Нийгмийн хариуцлагаар манлайлагч “Эрдэнэт үйлдвэр” ТӨҮГ-аас өвөлжилт, хаваржилт хүндэрсэн, зуд турхантай бүс нутагт тусламж, дэмжлэг үзүүлсээр байна. Баялаг бүтээгчид “Малчин түмэндээ тусалъя” хандивын аян өрнүүлэн цуглуулсан мөнгөнөөс Орхон аймгийн Онцгой комисст 50 сая төгрөг, Булган аймгийн Онцгой комисст 30 сая төгрөг хандивлалаа. Энэ үеэр Булган аймгийн Засаг даргын орлогч Д.Жаргалсайхантай уулзаж, цаг үеийн нөхцөл байдлыг тодрууллаа.
-Булган аймагт өвөлжилт, хаваржилт хэр байна вэ?
-Манай аймгийн нутгаар ерөнхийдөө өвөлжилт өнөтэй сайхан байсан. Сүүлийн нэг, хоёр сараас урд талын дөрвөн суманд цас их унаж, хүйтэрч, цасан шуурга болж, зудын эрсдэлтэй байгаа. Дээр нь Сайхан, Могод сум, Баян-Агт сумын урд хэсгээр одоогоор хүндэрсэн байдалтай байна.
-Зуд турхантай энэ хүнд үед танай аймгийн малчдад тусламж болгон Эрдэнэт үйлдвэрийн Уурхайчид 30 сая төгрөг хандивлалаа. Үүнийг хэрхэн зарцуулах вэ?
-“Эрдэнэт үйлдвэр” ТӨҮГ-ын Уурхайчид нэгдэж, хандивын аян өрнүүлж, сайхан сэтгэл гаргасанд бид баяртай байна. Эрдэнэт үйлдвэр, манай аймагтай олон чиглэлд хамтран ажилладаг. Үүний нэг илрэл нь малчдыг хүндрэл бэрхшээлтэй үед үзүүлж буй энэхүү дэмжлэг туслалцаа. Энэ дэмжлэгийг бид өвс тэжээл худалдан авах, мөн өвс тэжээлийг малчин өрхдөө хүргэх бензин шатахууны зардалд зарцуулна. Түүнчлэн, малчдадаа зам харгуй гаргах, бэлчээр, хаваржааг цаснаас чөлөөлж, цэвэрлэх ажил нэлээн өргөн далайцтай хийгдэж байгаа. Энэ бүхэнд хүн хүч, хөрөнгө мөнгө дутагдаж байгаа энэ хүнд үед тусалж байгаа Уурхайчдадаа баярласнаа дахин илэрхийлье.
-Булган аймаг, “Эрдэнэт үйлдвэр” ТӨҮГ-ын хамтын ажиллагааны хүрээнд хэрхэн ажиллаж буйг та товч дүгнэн хэлнэ үү?
-Бид олон салбарт хамтарч, хамтын ажиллагааны гэрээ байгуулан ажилладаг. Оюутан сурагчдаа сургахаас эхлэн, цэцэрлэг сургуулийн өргөтгөлийн барилгыг барьж байгуулахад Эрдэнэт үйлдвэр тусламж үзүүлсээр байгаа. Тухайлбал Хангал суманд цэцэрлэг барьж өгч ашиглалтад оруулаад нэг жилийн нүүр үзэж байна. Мөн Эрдэнэт үйлдвэрээс манай аймагт Хүүхдийн зуслан барьж өгөхөөр ажиллаж байгаа. Энд тодорхой хөрөнгө оруулалт хийж, гүйцэтгэл өндөр хувьтай яваа. Эрдэнэт үйлдвэр Нийгмийн хариуцлагын хүрээнд манай аймагт жил бүр Нэг тэрбум төгрөгийн хөрөнгө оруулалт хийх гэрээтэй бөгөөд энэ нь бидний ажилд томоохон дэмжлэг, үр дүнгээ өгсөн сайхан ажил болдог.
-Эрдэнэт Хялганатыг холбосон хатуу хучилттай замын бүтээн байгуулалт тухайн газар нутгийн иргэдэд томоохон дэм болсон байх?
-Тиймээ. Зам дагаж хөгжил ирдэг. Үүнд түүчээлэн ажиллаж буй “Эрдэнэт үйлдвэр” ТӨҮГ-ын хамт олонд талархаж байна. Булган аймгийн Хангал сум, Хялганат хорооны иргэдийн амьжиргаа, нийгмийн амьдралд энэ бүтээн байгуулалт маш их тус дэм болж байгааг тэмдэглэн хэлэхэд таатай байна.
-Баярлалаа. Та бүхэн зуд турхныг иргэд, хамт олны сайн санааны хүч, өөрсдийн хөдөлмөр, зүтгэлээрээ амжилттай давж, урин хавартай золгоорой.
Нар минутад мандаж минутад жаргана.
Үс засуулвал: 
Суудал: 
