“Сэлэнгэ” амралт, аялал жуулчлалын цогцолборын “Найрамдлын Эрдэнэс” хүүхдийн зуслангийн 2024 оны зуны үйл ажиллагааг эхлүүлэх бэлтгэл ажлын хэсэг өнгөрөгч баасан гарагт хуралдлаа. Энэ үеэр “Найрамдлын эрдэнэс” зуслангийн зуны зориулалттай модон байрны ашиглалт дууссаныг шинэчлэх, “Сэлэнгэ” амралтын бааз дахь 210 ортой зочид буудлыг ашиглалтад оруулах тухай СААЖЦ-ын удирдлагуудын саналыг сонсож хэлэлцэв.
Зуслангийн барилгуудыг дээврийн болон бусад засвараар аргацааж, зардал гаргаснаас барилгын норм дүрмийн дагуу дүгнэлт гаргуулж, шинээр барих нь зүйтэй гэдэг дээр ажлын хэсгийн гишүүд санал нэгдсэн. Түүнчлэн, “Найрамдлын Эрдэнэс” зуслангийн хүүхдийн ундны усны цэвэр, аюулгүй байдлыг хангах зорилгоор Германы технологиор ус цэвэршүүлэх төхөөрөмж суурилуулах саналыг дэмжлээ.
Энэ дашрамд, СААЖЦ-ын “Сэлэнгэ” катерингийнхан үйлдвэрийн ажилчдад халуун хоолоор хэрхэн үйлчилж байгаа тухайгаа танилцуулж, нэг хүний өдрийн хоолны үнэ тариф 13500 төгрөг байгааг нэмэгдүүлэх үндэслэл, саналаа хэлэлцүүллээ.
Хуралдааны үеэр СААЖЦ-ын дарга И.Жаргалсайхан, “Манай зуслан байгуулагдаад 43 дахь жилдээ ажиллаж байна. Бид зуслангийн 2-р байраа өвөл ашиглахын тулд гаднаас нь болон дотроос нь янз бүрийн дулаалга хийсэн ч 27 хэмийн хүйтэн болоход л дулаанаа барих нь тааруухан байдаг. Иймээс 210 ортой зочид буудлаа ашиглалтад оруулах, мөн хүүхдийн зуслангийн байраа шинэчлэх шаардлагатай байгаа юм. Үйлдвэрийн удирдлага маань хүүхдийн төлөө “За” гэж хэлж, зуслангийн 310 ортой байр, 500 хүүхэд нэг дор хооллох хүчин чадалтай хоолны заалыг барьж өгнө гэдэгт бид итгэлтэй байгаа. Манай зуслангийн цэвэр усны шугам муудаж, зэвтэй ус гарах зэргээр хүндрэлтэй байсан. Өнөөдрийн хуралдаанаар ус цэвэршүүлэх орчин үеийн төхөөрөмж суурилуулах асуудлыг шийдвэрлэсэнд бид баяртай байна. Түүнчлэн, цар тахал, санхүүгийн бэрхшээлээс түр царцаагдсан зочид буудлын барилгыг ч үйлдвэрийн удирдлага маань авч хэлэлцэж, ашиглалтад оруулна гэдэгт найдаж байна” гэв.