Эрдэнэт үйлдвэрийн Ерөнхий захиргааны нэг хоёрдугаар байрны удирдах шатны ажилтнууд өглөө бүр цахим зөвлөгөөн зохион байгуулж өмнөх өдрийн үйлдвэрлэлийн төлөвлөгөөт ажлуудаа хэлэлцэж тухайн өдрийн ажлаа төлөвлөн зөвлөлдөг. Энэ сарын 20-нд болсон үйлдвэрийн цахим зөвлөгөөнийг Эрдэнэт үйлдвэрийн Ерөнхий захирлын үйл ажиллагаа хариуцсан дэд захирал бөгөөд Ерөнхий инженерийн үүрэг гүйцэтгэгч Д.Эрдэнэцогт удирдаж явууллаа. Зөвлөгөөн уламжлал ёсоор Үйлдвэр техникийн газрын мэдээллээр эхэллээ. Үйлдвэр техникийн газрын дарга П.Батболор үйлдвэрлэлийн үндсэн төлөвлөгөөт үзүүлэлтүүд жигд биелсэн амжилттай байгаа тухай мэдээллийг өглөө.
Эрдэнэт үйлдвэрийн хэмжээнд эрчим хүчний систем болон үйлдвэрлэлийн бүхий л үндсэн тоног төхөөрөмжүүд хэвийн ажиллаж байна. Дулаан цахилгааны төвийн өргөтгөлийн ажлын хэсэг, их зогсолтын бэлтгэл ажлыг хангах ажлын хэсгийнхэн хуваарийн дагуу ажил үүргээ гүйцэтгэж байгаа тухай үйлдвэрийн Ерөнхий эрчим зүйч Ш.Төрбат мэдээллээ. Ерөнхий механикийн хэлтэс, ХАБЭАБОХХ, Чанар хяналтын хэлтэс болон үндсэн дөрвөн цехийн удирдлагууд үйлдвэрлэлийн үйл ажиллагааны явцын тухай мэдээлсэн юм. Хүдрийн агуулга хэвийн явагдаж технологийн горимд болон хөдөлмөрийн аюулгүй байдал эрүүл ахуйн ямар нэгэн зөрчил дутагдалгүй ажиллаж байна. Өнөөдрийн байдлаар дэлхийн зах зээл дээр нэг тонн зэсийн үнэ 5673 ам доллар тонн байна гэж Эрдэнэт үйлдвэрийн Худалдааны хэлтсийн дарга Н.Энхбаатар мэдээллээ.
Эрдэнэт үйлдвэрийн удирдах шатны шуурхай зөвлөгөөн өнгөрөгч даваа гаригт болж, шуурхай зөвлөгөөнөөс гарсан шийдвэрийн дагуу зохих арга хэмжээ авч ажиллаж байгааг Эрдэнэт үйлдвэрийн Захиргаа хүний нөөцийн хэлтсийн дарга О.Хонгор мэдээлж, үйлдвэрийн тасралтгүй үйл ажиллагаа, эрх ашгийн үүднээс боловсон хүчний зарим өөрчлөлт хийсэн тухай үйлдвэрийн удирдлагуудад танилцуулсан юм.
2018 оны үйл ажиллагааны төлөвлөгөө боловсруулах тушаалын төсөл бэлэн болсон байна. Бизнес төлөвлөгөөний хугацаа шахуу байгааг үйлдвэрийн удирдлагуудад анхааруулж есдүгээр сарын 11-н гэхэд эхний мэдээллүүд нэгтгэн гарсан байхаар зохион байгуулж, аравдугаар сарын 15-нд 2018 оны үйл ажиллагааны төлөвлөгөөг эцсийн байдлаар гаргаж арван нэгдүгээр сард Эрдэнэт үйлдвэрийн Төлөөлөн удирдах зөвлөлд танилцуулна гэдгийг Эрдэнэт үйлдвэрийн Эдийн засгийн хэлтсээс мэдээллээ. Энэ сарын 22-нд Монголын мэргэшсэн нягтлан бодогчдын институттэй хамтран үйлдвэрлэлийн өртөг, зардлын арга зүйн тухай сургалтыг үйлдвэрийн бүтцийн нэгжүүдийн эдийн засагчдын дунд зохион байгуулахаар болжээ. Эрдэнэт үйлдвэрийн ерөнхий захирлын Нийгмийн асуудал хариуцсан дэд захирлын үүрэг гүйцэтгэгч Д.Дэлгэрбаяр үйлдвэрийн нийгмийн цехүүдийн үйл ажиллагаатай танилцсан байна. Зуны улирал эхэлж сургууль, цэцэрлэгийн үйл ажиллагаа зогссонтой холбогдуулан их засвар хийгдэж байгаатай газар дээр нь үзэж танилцжээ.
Эрдэнэт үйлдвэрийн үйлдвэрлэлийн тасралтгүй найдвартай үйл ажиллагаанд техник, тоног төхөөрөмжийн найдвартай ажиллагаа чухал гэдгийг Эрдэнэт үйлдвэрийн Ерөнхий захирал Х.Бадамсүрэн онцлон, Эрдэнэт үйлдвэрийн хэмжээнд техник технологийн хангамжийн асуудал хүндрэлтэй байгаатай уялдуулан хангамжийн асуудалд анхаарал тавин оролцохыг Эрдэнэт үйлдвэрийн Ерөнхий захирлын Үйл ажиллагаа хариуцсан дэд захирал бөгөөд Ерөнхий инженерийн үүрэг гүйцэтгэгч Д.Эрдэнэцогтод үүрэг болголоо. Түүнчлэн хангамжтай холбоотой хурал, зөвлөгөөнд Ерөнхий захирал өглөө бүр өөрийн биеэр хамтран оролцож, хангамжийн асуудлыг онцгойлон авч ажиллахаар боллоо.
Эрдэнэт үйлдвэрийн ажилчдын үндсэн цалинг тавдугаар сарын нэгнээс 10 хувиар нэмсэн, үндсэн цалин ажилчдын орлого нэмэгдсэн бодит үзүүлэлт гэдгийг Ерөнхий захирал Х.Бадамсүрэн онцлон хэлж, ажилчдын үр ашгийг нэмэгдүүлэх тэдний бүтээлч санаачилгыг нэмэгдүүлэх, өртөг зардлаа бууруулах, орлогоо нэмэгдүүлэхэд бүрэн гүйцэт хөшүүрэг болж хараахан чадахгүй байна гэж дүгнэжээ. Иймээс Эдийн засгийн хэлтсээс явуулсан судалгаа шинжилгээтэй Ерөнхий захирал танилцсан байна. Судалгаанаас харахад Эрдэнэт үйлдвэрийн хэмжээнд нийт үндсэн цалингийн сангийн ес орчим хувь нь ажилчдыг урамшуулах чиглэлд зориулагддаг байна. Энэ нь хангалттай хөшүүрэг болж чадахгүй байна гэж үзэн ирэх долоо дугаар сарын нэгнээс цалин хөлсний бүрэлдэхүүн хэсэг болох ажлын үр дүнгийн урамшууллын сангийн хэмжээг 20 хүртэл хувиар нэмэгдүүлэх тушаалыг гаргалаа. Энэ нь Эрдэнэт үйлдвэрийн захиргаанаас нийгмийн хариуцлагынхаа хүрээнд үйлдвэрийн ажилчдын цалин хөлс урамшууллыг нэмэгдүүлэн ажиллаж байгаагийн тод жишээ болж байна.
Монгол улсын Ерөнхийлөгчийн сонгууль болон улсын их баяр наадамтай холбогдуулан үйлдвэрлэлийн хэвийн үйл ажиллагааг ханган ажиллах тушаалын төсөл гарсан байна. Цахим шуурхай зөвлөгөөний төгсгөлд Эрдэнэт үйлдвэрийн Ерөнхий захирал Х.Бадамсүрэн их зогсолтын бэлтгэл ажил, түүнд хэрэгцээтэй хангамжийн асуудалд онцгой анхаарал хандуулан ажиллахыг үйлдвэрийн цех нэгжүүдийн удирдлагуудад санууллаа.