“Эрдэнэт үйлдвэр” ТӨҮГ-ын нийгмийн цехүүд үйл ажиллагаагаа сурталчлах сарын аяныг цувралаар зохион байгуулж байна. Өнгөрсөн сард Соёл, урлагийн цогцолборын уран бүтээлчид “Аз жаргалаа түгээе” уриан дор олон сайхан үйл ажиллагаа, тоглолт, уулзалт, эвент хийж сэтгэлийн цэнгэл эдлүүлсэн. Одоо Оёдлын цехийн нэрэмжит сар эхэлж байна. Дөрөвдүгээр сарын турш ямар ажлууд зохион байгуулахаар төлөвлөсөн талаар болон ажлын хувцасны үйлдвэрлэл, ханган нийлүүлэлтийн асуудлаар тус цехийн дарга Ж.Мөнх-Оргилтой ярилцлаа.
-Цехээ сурталчлах сарын аяны хүрээнд ямар ажлууд хийхээр төлөвлөсөн бэ?
-Бид зөвхөн дөрөвдүгээр сард гэлтгүй, 2023 оны турш “Чанарыг эрхэмлэе” уриан дор үйл ажиллагаагаа явуулна. Харин цехээ сурталчлах сарын аяны дөрвөн долоо хоногт хэрэгжүүлэх дөрвөн дэд хөтөлбөр, төлөвлөгөө гаргаад ажиллаж байна. Дөрөвдүгээр сарын 03-ны өдрөөс агуулахаас ажлын хувцас олгож эхэлнэ. Бид өнгөрсөн сард өндөр бүтээмжтэй ажиллалаа. Агуулахыг хувцсаар дүүргэсэн. Хувцас олгоод эхлэхэд мэргэжлийн оёдолчин дэргэд нь ажиллаж, хувцас засварлах үйлчилгээ үзүүлнэ. Мөн энэ өдөр Ерөнхий захиргааны нэгдүгээр байрны үүдний хэсэгт ажлын хувцасны үзэсгэлэн дэлгэгдэж, сарын аяны нээлт болно. Эхний долоо хоногт ажилчдын хувцсыг үнэ төлбөргүй оёж, засварлах ажил өрнөнө.
-Монгол хүний биеийн онцлогоос хамаараад ажлын хос хувцасны хэмжээ зөрөх тохиолдол элбэг байдаг. Үйлдвэрлэгчийн хувьд үүнийг шийдэх боломжтой юу?
-Энэ асуудлаар гомдол, санал их ирдэг. Биеийн хэлбэрийн онцлогоос шалтгаалаад өмд нь таараад, цамц нь таарахгүй байна. 54 размерын цамц, 52 размерын өмд авмаар байна гэх жишээтэй. Бид энэ асуудлыг 2023 оны эхэнд шийдвэрлэсэн. Одоо ажилчид өмд, цамцаа өөрт таарсан хэмжээгээр сонгож авах боломжтой. Үйлдвэр өөрөө Оёдлын цехтэй байхын бас нэгэн онцлог, давуу тал энэ.
-Хоёр дахь долоо хоногт ямар ажил өрнөх вэ?
-Оёдлын цехийн технологич, Үйлдвэр технологийн албаны мэргэжилтнүүдээс бүрдсэн баг үйлдвэрийн хэмжээнд ажиллаж, хувцас арчилгаа, гарын доорх материалаар хувцас эсгэх, нөхөх талаар мэдлэг чадвараа хуваалцана. Үүнийгээ бид подкаст хэлбэрээр хүнд хүргэхийг зорьж байна. Харин гурав дахь долоо хоногт үйлдвэрийн газрын бүх цех, нэгжийн “Өглөөний ХАБ” дээр ажлын хувцас гэж юу вэ, даавууны сонголт, түүний онцлогийн талаар мэдлэг ойлголт өгөх үйл ажиллагаа зохион байгуулна. 100 хувь хөвөн даавуун хувцас өмсөхийн давуу болон сул тал, 35, 65 хувийн хөвөн даавуун материалыг хэрхэн таних, холимог материалтай хувцас өмсөхийн давуу болон сөрөг тал юу байдаг талаар мэдээлэл бэлтгэн хүргэнэ. Мөн ажлын хувцсыг гэрийн нөхцөлд хэрхэн арчлах, ямар хэмийн усанд, яаж угаавал зохих талаар зөвлөгөө өгсөн ач холбогдолтой ажил явагдах юм. Сүүлийн долоо хоногт цехээ сурталчлах ажлыг түлхүү зохион байгуулахаар төлөвлөж байна. Бид саяхан Улаанбаатар, Өмнөговийн чиглэлд томилолтоор ажиллаад ирлээ. Оюутолгой, Таван толгой зэрэг компанийн ажилчдын хөдөлмөр хамгааллын хувцсыг нийлүүлдэг оёдлын үйлдвэрүүдийн үйл ажиллагаатай танилцсан. Тэдэнд ямар давуу тал, сайн туршлага байна, бид ажлаа чанаржуулж, сайжруулахын тулд юу хийж хэрэгжүүлэх, нэвтрүүлэх шаардлагатай байгааг харж, харьцуулсан. Ажлын хувцас биед эвтэйхэн, ажил мэргэжлийн онцлогт тохирсон, размер нь ойлгомжтой, чанартай байх ёстой. Энэ чиглэл рүү бид энэ жил анхаарч ажиллана. Нэгдүгээрт, баялаг бүтээгч уурхайчдаа ажлын хувцсаар таслахгүй байх, хоёрт, загвар, чанарыг нь шинэчлэх чиглэлд түлхүү ажиллахаар зорьж байна.
-Танай цех хэчнээн төрлийн бүтээгдэхүүн үйлдвэрлэдэг вэ?
-Манайх өнгөрсөн жил 30 гаруй төрлийн захиалгат бүтээгдэхүүн үйлдвэрлэсэн. Энэ жил 18 төрлийн 85000 ширхэг бүтээгдэхүүн үйлдвэрлэх төлөвлөгөөтэй. Манайх хөдөлмөр хамгааллын хувцас оёхоос гадна Эрдэнэт үйлдвэрийн бүтцийн нэгжүүдийн захиалгыг хийж гүйцэтгэдэг. Тухайлбал, сандлын бүрээс, ширээний болон орны бүтээлэг, дулаалгын хаалт, машины бүтээлэг, буйдангийн бүрээс, бээлий, комбинезон гэх мэт. Бүтээгдэхүүнийхээ нэр төрлийг олшруулах зорилттой ажиллаж байна.
-Баяжмалын шуудай үйлдвэрлэл хэр яваа вэ?
-Эрдэнэт үйлдвэрийн эцсийн бүтээгдэхүүнийг экспортод гаргахад хамгийн хэрэгцээтэй бүтээгдэхүүн бол баяжмалын уут. Бид энэ жил баяжмалын 160 мянган шуудай үйлдвэрлэхээр төлөвлөсөн. Энэ төлөвлөгөөгөө давуулан биелүүлэх боломж бий.
-Материалын нөөц бүрдсэн үү?
-Баяжмалын шуудайны материалын нөөц гайгүй бүрдсэн. Худалдан авах гэрээгээр 580 орчим тонн материалыг Хятадын үйлдвэрлэгч компаниас шууд татаж авахаар болсон. Өнгөрсөн жил ажлын хувцасны материалын тендерийг эхний улиралд багтаан зарлах нь зүйтэй гэсэн дүгнэлт зөвлөмж гарсан. Үүний дагуу бид хоёрдугаар сард тендер зарлаад гуравдугаар сард нээсэн боловч оролцогч компаниуд шаардлага хангаагүй учраас дахин зарлахаар болсон. Даавуун материал болон хувцасны нөөц бүрдүүлэх тал дээр голчлон анхаарч ажиллаж байгаа боловч биднээс шалтгаалахгүй хойшлох асуудал гарч байгаа. Гэсэн ч бид бэрхшээл зовлон тоочихгүйгээр холбогдох бүтцийн нэгжүүдтэй хамтраад материалын тасалдлыг арилгах тал дээр онцгойлон анхаарч ажиллаж байна.
-Бүтээмжээ нэмэгдүүлэхийн тулд ямар шинэчлэлт хийж байна?
-Өнгөрсөн сараас нэг ээлжийн шугамаа дамжлагын хуваарьт оруулсан. Нэг хүн нэг хувцас оёод суух биш, дамжлагаар хамтарсан бүтээл гарч байгаа юм. Ингэхэд бид 15 хоногийн хугацаанд 1000 хувцас гаргасан. Бүтээмж эрс өсөж байна. Үүний зэрэгцээ чанарт анхаарах шаардлагатай. Удахгүй дахиад нэг хэсгээ дамжлагын шат руу шилжүүлбэл хөдөлмөр хамгааллын хувцасны нөөц бүрдүүлэхэд асуудалгүй болно.
Ж.МӨНХ-ОРГИЛ: Ажлын хувцас олгох, дэргэд нь оёдолчин ажиллах, үзэсгэлэн гарахаас манай цехийн сарын ажил эхэлнэ
Б.Баттөгс
Зурагчин
Энэ мэдээ танд ямар санагдав?
1
0
0
0
0