байснаа “Миний хүү, уг нь хүн харахад нүдэнд дулаахан, сайхан залуу байх юм. Жаахан бодолтой залж байхгүй бол хүн амьтны элэг доог болно шүү” гэж аминчлан захисан гэдэг. Өвгөний төсөөлөлд багтаагүй белазыг өнөөдөр ч жолоодсоор яваа М.Болдбаатарын зөөсөн хүдрийг тооцвол нэгэн том уул болох биз ээ. Залуурдагчийн үйлс бүхэн өөдөө, гэгээн хүсэл нь биелж яваг.      М.Одгэрэл Фото: Б.Баттөгс Дэлгэрэнгүй...
  • Ган бөөрөнцгийн шинэ урсгал

            Уулын хүдрийг нунтаглан баяжуулахад хамгийн чухал үүрэгтэй ган бөөрөнцгийг Эрдэнэтчүүд 23 жилийн өмнөөс үйлдвэрлэж эхэлсэн. Хувьд байсан үйлдвэр 2007 оноос Эрдэнэт үйлдвэрийн харьяанд орж, үйлдвэрлэлийн нэгэн томоохон цех болон өргөжсөнөөр техник, технологийн шат дараатай шинэчлэлүүд хийгдэж ирсэн. Гэсэн ч бүгд оновчтой байгаагүй. Нүүрс хийжүүлэх зуухны технологи нь байгаль орчинд халтайн дээр ажлын байрны хортой нөхцөл, техникийн доголдол гээд олон асуудал, хэл ам дагуулж байв. Энэ бүхнийг цогцоор нь шийдэх технологийн шинэчлэл 2019 оны төгсгөлд өрнөж, 12-р сарын 31-ний өдөр тоног төхөөрөмжүүдийг ашиглалтад хүлээн авснаар хөгжлийн шинэ хуудас эргэлээ.     Индукцын технологи ган бөөрөнцгийн үйлдвэрлэлд хэрхэн нэвтэрч, манай буйранд хэрхэн нутагшиж буй талаар сурвалжлахаар тус цехийг зорилоо. А.Отгончулуун дарга өрөөндөө инженер техникийн ажилтнуудаа цуглуулаад хуралдаж сууна. Шилэн хаалганы цаанаас харвал бүгдийнх нь царай гэрэлтэй, тайван, үйл хөдлөл нь эрчтэй урам дүүрэн ажиглагдана. Намайг ороход оосорлогч авах, 2020 оны захиалгаа гүйцээх үүрэг даалгаврын чиглэл өгснөөр хурал өндөрлөв. Өнөөдөр Ган бөөрөнцгийн цехийн удирдлагын зүгээс бүтээгдэхүүнийхээ тоо хэмжээг нэмэгдүүлэхээс илүү шинэ тоног төхөөрөмж дээр ажилчдаа сургаж дадлагажуулах, мэргэшүүлэхэд илүү анхаарал хандуулж, бодлого, үйл ажиллагаагаа тэр зүг чиглүүлж байгаагаа илэрхийлсэн. Ингэж гэмээнэ тоног төхөөрөмжүүдийн найдвартай ажиллагаа, бүрэн бүтэн байдал эхнээсээ хангагдана гэж үзэж байна. Индукцын технологи нэвтрүүлэх техник эдийн засгийн үндэслэлээр 66 орон тоо баталсан ч хүнээ нэмэхгүй хуучин орон тоогоороо ажиллах боломжтой гэв.             Ган бөөрөнцгийн цехийн технологийн шинэчлэлийн тоног төхөөрөмжүүдийг үйлдвэрлэгчээс нь шууд худалдан авалт хийснээрээ онцлог, давуу талтай. Нийлүүлэгч компанийнхан тоног төхөөрөмжүүдийн угсралт, суурилуулалтын ажилд оролцож, нэгдүгээр сарын долоонд ашиглалтад хүлээлгэн өгөх гэрээтэй хэдий ч төлөвлөгөөт хугацаанаас өмнө ийнхүү дуусгажээ. Одоо тоног төхөөрөмжийн туршилт, тохируулга, зүгшрүүлэлт ажлын байрны сургалттай хамт явагдаж байна. Ажилчдыг сургаж дадлагажуулах ажил хоёр сар үргэлжлэх бөгөөд танхимын сургалт ч зохион байгуулах аж. Хятад мэргэжилтнүүд Өвөрмонгол орчуулагчтай учраас бүрэн ойлголцоход хүндрэл учирчээ. Гэсэн ч Баяжуулах үйлдвэрийн Өөрөө нунтаглах хэсгийн инженер, Дундад улсад их сургууль төгссөн залуугийн тусламжтайгаар ажил урагштай явна.     Үйлдвэрийн хэсэг рүү ороход дуу чимээ ихтэй ч урьдын утаа угаар, тоос шороо үгүй болжээ. Өнгө муутайхан, тортогтой хувцастай байдаг ажилчид нь ер бусын өнгөтэй, жавхаатай харагдана. Ган бөөрөнцгийн шинэ урсгал хоёр зэрэг тасралтгүй хөвөрнө. Тэд шинэ тоног төхөөрөмжөө ашиглалтад хүлээн авснаас хойш 80, 100-гийн голчтой “шаар” 20 гаруй тонныг үйлдвэрлээд байна. Технологийн горимоо зүгшрүүлэх, ажилчдаа сургахыг илүү чухалчилж байгаа учир шинэ шугамаас гарсан бүтээгдэхүүнээ Чанар хяналтын хэлтсийн Металлын лабораторит шинжлүүлэхээ азнаж байгаа гэнэ. Мөн эднийх үйлдвэрийнхээ дэргэд металлын өөрийн гэсэн лабораторитой болох бэлтгэл хангасныг үзлээ. “Шаар”-ны бүтэц, чанарыг лабораторитоо шинжлээд үйлдвэрлэлийн процесс хэрхэн явагдаж байгааг хянан горимыг тохируулж ажиллах юм. Аливаа шинэ технологи, тоног төхөөрөмж үйлдвэрлэлд нэвтрэхэд нэг л өдөр бүх зүйл төгс болчихгүй. Энд нь нэг эвүүр хийчихмээр юм байна, тэнд нь ролик тавьчих нь зүйтэй юм байна гэсэн жижиг сайжруулалтын ажлууд хэсэгтээ үргэлжилдэг. Ингэснээр тоног төхөөрөмжийн бүрэн бүтэн байдал хангагдаж, эвдрэл гэмтлээс удаан сэргийлж чадна. Ажилчид камер суурилуулах, дуу чимээ намсгах, усны хэрэглээ багасгах гэх мэт чиглэлээр сайн саналууд гаргасаар...      Одоогоор Ган бөөрөнцгийн цехэд 12000 тонн бэлдэц бий. Дарханы төмөрлөгийн үйлдвэрийн эдгээр бэлдэц жигд биш байгаагаас үйлдвэрлэлд бага зэргийн асуудал үүсгэж байна. Бэлдцүүд үзүүр хэсэгтээ нарийн, дундаа бүдүүн, гулзайлт ихтэй, барзгар гадаргуутай байх жишээтэй. Индукцын цувих шугамын технологи нь хэмжүүрийн 100-ны нарийвчлалтай. Гэтэл Дарханы бэлдэц 10-ны нарийвчлалтай учраас тэр. Гэхдээ сайн саналын системээр сайжруулах боломжтой гэж цехийн дарга ярилаа. Түүнээс гадна Ган бөөрөнцгийн цехийн түүхэнд тодоор бичигдэх шинэчлэлийн ажлыг хамтран хэрэгжүүлсэн Механикийн болон Эрчим хүчний хэлтэс, Цахилгааны цех, Барилга засварын цех, Засвар механикийн завод, Засвар, угсралтын цехийн хамт олонд, тоног төхөөрөмжүүдийг богино хугацаанд нийлүүлэхэд хүчин чармайлттай ажилласан У.Эрдэнэбаяр даргатай Худалдан авалт, хангамжийн хэлтсийн багийнханд тусгайлан талархал илэрхийлэв.     Тус хамт олон 2020 оныг эрдэм шинжилгээ, судалгааны ажлын жил болгожээ. Бүтээгдэхүүнийхээ бүтэц, чанарыг улам сайжруулах, алсдаа 120, 125-ын “шаар” үйлдвэрлэх хэтийн зорилго, төлөвлөгөөтэй тооцоо судалгаа явагдана. Ажил, мэргэжлийн хувьд асар их хүсэл шуналтай байж гэмээнэ амжилтад хүрдэг гэдэг. Ган бөөрөнцгийн шинэ урсгал дөнгөж эхэлж байхад дараагийн дэвшлийг төлөвлөж чадаж байгаа нь энэ хамт олны ирмүүн хөдөлмөр, сэтгэлийн илэрхийлэл юм. Ээлжийн мастер М.БАХДАЛ:      -“Шаар”-ны хэлбэр дүрс сайхан гарч байна. Энгийн нүдээр харахад импортоор ирж байгаа хятадын шаарнаас ялгарах юм алга. Индукцын технологи их мэдрэмтгий, нарийвчлал өндөр. Тиймээс шинэ тоног төхөөрөмжүүд ажилтнаас ур чадвар, мэдрэмж их шаардаж байна. Манай ажилчид Хятад мэргэжилтнүүдийг дагаад сайн дадлагажиж байгаа. Ажлын байрны орчин нөхцөл эрс сайжраад, манайхан сэтгэл өндөр, ажиллах урам зориг дүүрэн байгаа нь хөдөлмөрийн бүтээмжээс нь мэдрэгдэж байна. Өмнө нь нүүрс хийжүүлэх зуухтай байхад нүүрсээ буулгана, ачна, шигшинэ, бэлдэнэ гээд ажиллагаа ихтэй, бас хаягдал нүүрс, үнс, давирхай ихээр хуримтлагддаг асуудал байсан. Индукцын давуу тал нь бэлдцийг жигд халааж, цувилтад оруулдаг. Нэг бэлдцийг хоёр минутад цувиж байна. Бэлдцийг индукцын зуухаар халааж цувилтад оруулсны дараа “шаар” хөргөлтийн системээр дамжаад амраах зууханд ирж тодорхой хэмд гаргана. Тоног төхөөрөмж үйлдвэрлэгч Анянг компанийн инженер ЖАН ХАЙ ЖЕЙ:       -Ерөнхийдөө тоног төхөөрөмжийн угсралт 100 хувь болсон. Одоо тохируулга, туршилт, сургалт хариуцан ажиллаж байна. Үйлдвэрлэл хэвийн явагдаж байна. Гарын авлагад тулгуурлан онолын болон ажлын байрны сургалт давхар явагдаж байгаа. Монгол ажилчид үнэхээр ур дүйтэй, чадвартай байгаа нь надад их амар байна. Би гадаадын 30 улсад энэ тоног төхөөрөмжийг суурилуулсан. Харин Монголд анх удаа ирлээ. Өнгөрсөн хоёр хоногт Эрдэнэт үйлдвэрийн үйл ажиллагаатай танилцаж маш том гэдгийг мэдэрсэн. Дэлхийд чансаагаараа ТОП тавд эрэмбэлэгддэг уул уурхайн үйлдвэрт ажиллаж байгаадаа баяртай байна. Суралцах зүйл их байна.  Оператор Ц.АЛТАНГЭРЭЛ:     -Би Эрдэнэт үйлдвэрт 19 дэх жилдээ ажиллаж байна. Анх Шведийн цувих машин байхад л ирсэн. Индукцын технологи утаа униаргүй, цахилгаанаар ажилладаг болохоор илүү амар. Хуучин мэдрэмжээрээ, туршлагаараа ажиллаад, давхар суралцаад явж байна. Хамгийн гол нь ажлын байрны хортой нөхцөл сайжирсанд баяртай байна. Үйлдвэрийн шалыг резинэн будгаар будаад угааж арчих цэвэрлэгчтэй болно гэхээр цаашид маш цэвэр орчин бүрдэнэ.    Жижүүр Г.ХИШИГСҮРЭН:     -Амраад ажилдаа иртэл шинэ шугам тавигдчихсан, үйлдвэрлэл явж байна. Ган бөөрөнцөг урсаж байгааг хараад үнэхээр их баярласан. Тэр өдөр тогтож сууж чадахгүй догдлоод, гадаах цасаа цэвэрлээд, доторх шороо тоосоо арчиж угаагаад л, эрч хүч цаанаасаа оргилсон сайхан өдөр байсан. Хүн бүрийн царайд инээмсэглэл тодорсон тийм сайхан өдрийг би энд  зургаан жил ажиллахдаа олон хараагүй. Жижүүрийн үүрэг бол бүтээгдэхүүнээ жинлэнэ, хэдэн кг бэлдэц ирсэн, хэдэн кг шаар үйлдвэрлээд явуулав гэдгийг бүртгэнэ. Камер хянана. Нүүрс хийжүүлэх зуухтай байхад бид үнэхээр хүнд нөхцөлд ажилладаг байсан. Гэртээ очиход угаар үнэртээд зогсохгүй ажлаас буусан шөнө ханиалгаад унтаж амарч чаддаггүй байсан. Би “24” гараад “72” амардаг. Хонож байж ханиалга намддаг байлаа. Одоо бол асуудалгүй сайхан байна.     Ган бөөрөнцгийн үйлдвэрлэлийн технологийн шинэчлэл хэр үр дүнтэй болсныг цаг хугацаа харуулна. Эрдэнэт үйлдвэр жилд ойролцоогоор таван төрлийн 35000 тонн “шаар” хэрэглэдэг. Цехийн хүчин чадал нэмэгдсэн учраас өөрийн үйлдвэрийн хэрэглээг хангаад зогсохгүй дотоодын зах зээлд жилд 3000-5000 тонн ган бөөрөнцөг борлуулахыг зорьж байгаагаа ч тэд нуусангүй. Ган бөөрөнцгийн шинэ урсгал эрчтэй, ажилчдын сэтгэл тэнүүн байна.                     М.Одгэрэл Фото: Б.Баттөгс Дэлгэрэнгүй...
  • Станц 329 сая кВт/цаг цахилгаан эрчим хүч үйлдвэрлэнэ

        Эрдэнэт үйлдвэрийн Дулааны цахилгаан станц хоёр жилийн өмнөөс Монгол Улсын эрчим хүчний системд цахилгаан нийлүүлж эхэлсэн. Диспетчерийн Үндэсний төвөөс өнгөрсөн онд 324 сая кВт/цаг цахилгаан эрчим хүч үйлдвэрлэн нийлүүлэх горим төлөвлөгөө өгснийг манай “галын бурхад” 100,1 хувиар биелүүлжээ. Харин энэ жил үүрэг хариуцлагыг дахин таван кВт/цаг-аар нэмэгдүүлж 329 кВт/цаг эрчим хүч үйлдвэрлэн түгээх даалгавар өгснийг амжилттай биелүүлэхээр ажиллаж байна. Харин дулаан үйлдвэрлэх төлөвлөгөө нэмэгдүүлээгүй. Тус хамт олон, тоног төхөөрөмжийн урсгал болон их засварыг чанартай гүйцэтгэж, нүүрс нөөцлөлт болон гуравдугаар зуухны их засварт анхаарал хандуулан ажилласны үр дүнд төлөвлөгөөт хугацаанд нь галлаж өвлийн ид ачаалалд ажрахгүй байх нөхцөл бүрдлээ. Одоогоор станц 52000 тонн нүүрсний нөөцтэй байгаа нь 50 хоногийн хэрэглээ юм.     2019 оны төгсгөлд IV цахилгаан станц доголдож, цахилгаан эрчим хүчний нэг трубин зогссоноос ижил төстэй станцуудын ачаалал нэмэгдсэн. Энэ үед Эрдэнэт үйлдвэрийн Дулааны цахилгаан станц таван зуухны горимоор бүрэн хүчин чадлаараа ажиллаж эрчим хүчний салбарт дэм үзүүлэв.  М.Одгэрэл Фото: Б.Баттөгс Дэлгэрэнгүй...
  • Д.МӨНХБОЛД: Хэрэгцээтэй тоног төхөөрөмжийн техникийн тодорхойлолт боловсруулна

        Эрдэнэт үйлдвэрийн үйлдвэрлэлийн тоног төхөөрөмжүүдийг худалдан авахад хэрэглэх “Техникийн тодорхойлолт”-ыг Техникийн хэлтэс боловсруулж байна. Энэ талаар Техникийн хэлтсийн орлогч Д.Мөнхболдоос тодрууллаа.     -“Эрдэнэтийн-Овоо” орд газрын өөрийн онцлог гэж байдаг. Оюутолгой зэрэг бусад ордууд өөр өөрийн онцлогтой. Өөрөөр хэлбэл тухайн  ордын агуулга, бүтэц, найрлага өөр учраас... Тэгэхээр бид 41 жилийн түүхэндээ Эрдэнэтийн ордыг ашигладаг технологитой болчихсон. Энэ технологи өөр газар таарахгүй. Ийм технологид тохирсон тоног төхөөрөмж энд ажиллах ёстой.     Өнгөрсөн оны зургаадугаар сард үйлдвэрийн Ерөнхий захирлын тушаалаар “Тогтвортой хөгжлийн бодлого”-ыг баталсан. Энэ нь техник технологийн, эдийн засгийн, нийгмийн, байгаль орчны, тогтвортой хөгжлийн бодлого юм. Уг ажлын хүрээнд  үйлдвэрлэлд тулгамдаж буй техникийн асуудлыг техникийн зөвлөлөөр шийдвэрлэж байгаа. Техникийн хэлтсийнхэн  2019 оны сүүлийн хагас жилд техникийн бодлогыг хэрэгжүүлэх үйл ажиллагааны журам боловсруулж байна. Өмнө нь онцгой комисс хуралдаж тулгамдаж буй асуудлаа шийдэж ирсэн. Үйлдвэрийн удирдлагын баг 2020 оныг “Шинжлэх ухаанд суурилсан үйлдвэрлэлийг эрчимтэй хөгжүүлэх” он болгох зорилт дэвшүүллээ. Энэ нь үйлдвэрлэлийг эрчимтэй хөгжүүлье. Тэгэхдээ шинжлэх ухаанд суурилъя гэсэн санаа.    Эрдэнэт үйлдвэрт техник, тоног төхөөрөмж ямар байх ёстой юм. Ямар шаардлага хангасан тоног төхөөрөмж авч, хэрхэн ашигтай ажиллуулах ёстойг зөв тодорхойлох нь маш чухал ажил. Иймээс анхан шатны техникийн баримт бичгийг тодорхой болгож нэг стандарт загварт оруулах шаардлагатай  гэж үзсэн.     -Техникийн тодорхойлолт боловсруулж нэг загварт оруулснаар ажлын ямар өөрчлөлт гарах вэ?     -Ямар техник хэрэгцээтэйг зөв тодорхойлох шаардлагатай. Тухайн техникт ерөнхий болон тусгай шаардлага тавигддаг. Сүүлийн жилүүдэд техникийн тодорхойлолтыг үйлдвэрийн бүтцийн нэгжүүд өөр өөрийн чиглэлээр янз бүрийн хэлбэрээр боловсруулж байсан. Энэ нь зарим нэг техникийн шаардлагыг орхигдуулах, улмаар зөвхөн нэг талыг баримталж тодорхойлох нь олон асуудал дагуулдаг. Жишээлбэл, шинэ техник, тоног төхөөрөмж захиалахдаа худалдан авсны дараа тухайн техник дээр ажиллах ажилтныг сургах шаардлагыг орхигдуулснаар асуудал үүсдэг. Тухайн техникийг тодорхойлолтын дагуу тендер зарлаж худалдан авалт хийгээд техникийг ажиллуулах үед бэлтгэгдсэн ажилтангүй байгаа нь тухайн техникийг эвдэх, ажилтан осолдох зэрэг хүндрэл үүсгэдэг. Тэгэхээр уг техникийн тодорхойлолт дээр нь хүн сургах шаардлагатайг тусгачих ёстой.     Үүнээс гадна захиалсан тоног төхөөрөмж ямар орчинд ажиллахыг тодорхойлоогүйгээс шинээр ирсэн агаар шахах компрессор халаад байн байн зогсоод байсан.     Учир юу вэ гэвэл гадна орчин ба дулаан байранд ажиллах зориулалтыг тодорхойлолгүй захиалга хийгдсэн. Гадна ажиллах тоног төхөөрөмжийг дотор тавихаар халаад ажиллахгүй байх жишээтэй.     Техникийн тодорхойлолтод үндсэн үзүүлэлт, төрөл, загвар, ямар энергийн эх үүсвэр хэрэглэх талаар тодорхой заах хэрэгтэй. Гаднын зарим тохиолдолд нэмэлтээр өөр энергийн эх үүсвэр шаардлагатай байдаг. Тухайлбал, зарим тоног төхөөрөмжид тусгай хий азот шаарддаг.     Үүнийг техникийн тодорхойлолтод тусгаагүй бол азотын станц тавих, шугам татах зэрэг нэмэлт ажлууд гарна. Тэгэхээр цахилгаан, азот, ус, уур хэрэглэнэ гээд тусгай шаардлага дээр нь заачихвал ямар ч асуудал гарахгүй. Энэ бүхнийг тооцоогүйгээс нэмэлт зардал гардаг. Шинэ техник үйлдвэрлэлд нэвтрүүлэхэд хүндрэл учруулдаг.     Тоног төхөөрөмжийн  техникийн тодорхойлолтыг зөв боловсруулснаар ийм алдаа дахин гарахгүй. Техникийн бодлого зөв хэрэгжинэ, нэг стандартад орж цэгцэрнэ. Өнгөрсөн оны сүүлийн улиралд үйлдвэрийн инженер, техникийн ажилтнууд болон бодлогын хэлтсүүдтэй хамтран техникийн тодорхойлолт загварыг зөвшилцөх замаар боловсруулж, 12-р сарын 25-ны өдөр буюу Уурхайчдын баяраар “Техникийн тодорхойлолтын загвар батлах тухай” үйлдвэрийн Ерөнхий захирлын нэгдүгээр орлогч бөгөөд Ерөнхий инженерийн шийдвэр гарсан. Ингэснээр 2020 онд Эрдэнэт үйлдвэр худалдан авалт хийж буй бүх тоног төхөөрөмжийнхөө техникийн тодорхойлолтыг нэг загвараар боловсруулна. Техникийн бодлого нь техникийн тодорхойлолтоос эхлэх ёстой. Байшин барилаа гэж бодоход суурийг нь сайн тавина гэсэн үг. -Баярлалаа. Т.Батчулуун Фото: Б.Баттөгс Дэлгэрэнгүй...
  • Д.ҮҮРИЙНТУЯА: Эрдэнэт үйлдвэрийн удирдлагуудын өрөө тасалгаа, бичиг баримтыг битүүмжилж, зогсоосон гэдэг мэдээлэл үндэслэлгүй...

       Монгол Улсын Засгийн газар “Эрдэнэт үйлдвэр” ТӨҮГ-т онцгой дэглэм тогтоосноос хойш 10 сар болох гэж байна. Онцгой дэглэмийн хугацаанд үйлдвэрийн үйл ажиллагаанд  гарсан үр дүнг дүгнэх зорилгоор Сангийн яамны Төрийн нарийн бичгийн даргаар ахлуулсан ажлын хэсэг Эрдэнэт үйлдвэрт ажиллаж байна. Шалгалтын зорилго, чиглэлийн талаар Ерөнхий захирлын Санхүү, эдийн засаг хариуцсан орлогч Д.Үүрийнтуяагаас тодрууллаа.         -Өнөөдөр зарим нэг нэр бүхий сайт, цахим хэрэгслээр Эрдэнэт үйлдвэрт АТГ, ТЕГ зэрэг газрын бүрэлдэхүүнтэй “десант” бууж, үйлдвэрийн өрөө тасалгаа, бичиг баримтыг битүүмжиллээ гэсэн утгатай мэдээлэл олон нийтийн сүлжээнд тавигдсан. Энэ талаар та тодорхой мэдээлэл өгнө үү?     -Монгол Улсын Ерөнхий сайдын 2019 оны 12 сарын 27-ны өдрийн 178 дугаар захирамж гарч, Монголросцветмет болон Эрдэнэт үйлдвэрт өнгөрсөн 3 сард тогтоосон Онцгой дэглэмийн хугацаанд ямар үр дүнтэй ажилласан бэ гэдгийг шалгах, санхүүгийн иж бүрэн шалгалт хийх ажлын хэсгийг томилсон байгаа. Энэ хүрээнд ЗГХЭГ-ын даргын баталсан удирдамжийн дагуу санхүүгийн хяналт шалгалтын үйл ажиллагаа өчигдөр Эрдэнэт үйлдвэрт эхэлсэн. Шалгалт үргэлжилж байна. Гэхдээ Эрдэнэт үйлдвэрийн үйл ажиллагааг битүүмжилсэн, удирдлагуудын ажлыг зогсоосон, лацадсан, бичиг баримт битүүмжилсэн зүйл байхгүй. Тиймээс  зарим цахим сүлжээгээр тавигдаад буй  мэдээлэл үндэслэлгүй юм.     -Ажлын хэсгийнхний энэ удаагийн шалгалт юунд чиглэгдэж байна вэ?    -Шалгалтын ажлын хэсгийнхэн нэлээд өргөн бүрэлдэхүүнтэй ирсэн байгаа. Сангийн яам, Төрийн өмчийн бодлого зохицуулалтын газар зэрэг төрийн захиргааны төв байгууллагууд, Засгийн газрын Хэрэг эрхлэх газар болон хууль хүчний байгууллагуудаас АТГ, ТЕГ, ЦЕГ оролцсон ажлын хэсэг ажиллаж байна. Ажлын хэсэг,  Эрдэнэт үйлдвэрт “Онцгой дэглэм” тогтоосон 2019 оны 3 сараас хойшхи хугацааны санхүүгийн үйл ажиллагаа хууль тогтоомжийн дагуу явагдсан эсэх, худалдан авах үйл ажиллагаа дүрэм журмын дагуу хийгдсэн зэргийг шалгаж, үнэлэлт дүгнэлт өгөх чиглэлтэй ажиллаж байна. Өөрөөр хэлбэл, Засгийн газраас тогтоосон, дараа нь УИХ-ын чуулганаар дахин 6 сараар сунгаад буй “Онцгой дэглэм”-ийн үед “Монголросцветмет”, “Эрдэнэт үйлдвэр” ТӨҮГ-уудын үйл ажиллагаа ямар үр дүнтэй ажиллаж байна вэ гэдгийг үнэлж, дүгнэлт өгнө гэж хэлж болно.     -Дээрх мэдээлэлд худалдан авах үйл ажиллагаа буюу тендертэй холбоотой асуудал дурьдагдсан байна. Тухайлбал, Эрдэнэт үйлдвэрийн удирдлагууд 100 орчим тэрбум төгрөгийн гэрээ байгуулсан гэх мэтчилэн. Үүн дээр дахин тодруулга өгнө үү?     -Эрдэнэт үйлдвэрийн тендерийн үйл ажиллагаа хууль тогтоомжийн хүрээнд явагдаж байна. Бид 2019 оны худалдан авалтын үйл ажиллагааны тайланг гарган холбогдох төр захиргааны байгууллагуудад хүргүүлсэн. Өмнө нь бид тайлангаа урьдчилсан байдлаар бэлтгэж хүргүүлсэн бол өнөөдрийн байдлаар эцэслэн гаргаж дууслаа. Худалдан авах үйл ажиллагаатай холбоотой үнэн зөв мэдээллийг  цаг тухай бүрт нь бид хэвлэл мэдээллийн хэрэгслээр дамжуулан хүргэж байна. Эрдэнэт үйлдвэр ямар нэг байдлаар хууль тогтоомж зөрчин тендер зохион байгуулсан тохиолдол байхгүй. Худалдан авалтын мэдээллийг  цахим тендерт байршуулан, үнэлгээний хороо хэрхэн ажиллах зарчмын дагуу явуулж байна. М.Балжинням Фото: Б.Баттөгс Дэлгэрэнгүй...
  • Е-оffice систем нэвтэрснээр албан бичиг баримтын хүлээгдэлгүй болно

             Эрдэнэт үйлдвэрийн Холбоо, мэдээлэл технологи, автоматжуулалтын цехийн инженерүүд үйлдвэрийн ажилтан болон ажлын байрны цогц мэдээллийн сан бүхий Е-оffice системийг боловсруулан нэвтрүүлж байна.    Энэ талаар тус цехийн Мэдээлэл боловсруулах хэсгийн системийн шинжээч Б.Солонгоос тодруулахад: “Е-оffice системийг үйлдвэрийн хэмжээнд өнгөрсөн жилээс эхлэн туршсан. Өнөөдрийн байдлаар уг туршилтын үр дүнд бүрэн нэвтрүүлэх ажил эхлээд байна. Бид систем нэвтрүүлэх явцад гарч буй алдаа дутагдлыг арилгах, сайжруулахад анхаарч байна. Манай цехийн мэргэжилтнүүд хоёр  жилийн өмнөөс энэ системийг боловсруулах судалгааны ажил хийж эхэлсэн. Нийслэлийн архивын газраас туршлага судалж, өөрсдийн хийж байсан арга жишээн дээр тулгуурлан уг системийг боловсрууллаа. Е-оffice системийг нэвтрүүлж ашигласнаар дотоод албан тоот, баримт бичгийн хүлээгдэл арилж, цаасгүй технологиор цаг хэмнэж ажиллах боломж бүрдэж байна. Энэ системийг боловсруулахдаа мэдээллийн аюулгүй байдлыг хангах үүднээс Хуулийн хэлтэстэй хамтарч ажилласан. Ингэснээр систем рүү нэвтрэхэд мэдээллийн бааз дугаарлагдсан эсэх, мэдээллийн сан нь зөвхөн программаар нэгтгэгдэх зэрэг хэд хэдэн тавигдах шаардлагыг хангасан. Энэ систем нь дотроо бичиг хэргийн ажилтнуудад зориулагдсан, хэрэглэгчдэд хүргэх вэб программ гэсэн хоёр хэсэгтэй. Систем нэвтрүүлж буйтай холбоотой олон санал ажилтнуудын зүгээс тавьж байгаа. Тодруулбал, Е-оffice системээр дамжуулан ажил үүргийг цахимаар хуваарилах, илүү боловсронгуй болгох, өргөн хүрээнд ашиглах боломж бүрдүүлэх гэх зэргээр бидэнд хандаж байна. Тиймээс илүү сайжруулахаар хичээж байна” гэж хариулав. М.Балжинням      Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Бидний тухай

     Монголын Волейболын холбооны Ерөнхий нарийн бичгийн дарга Г.Баярсайхан, “Эрдэнэт үйлдвэр” ТӨҮГ-ын Спорт цогцолборын дарга Ш.Даваахүү нар өнөөдөр “Монгол ньюс” компанийн Мэдээллийн төвд хийсэн хэвлэлийн бага хурал дээр Волейболын лигийн тэмцээнийг хамтран зохион байгуулах болсноо албан ёсоор нийтийн сонорт хүргэлээ. 1995 оноос хойш 2012 он хүртэл тасралтгүй зохиогдсон Дээд лигийн аварга шалгаруулах тэмцээн маргааш эхэлнэ. “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн Монголын Волейболын холбооны Ерөнхийлөгчөөр 12 жил ажилласан бөгөөд холбооны зүгээс тэмцээнийг дахин сэргээх санал тавьснаар энэ ажил биеллээ олж байгаа талаар Ерөнхий нарийн бичгийн дарга Г.Баярсайхан хэлсэн үгэндээ онцоллоо. Тэмцээний нэгдүгээр тойргийг "Хасу Мегаватт" ХХК-ийн "ЭКО Спорт цогцолбор"-т эхлүүлэх тов гарчээ. Дээд лигийн тэмцээнд “Алтайн барс” клубээс 2, “Тэнүүн-Огоо” багаас 2, Эрдэнэтийн “Уурхайчин” клубээс 2, “Эрчим” клуб, “Хос бар”, Булган аймгаас тус бүр эрэгтэй, “Хобби эс” клуб, “Дархан Сеть”, “Инагурэ”-ээс тус бүр эмэгтэй багууд оролцохоор мэдүүлгээ ирүүлжээ. Тэмцээний 2 дугаар тойргийн тоглолтууд 11 дүгээр сарын 8-10-нд Орхон аймагт үргэлжилж, 3 дугаар тойргийг Улаанбаатар хотод зохион байгуулахаар төлөвлөөд байна. Шигшээ тоглолтууд 12 дугаар сарын 2-6-нд болох бөгөөд тэмцээнийг MNB спорт сувгаар шууд дамжуулна.

 

     

     Эрдэнэт үйлдвэрийн бүтцийн нэгжүүд оны эхний есөн сарын үйл ажиллагааныхаа үр дүнгийн тайланг гурван хоногийн турш тайлагнаж өнөөдөр дууслаа. “Цех нэгжүүд маань өртөг зардлыг бууруулах, үйл ажиллагааны үр ашгийг нэмэгдүүлэх талаар тодорхой санал санаачилга гаргаж, төлөвлөгөөнийхөө хэрэгжилтийг бодитойгоор дүгнэж тайлагналаа. Тайлангийн үр дүнгээр цех нэгжүүдийн хөрөнгө оруулалтын төлөвлөгөөний хэрэгжилтийг нэг бүрчлэн хэлэлцэж, эхний есөн сарын төлөвлөгөө хэрхэн байсан,  дутуу байгаа төлөвлөгөөний хэрэгжилтийг цаашид хэрхэн хангаж ажиллах талаар тодорхой хугацаатай үүрэг даалгавруудыг өглөө” гэж Эрдэнэт үйлдвэрийн Ерөнхий захирлын Санхүү, эдийн засаг хариуцсан орлогч Д.Үүрийнтуяа тайлангийн хурлаа  дүгнэж ярилаа.

    Эрдэнэт үйлдвэрийн бүтээлч хамт олон оны эхний есөн сарын байдлаар үйлдвэрлэлийн төлөвлөгөөт бүх үзүүлэлтүүдийг 100-107 хувиар биелүүлэн ажиллаж байна. Төлөвлөх зардлаа хэмнэж, оны эхний есөн сарын байдлаар Улс орон нутгийн төсөвт 730 тэрбум төгрөг төвлөрүүлсэн амжилттайгаар ажиллаж байна.

                                                                                           А.Бямбамаа

Фото: Б.Баттөгс

   Эрдэнэт үйлдвэрийн өргөх байгууламжууд буюу бидний нэрлэж заншсанаар гүүрэн крануудын ажиллах чадвар сайжирч байна. Үйлдвэрийн хэмжээнд 400-аад кран байгаагаас 70 орчим хувь нь ашиглалтын хугацаа дууссан өргөх байгууламжууд юм. Механикийн хэлтсээс өргөх байгууламжийн шинэчлэлд сүүлийн жилүүдэд онцгой анхаарал хандуулан, тодорхой ажлууд хэрэгжүүлснээр ажиллах чадвар эрс сайжирчээ. Он гарсаар, Баяжуулах үйлдвэрийн Шүүн хатаах хэсгийн 35 тонны 189-р гүүрэн кранд их засвар хийж ашиглалтад оруулсан байна. Мөн Тээвэр ложистикийн төвийн 20 тонны кранд их засвар хийж, ажиллах чадварыг сэргээсэн бол сүүлийн сард мөн цехийн 1029 дүгээр гүүрэн краны их засварыг гаднын байгууллага хийж гүйцэтгэснийг “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженерийн томилсон ажлын хэсэг хүлээн авахаар ажиллаж байна. Урьдчилсан дүгнэлтийн дагуу ажлыг гүйцээлгэж, ирэх долоо хоногт ашиглалтад хүлээн авна. Түүнээс гадна, Засвар механикийн заводын Цутгуурын цехийн өргөтгөлийн ажилд оролцох гурван үйлдэлт гүүрэн краныг шинээр угсарч байна. ОХУ-д үйлдвэрлэсэн уг кран нь 20, найман тонны хосолмол механизмтай, соронзон шайбаар ажиллах боломжтой, сүүлийн үеийн өргөх байгууламж юм. Шинээр ирсэн энэхүү краныг Засвар, угсралтын цехийн ажилчид угсарч, техникийн туршилт, тохируулга хийж байна.
 
М.Одгэрэл

   Эрдэнэт үйлдвэрийн Гал түймэр унтраах, аврах, гэрээт 58 дугаар ангиас жил бүр  зохион байгуулдаг Тулах цэг тэмцээнд нийт 8 багийн  48  алба хаагч  оролцож  барилга байгууламж, нуранги, газар доорх аврах ажиллагаа  гэсэн гурван төрлөөр явагдаж дүнгээ гаргалаа. Гал түймэр унтраах, аврах 58 дугаар ангийн бага дарга ахлах ахлагч  Б.Баянмөнх ахлагчтай баг 1-р байр, Гал түймэр унтраах, аврах 81 дүгээр ангийн салааны захирагч, дэслэгч Т.Сонинзаяа ахлагчтай баг 2-р байр, Гал түймэр унтраах, аврах 56-р ангийн аврах бүлгийн аврагч,  ахлах ахлагч Ч.Балданням ахлагчтай баг 3-р байрыг эзэллээ.  Тус тэмцээний шүүгчээр нурангийн төрөлд  ахлах дэслэгч Д.Цэрэн-Очир, ахлах дэслэгч Г.Болдбаяр, газар доорх аврах ажиллагааны төрөлд дэслэгч Г.Уртнасан, дэслэгч Б.Ганзориг, өндрийн аврах ажиллагааны төрөлд дэслэгч Б.Амарбаяр, ахлах ахлагч М.Ганзориг, ерөнхий шүүгчээр гал түймэр унтраах, аврах 58 дугаар ангийн захирагч хошууч А.Отгонбаяр нар ажиллалаа.  Тэмцээнийг хааж, хойд бүсийн төв, Орхон аймгийн Онцгой байдлын газрын дарга хурандаа Г.Ганбаатар:  Цаашид аврах ажиллагаа болон гал түймэр унтраах дадлага сургуулийг чанартай сайн хийж, гаргасан алдаа дутагдлаа ярилцаж,  алба хаагчид руугаа хандсан ур чадварыг сайжруулах тэмцээнийг сар бүр зохион байгуулахыг онцгой байдлын газрын удирдах бүрэлдэхүүн болон ангийн захирагч нарт үүрэг өглөө.  Мөн тэмцээний үеэр  2018, 2019 онд шинээр албанд томилогдсон нийт алба хаагчдын мэдлэг ур чадварыг дээшлүүлэх сургалт, дадлагын ажлыг зохион байгуулсан байна. 
 
 
 
 
 
 
 
 
 
А.Батбаяр
Фото: А.Батбаяр
   Эрдэнэт үйлдвэрт 6700 орчим ажилтан, ажилчид ажилладгаас хүнд нөхцөлд буюу үйлдвэрлэлийн бүсэд ажиллаж буй 5000 гаруй уурхайчдадаа халуун хоолны үйлчилгээг үнэ төлбөргүй үзүүлдэг.
   Хүнд нөхцөлд ажиллаж буй уурхайчид, ажилчид эрүүл, чанартай хоол хүнс хэрэглэх учиртай. Үйлдвэрийн газрын удирдлагын зүгээс энэ шаардлагыг халуун хоолны үйлчилгээ үзүүлж буй компаниудад хатуу тавин хянаж ажилладаг.  
   Ажилчдыг эрүүл, аюулгүй, шим тэжээллэг хоолоор хангах зорилготой ажилладаг Эрдэнэт үйлдвэрийн “Сэлэнгэ” амралт, аялал жуулчлалын цогцолборын “Сэлэнгэ катеринг”-ийн хамт олон ажилчдад халуун хоолоор үйлчилж эхлээд хоёр сар гаруй хугацаа өнгөрчээ.  Тайлант хугацаанд өдөр, орой, шөнө гэсэн гурван удаагийн давтамжтайгаар 26 цехийн 20 672   ажилтан албан хаагчдад халуун хоолны үйлчилгээ үзүүлсэн. Үүнээс ажлын өдөр дунджаар 423 ажилчин,  амралтын өдөр 179 ажилтанд  үйлчилжээ. 
   “Сэлэнгэ катеринг”-аар үйлчлүүлж буй ажилчдын эрүүл мэндийн урьдчилан сэргийлэх үзлэгийн тайлан мэдээг үндэслэн энгийн болон эмчилгээний хоолны 28 хоногийн төлөвлөгөөт цэс, технологи карт, материалын цэс, материалын цэсийн нэгтгэл зэргийг боловсруулж хоол үйлдвэрлэл үйлчилгээг явуулж байна.
   Катерингийн нэгж хоолны өртгийг тооцоолоход Дэлхийн эрүүл мэндийн байгууллагын болон Монголын Эрүүл мэндийн яамны хамтарсан зөвлөмж бичиг, Эрүүл мэндийн сайдын 2017 оны хоёрдугаар сарын 23-ны өдрийн А/74 дугаар тушаалыг үндэслэн,  нэг хүний өдөрт хүнсний бүтээгдэхүүнээс авах илчлэгийн хэмжээг 3900 ккал-р тодорхойлжээ.  Энэ тодорхойлолтод орсон багцалсан хүнсний бүтээгдэхүүн нь 13 төрлийн хүнсний бүтээгдэхүүнээс бүрддэг талаар “Сэлэнгэ” амралт, аялал жуулчлалын цогцолборын “Сэлэнгэ катеринг”-ийн дарга Б. Хантамир мэдээлсэн юм. 
   Тус хамт олон катерингийн  үйл ажиллагааг халуун хоолны сүлжээ хэлбэрт шилжүүлэн өргөжүүлэх, ISO-22001 Олон улсын стандартыг нэвтрүүлэхээр  ажиллаж байна. 
 
А.Бямбамаа
 
 
 
 
 
 
А.Бямбамаа
   Орон нутгийн үйлдвэрлэгчдийн орон зайд өөрийн байр суурийг олж, тогтвортой үйл ажиллагаа, найдвартай, шуурхай үйлчилгээгээр өнгө төрхөө тодорхойлсон резиний үйлдвэр ирэх сард 5 жилийн ойгоо тэмдэглэнэ. Монголдоо анхны бөгөөд ганц гэх тодотголтой “Мэйнспринг” ХХК-ийн хамт олныг “Эрдэнэтээ Дэмжье” булангийн ээлжит дугаарт урилаа. Тус компани үрэлт цохилтод тэсвэртэй, тээрмийн хуяг, тос, маслонд зориулсан гэх өндөр чанартай гурван төрлийн резин үйлдвэрлэж байна. Өргөжин тэлэх хүсэл тэмүүллээ өдрөөс өдөрт бүтээж яваа компанийн захирал С.Шижирбаатарын ярианаас үйлдвэрлэгчдийн зоримог алхмыг харж, өөр нэгэн шинэ санааг бодол оюундаа тусгаж авахыг зөвлөе. 
 
 
 
   -ТАНАЙ ХАМТ ОЛОНД ТАВАН ЖИЛИЙН ОЙН БАЯРЫН МЭНД ДЭВШҮҮЛЬЕ. ҮЙЛДВЭРЛЭГЧДИЙН ХУВЬД ОРОН НУТГИЙН ЖИЖИГ ЗАХ ЗЭЭЛД БАЙР СУУРИА ЭЗЭЛЖ, ХӨЛӨӨ ОЛНО ГЭДЭГ АМАРГҮЙ. ӨЧИГДРӨӨС ӨНӨӨДӨРТ ИРСЭН ЦАГ ХУГАЦААГ ЭРГЭН ХАРАХАД ЯМАР ӨНДӨРЛӨГТ ХҮРЭВ?
   -2008 онд манай компани худалдааны чиглэлээр үйл ажиллагаа явуулж байгаад 2013 оноос түүхий резиний төслийг боловсруулж, хэрэгжүүлсэн. Жилдээ 300 тонн хүртэлх түүхий резин үйлдвэрлэх хүчин чадалтай үйлдвэрийг тухайн онд ашиглалтад оруулж, 2014 оноос өнөөдрийг хүртэл Эрдэнэт үйлдвэрийн ханган нийлүүлэгчээр ажиллаж байна. Анх 3 хүний орон тоотой ажиллаж байсан. Өнөөдөр 16 хүнийг ажлын байраар хангах хэмжээнд өргөжин хөгжлөө. Бид үйл ажиллагаагаа өргөжүүлэх чиглэлээр энэ онд судалгааны ажлуудаа эхлүүлсэн.
   Эрдэнэт үйлдвэрийн захиалгаар анх 62:52 маркийн нэг төрлийн резин үйлдвэрлэж байсан бол захиалагчийн хэрэгцээ шаардлагыг үндэслэн тусгай зориулалтын резин гаргаснаар нэр төрлөө нэмэгдүүлсэн. Орон нутагт резиний үйлдвэр байгуулснаар Эрдэнэт үйлдвэрийн эдийн засагт ч тодорхой хувь нэмэр оруулж чадсан гэж бодож байна. 700-1500 цаг ажилладаг байсан гидроцеклон нь манай бүтээгдэхүүнийг ашигласнаар дунджаар 2100 цаг ажилладаг болсон тухай үйлдвэрийн ажилтан хэлж байсан. Өнөөдрийг хүртэл хамтдаа хөгжиж байгаа л гэж ойлгодог.  
 
   -ЗАХ ЗЭЭЛИЙН ХЭРЭГЦЭЭ, ШААРДЛАГЫГ ХЭРХЭН ОЛЖ ХАРСАН БЭ?
   -2012 онд судалгаа хийж үзэхэд Эрдэнэт үйлдвэр 12-14 ам.доллараар импортын резинэн бэлдэц авдаг байсан. Манайх дээрх үнийн түвшнийг зургаан ам.доллар хүртэл барьж, нийлүүлэлт хийснээр эдийн засгийн хэмнэлт талаасаа үр ашигтай, эх орны үйлдвэрлэлд хөрөнгө оруулалт хийсэн ажил болсон. Цаашлаад, Монгол улсын гадагшаа урсах валютын урсгалыг ихээхэн хэмжээгээр хумьсан гэж ойлгож болно. Дотоодын хөдөлмөр бүтээмж, өртөг шингэсэн бүтээгдэхүүн үйлдвэрлэх нь эдийн засагт үнэтэй хөрөнгө оруулалт болж байгаа гэдэгт итгэж байна.
 

 
   -САНААГАА ХЭРХЭН ОЛСОН ТАЛААР ХУВААЛЦАХГҮЙ ЮУ?
   -Компанийг үүсгэн байгуулагч Ш.Дэмбэрэл маань түүхий резиний хэрэглээг анх олж хараад Монголд үйлдвэрлэх боломжтой гэж үзсэн. Ингээд Орос, Хятадын үйлдвэрүүдээс туршлага судлахад аль аль нь шинж чанараараа давуу болон сул талуудтай байсан. Хятад улсын хувьд Малайз болон бусад халуун орноос түүхий эдээ татан авч резин үйлдвэрлэдэг нь биднийг “Яагаад өөрсдөө хийж болохгүй гэж” гэсэн зоримог алхам руу хөтөлсөн гэх үү дээ. Тоног төхөөрөмжөө Хятадаас аваад хийе гэж шийдсэн. Үүний үр дүнд Орос, Хятадын үйлдвэрлэсэн резинтэй харьцуулахад чанараараа хувь илүү бүтээгдэхүүн гаргасан. Тухайн үед банк, санхүүгийн байгууллагуудаас санхүүжилт босгон ажлаа эхэлж байлаа. 
 
   -САНААГ БОДИТ АЖИЛ БОЛГОХ АМАРГҮЙ. ЗАХ ЗЭЭЛД НИЙЛҮҮЛЭХ НЬ ХАМГИЙН ТОМ АЛХАМ БАЙХ?
   -Гол хэрэглэгч маань Эрдэнэт үйлдвэр байсан. Гаднаас авч байгаа резинийг нь дотоодоос хангана гэсэн зорилго тавьсны үндсэн дээр үйлдвэрийн үе үеийн удирдлагуудтай уулзаж, санаа бодлоо ойлгуулж чадсан. Тэд ч тодорхой хэмжээгээр дэмжлэг үзүүлж ирсэн. Эхний ээлжид нийт импортын 20-30 хувь, удалгүй 50-60 хувийг орлох бүтээгдэхүүнээр хангаж, сүүлийн жилүүдэд 100 хувь нийлүүлэлт хийдэг болсон. Өөрөөр хэлбэл, тухайн жилийн төлөвлөгөөнд тусгасан дүн ямар байна, тэр хэмжээгээр нийлүүлэлт хийх чадамжтай болсон. Энэ онд 120 тонн энгийн резин, 30 тонн тусгай зориулалтын резинээр хангах гэрээ байгуулсан. Манайх 2017, 2018 онуудад Улаанбаатар төмөр зам хувь нийлүүлсэн нийгэмлэгийн Резин цехийн захиалгаар бүтээгдэхүүн нийлүүлж байсан. Эрдэнэт үйлдвэртэй харьцуулахад төмөр замын салбарт хэрэглээ нь харьцангуй бага буюу жилдээ 3-4 тонныг л авдаг. Ямартаа ч бид чадсан, энэ бол баялаг бүтээгчдийн нэг бахархал.
 

   -ЦААШДЫН ЗОРИЛГО?
   -Дотооддоо эцсийн бүтээгдэхүүн үйлдвэрлэх боломжийг судалж байна. Манай бүтээгдэхүүний шинж чанар, үзүүлэлтийг тодорхойлоход автомашины дугуй хийх боломжтой гэсэн. Шинэ төрлийн ажилд сорилт хийж үзнэ. 

   -ҮЙЛДВЭРЛЭГЧ БАЙХЫН ДАВУУ БОЛОН СУЛ ТАЛ?
   -Эрдэнэт үйлдвэрийг түшиглэсэн хамтын ажиллагаа тасраагүй цагт бидэнд хөгжих боломж нээлттэй байна. Гагцхүү резиний технологич мэргэжилтэй хүн Монголд хуруу дарам цөөн. Энэ чиглэлээр хамгийн сайн мэргэжилтнүүд Эрдэнэт үйлдвэрийн Резиний тасагт ажиллаж байна. “Автобус 3” компани, Улаанбаатар төмөр зам резин цехтэй байсан, одоо хувийн хэвшилд ажилладаг ганцхан байгууллага бий. Бид хөгжлөө тодорхойлж, боловсон хүчний баазаа зузаатгах үүднээс хойд, өмнөд хөршид шинэ мэргэжилтэн бэлтгэх бодолтой байна. Төгсөх ангийн, энэ чиглэлээр сурах хүсэл сонирхолтой, тууштай ажиллах хүн бидэнд хэрэгтэй. Хоёр хүүхдэд санал тавьсан ч тоймтой хариу аваагүй л байна. Өнөөдрийн байдлаар гадаад мэргэжилтнээс тусламж авч, хамтран ажиллаж байна. Ажилтнаа сургаад авчихвал маш том боломж бидний өмнө нээгдэнэ. Мөн үйлдвэрлэгч нарт татварын хөнгөлөлт чухал байна. Томоохон хөшүүрэг болох нь гарцаагүй.
 
 
   -АЖИЛТНУУДЫНХАА НИЙГМИЙН АСУУДЛЫГ ХЭРХЭН ШИЙДДЭГ ВЭ?

   -Манайх жилдээ 300 тонн резин үйлдвэрлэх хүчин чадалтай. Энэ жилийн хувьд Эрдэнэт үйлдвэр 150 тонны гэрээ хийсэн. Ажилчдаа 100 хувь ажлаар хангаж байгаа ч сул зогсолт хийсэн үедээ цалинг нь өгдөг. Энэ нь ч тухайн айлд бодитой хөрөнгө оруулалт болж байна. Манайх 2-6 жил ажилласан туршлагатай ажилчдаа тогтоон, урт хугацаанд ажиллуулахыг эрмэлздэг. Хэдий жижиг үйлдвэр ч гэлээ 10 гаруй ам бүлийн амьжиргааны баталгааг хангаад л байдаг юм. 
 
   -СҮҮЛИЙН АСУУЛТЫГ ТАНД ҮЛДЭЭЕ?
   -Бидэнд итгэсэн. Итгэлийг алдахгүйн тулд бараа бүтээгдэхүүнийхээ чанар үзүүлэлтийг тогтмол сайжруулж байна. Монгол Улсын төсвийг бүрдүүлэхэд томоохон түлхэц болсон “Эрдэнэт үйлдвэр” үр бүтээмжтэй ажиллахад чадлынхаа хэрээр хувь нэмэр оруулах болно. Би хувьдаа олон мянган залуус шинийг сэтгэж, зах зээлд өрсөлдөх, импорт орлох бүтээгдэхүүн бий болгоосой гэж хүсдэг. Боломж нь хангалтай бий.
 
 
 
 
И.Чинтогтох
Фото: Б.Баттөгс
 
 
   Дэлхийн зах зээл дээрх зэсийн үнийн хэлбэлзэл, үнийн бууралт өсөлт тогтворгүй байх нь Эрдэнэт үйлдвэр төдийгүй зэс үйлдвэрлэгч томоохон компаниудын эдийн засагт сөргөөр нөлөөлөх нь дамжиггүй. Гэсэн хэдий ч Эрдэнэт үйлдвэрийн баялгийг бүтээгч уурхайчид, баяжуулагчдын хувьд хямралын эсрэг шат дараатай олон талт үйл ажиллагааг төлөвлөн, түүнийгээ бодитойгоор хэрэгжүүлснээр үйлдвэрлэлийн төлөвлөгөөт даалгавруудыг тогтмол 100-с дээш хувиар  биелүүлсэн амжилттай ажиллаж  байна. Техник технологийн дэвшил өдрөөс өдөрт хурдацтайгаар нэмэгдэн идэр настай Эрдэнэт үйлдвэрт  тоног төхөөрөмжийн шинэчлэлийг үе шаттай зохион байгуулж, амжилт ололтын дээдээр түүхийн хуудсыг  зузаалсаар л байна. Тэртээ 1978 онд Эрдэнэт гэдэг их айлын шавыг тавилцаж, Монголын өнцөг булан бүрээс олон зуун залуучууд мөр зэрэгцэн түүчээлж өнөөдрийн өндөрлөгт үйлдвэрийнхээ нэрийг мөнхжүүлсэн. 
   Илгээлт өвөрлөн, итгэл хүлээсэн хэсэг залуус Эрдэнэтийг зорихдоо дэлхийн хэмжээний томоохон үйлдвэрийн эзэд болно гэж санаа ч үгүй нь мэдээж. Гэтэл өнөөдөр 6000 гаруй ажилчидтай том өрх айл болж өсөн дэвжиж, Эрдэнэт үйлдвэрийн ажилчдын ар гэр, Орхон аймаг төдийгүй Улс орны эдийн засагт асар их хувь нэмэр оруулан дэлхий дахинд Эрдэнэт хэмээх эрхэм алдар нэрийг цуурайтуулсаар л байна. 
 

 
   Эрдэнэт үйлдвэрийн бүтцийн нэгжүүд өөр хоорондоо уялдаа холбоотой ажиллаж, зогсолтгүй эргэх тээрмийн хүрдний аясаар хөг нийлүүлэн хөгжил дэвшлийн төлөө тасралтгүй ажиллаж, нэн түрүүнд ослыг тэглэх эрхэм зорилгоо биелүүлэхийн төлөө өглөөний мандах нартай уралдан уурхайчид баяжуулагчид маань нэгдсэн автобусны цуваагаар уурхайн зүгт урагшилдаг. Техник, технологийн бүрэн бүтэн байдал үйлдвэрлэлийн тасралтгүй үйл ажиллагаанд нэн чухал. Үүнээс чухал нь техник, технологийг ажиллуулах чадварлаг баг хамт олон ажилчид, мэргэжлийн болон мэргэшсэн инженер техникийн ажилтнууд юм.  
   Эрдэнэт үйлдвэрийн захиргаа, удирдлагын багийнхан ажилчдынхаа нийгмийн асуудлыг нэн түрүүнд тавьж, аюулгүй зөв ажиллах орчин нөхцөл, амьдрах орон сууц, сурч боловсрох сургууль, эмнэлэг, спортын болон соёлын ордон гээд л Монгол улсын хэмжээнд хаана ч байхгүйгээр нийгмийн асуудлыг хариуцлагатайгаар анхаарч ирсэн нь нийгмийн өмнө хүлээсэн үүргээ амжилттай биелүүлж байгаагийн жишээ. Түүнчлэн ажилчдын ар гэр, үр хүүхдэд зориулсан сургууль, цэцэрлэг, амарч сувилуулах цогцолбор, зуны дэлгэр цагт саам эмчилгээ, цас оруулагч бүхий цанын бааз, амралтын бааз гээд л ажилчид алжаал ядаргаагаа бүрэн тайлах, эрүүл ажиллах нөхцөл бололцоог хангаж өгсөн байдаг. 
   Хөдөлгөөн эрүүл  мэндэд чухал үүрэг гүйцэтгэдэг. Иймээс эрүүл  мэндийн зам байгуулж, ажилчид дугуйтай болон явганаар алхаж ажилдаа ирж буцах нь идэвхтэй хөдөлгөөн гэдгийг онцлох нь зүйтэй болов уу. 
   Эрдэнэт уулын минь буян их ээ. Эрдэнэтийг дагасан хот сүндэрлэж жилээс жилд хүн амын тоо өсөн нэмэгдэж Эрдэнэт уулын хаяанд ард иргэд амар тайван ажиллаж амьдарсаар л байна. Уул уурхайн салбарынхны сэтгэлийг зовоодог нэг асуудал нь уул уурхайн нөхөн сэргээлт. Эрдэнэт үйлдвэрийн бүтээлч хамт олон уул уурхайн нөхөн сэргээлтэд ихэд анхааран, шат даараатай олон талт ажлуудыг хийсний нэг нь “Ногоон төгөл” төсөл юм. Эрдэнэт үйлдвэрийг тойрсон хэдэн арван га талбайг зүлэгжүүлэн, мод, бут тарьж , цех нэгжүүд өөрсдийн талбайгаа   хариуцан модны ургалтад ихэд анхааран усалгаа, арчилгаа хийж, мод үрслүүлэх нь уурхайчдын хийх ёстой жирийн л нэг ажил болж чадсан нь сайн талтай. 
   Эрдэнэт уулын гүн жилээс жилд доошлох нь уул геологийн нөхцөл байдалд нөлөөлөх нь мэдээж. Гэсэн хэдий ч  Эрдэнэт үйлдвэрийн ажилчид үйлдвэрлэлийн тасралтгүй, найдвартай үйл ажиллагааг ханган, төлөвлөгөөт даалгавруудыг амжилттай биелүүлэн жилээс жилд хүдэр ачилт, хүдэр  олборлолтын төлөвлөгөө өсөн нэмэгдэж байна.  
 

 
   Ололт амжилт бүхэн уурхайчдыг хурцлан, илүү ихийг хийх бүтээх санал санаачилгыг төрүүлэх нь оюуны бүтээл олноор төрөхөд нөлөөлжээ. Иймдээ ч Эрдэнэт үйлдвэрийн Ерөнхий захирлын нэрэмжит Инноватор цомын эзэн багийг тодруулан 100 сая төгрөгийн эзэд тодорч байсныг онцлох нь зүйтэй. Сүүлийн гурван жил ажилчдын энэхүү оюуны бүтээлийг шалгаруулж, ажилчдын оролцоо нэмэгдэж, эдийн засгийн хувьд асар их хэмнэлт бүхий санал санаачлалыг үйлдвэрлэлд нэвтрүүлэн үр дүнгээ өгсөөр байна. 
   Дөчин хоёр намрыг хамтдаа угтаж байгаа тус хамт олон хэмнэлтийн бодлогыг амжилттай хэрэгжүүлж дэлхийн зах зээл дээр өрсөлдөх, өөрийн эзлэх байр суурийг Эрдэнэт үйлдвэр бататгаж чадлаа. Үүнтэй зэрэгцэн ажилчдын цалин хөлс, бодит орлогыг нэмэгдүүлэн жилд хоёр удаа ажилчдын үндсэн цалинг нэмэн, үр дүнгийн урамшуулал, ур чадварын нэмэгдэл зэргээр ажилчдыг үнэлэн урамшуулах нь бас л Монгол улсын хэмжээнд аль ч  салбарт, аль ч албан газар байхгүй үйл ажиллагаа болсон юм. 
   Ажилдаа дуртай, хайртай байх нь ажлыг ЗӨВ хийх дадал зуршилд хүргэж байгаа гэдгийг Эрдэнэт үйлдвэрийн ажилчид хэдийн ойлгожээ. Энэ ч утгаар сайн ажиллавал төдий чинээ цалин хөлс нэмэгдэж, ая тухтай амьдрах боломжтой гэдэг зөв арга барилыг түгээн дэлгэрүүлсэн “ЗӨВ” алхам болсон юм. Иймээс ч ажилчид ЗӨВ амралт, ЗӨВ үйлд суралцан хөдөлмөрийн аюулгүй байдал эрүүл ахуйг эрхэмлэн аюулгүй ажиллагаанд суралцах нь Эрдэнэт үйлдвэрийн ажилчдын эрхэм зорилгын нэгдэл юм. 
   Он цагийн урсгалд салбартаа түүчээлэн ирсэн Эрдэнэт үйлдвэрийн баг хамт олон нэгэн санаа зорилготой байж, анхдагч, ахмадууд, дунд үе, залуу үе гээд гурван цагийн хэлхээнд сүлжээг нь тааруулан урагшилсаар л байна. Эрдэнэт үйлдвэрийн захиргаанаас үйлдвэрийнхээ ажилчид,  үйлдвэрийн Ахмадын нэгдсэн зөвлөл, Эмэгтэйчүүдийн холбоо, Үйлдвэрчний эвлэлийн холбоо, Залуучуудын холбоо зэрэг олон нийтийн байгууллагуудтай нягт уялдаа холбоотой ажиллаж Хамтын гэрээгээр зохицуулагдан нийт ажилчдын эрх ашиг, нийгмийн асуудалд анхааран хамтран ажиллаж байгаа нь сайшаалтай. 
   Идэр настай их үйлдвэрийн бүтээн байгуулалтад гар бие оролцож өнөөдөр гавьяаныхаа амралтад гарсан азай буурлуудаас төр нийгмийн зүтгэлтэн, төрийн шагналт, хөдөлмөрийн сайчууд олноор төрөн, өнөөдөр үр бүтээлтэй ажиллаж байгаа олон мянган ажилчид үйлдвэрийн түүхийг өнгөлсөөр л байна. 
   Өдрөөс өдөрт техник, технологийн дэвшил хурдацтай тархаж байгаа энэ үед дэлхий нийтийн жишигтэй хөл нийлэн техник технологийн хувьслыг Эрдэнэт үйлдвэрт нэвтрүүлэн нутаагшуулсаар л байна.  Үүнтэй зэрэгцэн үйлдвэрлэлийн тасралтгүй үйл ажиллагааг ханган, Эрдэнэт үйлдвэрийн үйлдвэрлэлийн төлөвлөгөөт үзүүлэлтүүд сар бүр даван биелж, хамтын хүчээр Монгол улсын эдийн засагт асар их хувь нэмрээ оруулсаар байна. Зуун зуунаар дурсагдах алдар гавьяаны эзэд, уурхайчид баяжуулагчдын нөр их хичээл зүтгэлийг бид мартах учиргүй ээ. Эрдэнэт үйлдвэрийн түүхийг уурхайчид баяжуулагчид бид бичилцсээр л байна...
 
                                                                                                                     А.Бямбамаа
 

Мэдээний төрөл

Календарь

« 10-р сар 2019 »
Да Мя Лх Пү Ба Бя Ня
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Зургийн цомог