Тэртээ 25 жилийн өмнөх энэ өдөр буюу 12 дугаар сарын 3-нд тайван жагсаал болж байсан түүхтэй. Улс төрийн анхны тайван жагсаалыг Эрдэнэт хотноо “Энх” клуб зохион байгуулсан юм. Монголын ардчилсан хувьсгалын 25 жилийн ойн энэ өдөр Орхон аймгийн ИТХ-ын тэргүүлэгчдийн тогтоолоор Баянцагаан баг “Эрдэнэт хивс” ХХК-ийн урд гурван замын уулзвараас Барилгачдын талбай, Найрамдал талбай, Амарын талбайгаар дамжин Цагаанчулуут баг 7 дугаар хорооллын баруун хойд талын авто замын төгсгөл хүртэлх замыг “Эрх чөлөөний өргөн чөлөө” хэмээн нэрлэхээр тогтоосон байна. 1989 оны 12-р сарын гуравны өдөр тайван жагсаал хийсэн Эрдэнэт хотын Сүхбаатарын өргөн чөлөө гудамжийг Эрх чөлөөний өргөн чөлөө нэртэй болгож, нээлтийн ажиллагааг зохион байгууллаа. Орхон аймаг, Эрдэнэт хотноо 25 жилийн ойг тэмдэглэн өнгөрүүлж, энэ хүрээнд МоАХ-ын партизанууд, үе үеийн гишүүд дэмжигчдийн оролцсон тайван жагсаалыг зохион байгуулж, баярын хурал, хүндэтгэлийн концерт, хүлээн авалтыг “Уурхайчин” соёлын ордон, “Хангарьд” паласт зохион байгуулж байна.
Гэрэл зургийг: Б.Баттөгс