“Эрдэнэт үйлдвэр” ТӨҮГ-ын Хүний нөөц, захиргааны хэлтсийн дарга О.Отгонбаяр хүний нөөцийн мэргэжилтнүүд шинэ ажилтнуудтай Багш-шавийн гэрээ байгуулах өглөөний уулзалтын үеэр үүнийг онцолсон юм. Шинэ ажилтнууд байгууллага, хамт олны дунд дасан зохицох хугацаанд Багш-шавийн гэрээ байгуулж, хамтарч ажиллах нь хүний нөөцийн тогтворжилт, дараагийн ур чадвартай, үнэ цэнтэй ажилтан бэлтгэх үндэс суурь болдог байна. Шинэ ажилтнууд ч хоёр талаасаа гэрээ байгуулж, үүрэг амлалт авч ажилласнаар хариуцлага өндөр тавигдахын зэрэгцээ багштай болох нь сэтгэл зүйн хувьд түшиг тулгууртай, өөртөө итгэлтэй болдог гэж ярьсан юм. Эхний ээлжинд шинэ ажилтнуудад ур чадварын оношилгоо хийж, түвшин тогтоосны үндсэн дээр дутуу ур чадварыг нь хөгжүүлэх үйл ажиллагааг багшаар нь дамжуулан хэрэгжүүлдэг онцлогтой.
Эрдэнэт үйлдвэрийн Хүний нөөц, захиргааны хэлтэс шинэ ажилтнууддаа зориулсан өглөөний уулзалтыг уламжлал болгон гурав дахь жилдээ өнөөдөр 06.30-08.00 цагт зохион байгууллаа. Эртэч мэргэжилтнүүд уулзалтынхаа үеэр үйлдвэрийн газрын соёл, ажлын онцлог, “Change management” group буюу 10 жил амжилттай хэрэгжиж буй бүтээмжийн үйл ажиллагааны талаар танилцуулга мэдээлэл хийж, 2023 оны Багш-шавийн гэрээний хэрэгжилтийг дүгнэн, ажлын гүйцэтгэлээр тэргүүлсэн шилдэг багш, шавийг тодруулав. “Шилдэг багш ажилтан”-аар Дотоод зохион байгуулалт, албан хэрэг хөтлөлтийн албаны дарга Б.Мөнхцэцэг, “Шилдэг шавь ажилтан”-аар тус албаны мэргэжилтэн Э.Цацрал шалгарч, урамшуулал хүртлээ. Мөн Хүний нөөцийн менежментийн тогтолцоо ISO 30400 олон улсын багц стандартын бүрдүүлэлтийн аргачлал, шаардлагыг хангах зорилгын хүрээнд энэ онд багш шавийн барилдлагатай ажиллах Хүний нөөцийн албаны хоёр ажилтан, Төрөлжсөн архивын 22 ажилтан гэрээ байгуулж, хамтын хөгжлийн эхлэлээ албажуулсан юм.
Нар минутад мандаж минутад жаргана.
Үс засуулвал: 
Суудал: 
