Хамтын ажиллагааны гэрээний хүрээнд П.Н.Шастины нэрэмжит Улсын гуравдугаар төв эмнэлгийн нарийн мэргэжлийн эмч нарын баг Эрдэнэт үйлдвэрт ажиллаж байна. Үзлэг, оношилгооны үеэр тус эмнэлгийн Зүрх судасны тасгийн эрхлэгч Л.Аръяасүрэн уулзаж, цөөн хором ярилцлаа.
-Үзлэг ямар зохион байгуулалтаар явж байгаа вэ?
-Бид Зүрх судасны тасгийн эрхлэгч, Мэдрэл судлалын тасгийн эрхлэгч, Уушги судлалын тасгийн эрхлэгч, Зүрхний шигдээс буюу судсан доторх оношилгоо эмчилгээний тасгийн эмч гэсэн бүрэлдэхүүнтэй ирсэн. Өнөөдөр хоёр дахь өдрөө ажиллаж байна. Эрдэнэт үйлдвэрийн эмч нарын хяналтад байдаг, гуравдугаар шатлалын оношилгоо, эмчилгээ авах зайлшгүй шаардлагатай өвчтөнүүдээ чиглэл чиглэлээр бэлтгэсэн байсан. Өнөөдөр гэхэд 60-аад хүн үзэж, эмчилгээ зөвлөгөө өглөө.
-Үзлэгээр гуравдугаар шатлалын оношилгоо, эмчилгээ шаардлагатай хэчнээн хүн байна вэ?
-Үзлэгт хамрагдсан нийт хүмүүсийн 90 орчим хувь нь гуравдугаар шатлал руу шилжүүлж эмчилгээ хийх зайлшгүй шаардлагатай хүмүүс байна. Зүрхний хэм алдалтын эмчилгээ, нарийн мэргэжлийн хагалгаануудыг хотод очоод багийнхантайгаа ярьж байгаад төлөвлөж шийдвэрлэнэ.
-Эрдэнэт үйлдвэрийн ажилчдад зүрхний ямар төрлийн өвчлөл зонхилж байна вэ?
-Бүх ажилчдыг үзлэгт хамруулаагүй болохоор хэлж мэдэхгүй байна. Гэхдээ зүрхний эмчтэй ярилцахад жингийн илүүдлээс үүдэлтэй зүрхний өвчлөл зонхилж байгаа гэсэн. Бас тамхидалт, цус өтгөрөлтэй холбоотой өвчлөл байна. Эрдэнэт үйлдвэр ажилчид руугаа чиглэсэн эрүүл мэндийн үйлчилгээг хангалттай сайн явуулдаг. Түүнээс гадна бассейн, фитнес гээд бүхий л боломжоор хангасан газар. Тиймээс үйлдвэрийн ажилчид цаг заваа гаргаад жингийн асуудалтайгаа тэмцэх хэрэгтэй. Эмч товлолт цагаар үзэж хяналтаа тавьдаг ч зарим ажилчид цагтаа ирдэггүй сул тал байна. Зүрхний өвчлөл даамжрахаас урьдчилан сэргийлэх боломж бий.
-Эрдэнэтчүүд Улсын гуравдугаар төв эмнэлэгт үзүүлэхээр бол яаж холбогдох вэ?
-П.Н.Шастины нэрэмжит Улсын гуравдугаар төв эмнэлэгт үзүүлэхдээ таван газраас цаг авах боломжтой. Нэгдүгээрт утсаар, хоёрдугаарт И-Монголиа, гуравдугаарт эмнэлгийн лавлах төвөөс, дөрөвдүгээрт биеэр очиж, тавдугаарт 21 аймгийг нэгтгэсэн программд бүртгүүлж цаг авч болно. Энэ программд Орхон аймаг, Д.Оюундэлгэр эмч нэгдсэн байгаа.
-Баярлалаа.