Тавдугаар сарын нэгний энхийг бэлгэдсэн энэ өдөр Эрдэнэт үйлдвэрийн Орос 12 дугаар цэцэрлэгийн хамт олон “Хүүхдийн хөгжлийг дэмжих” сарын аяны нээлтээ хийлээ. Энэ нийгмийн эд эс бүхэн хүүхдийн боловсрол, хүмүүжил, аюулгүй байдалд анхаарал хандуулж, үүрэг оролцоогоо нэмэгдүүлэх нь өндөр ач холбогдолтой болохыг мэдрүүлэх үүднээс аяны хүрээнд “Хүүхэд насанд хүргэж өгдөг галт тэрэг” үйл ажиллагааг өнөөдрөөс эхлүүлж байна.
Эрдэнэт үйлдвэрийн нийгмийн цехийн удирдлагууд эхний “галт тэрэг”-ээр зорчин, цэцэрлэгийн насандаа эргэн очиж, сургалт, хүмүүжлийн үйл ажиллагаанд оролцож, хоолны амталгаа хийлээ. Тэд хүүхэд насаа эргэн дурсах нэгэн гэгээн өдрийг бэлэглэсэн Орос цэцэрлэгийн хамт олонд чин сэтгэлийн талархал илэрхийлсэн юм.
Хүүхдэд боловсрол олгох үйл явцыг нэгж бүрд хүргэх, цэцэрлэгийн үйл ажиллагааг сурталчлах нөлөөллийн энэхүү ажилд үйлдвэрийн удирдлагууд, эцэг эхчүүдийг хамруулахаар зорьж байгаагаа тус цэцэрлэгийн эрхлэгч Ивченкова Елена Владимировна ярилаа.
Энэ хичээлийн жилд Орос 12 дугаар цэцэрлэгийн хамт олон эцэг, эхчүүдэд сэтгэл зүйн боловсрол олгох цуврал сургалт зохион байгуулж, хүүхэд хөгжүүлэх арга зүйн зөвлөгөө өгч ажиллажээ. Мөн 2024 оныг улсын хэмжээнд хүүхэд хамгааллын жил болгон зарласантай холбогдуулан Орхон аймгийн Цагдаагийн газар, эцэг эхчүүдтэй хүүхдийн хүчирхийллийн эсрэг, хүүхэд хамгааллын гурвалсан гэрээ байгуулан ажиллаж байна. “Эрүүл шүд” үндэсний хөтөлбөрийн шилдгээр шалгарсан тус цэцэрлэгийн 11 бүлэгт өнөөдөр Эрдэнэт үйлдвэрийн ажилтнуудын 280 хүүхэд сурч, хүмүүжиж байна.