“Алтан газов”-ын эзэн Е.Эрдэнэбулган: Сантехник бол барилгын “амин судас”

Айл өрх, албан газрын дулаан, тав тухтай амьдралын цаана сантехникчдийн хөдөлмөр чимээгүйхэн оршиж байдаг. Тэдний нэг нь Монголын Сантехникчдийн хөгжлийн нийгэмлэгээс зохион байгуулсан Улсын ур чадварын уралдаанд түрүүлж, “Алтан газов” цомын эзэн болсон Аж ахуй, үйлчилгээний цехийн сантехникийн засварчин Е.Эрдэнэбулган юм. Түүний мэргэжлийн замнал, амжилтын талаар цөөн хором ярилцлаа.

-Сантехникчдийн Улсын уралдаанд “Алтан газов” цом хүртсэнд баяр хүргэе! Энэ мэргэжлийг хэзээнээс эзэмшсэн бэ?
-Баярлалаа. Би 2005 онд тухайн үеийн Мэргэжил сургалт үйлдвэрлэлийн төв, одоогийн Политехникийн коллежид элсэн суралцсанаар сантехникч мэргэжил эзэмшсэн. Аав маань цахилгаанчин, гагнуурчин, сантехникч гэсэн гурван мэргэжлээс сонгохыг зөвлөсөн юм. Ингээд аавынхаа зөвлөгөөг дагаж энэ мэргэжлийг сонгож, 2007 онд сургуулиа төгссөн.
-Сургуулиа төгсөөд шууд мэргэжлээрээ ажилласан уу?
-Төгсөөд хэсэг хугацаанд аавынхаа малыг маллаж, гурван жил орчим хөдөө ажилласан. Дараа нь “Эрдэнэт ус, дулаан түгээх сүлжээ” компанид засварчин, сантехникчээр ажилласан. Харин 2021 оны арваннэгдүгээр сард Эрдэнэт үйлдвэрт сонгон шалгаруулалтаар орж, одоог хүртэл ажиллаж байна.
-Таны мэргэжлийн онцлог, үнэ цэн юу вэ?
-Сантехникч бол айл өрх бүрийн амьдралтай шууд холбоотой мэргэжил. Дулаан, халуун, хүйтэн ус, бохирын систем гээд хүний өдөр тутмын амьдралын суурь хэрэгцээг хангадаг. Айл гэр, албан газрыг тав тухтай, дулаан байлгахын төлөө ажилладаг, нийгэмд зайлшгүй хэрэгтэй мэргэжил гэж боддог.
-“Алтан газов” тэмцээнийхээ талаар дэлгэрэнгүй ярихгүй юу?
-Энэ бол Монголын Сантехникчдийн хөгжлийн нийгэмлэгээс зохион байгуулдаг улсын хэмжээний ур чадварын уралдаан. Энэ жил 52 байгууллагын 96 сантехникч гурван насны ангиллаар өрсөлдсөн. Би 36–45 насны ангилалд оролцож, цомын эзнээр шалгарлаа.
-Тэмцээн ямар хэлбэрээр зохион байгуулагдсан бэ?
-Онол болон практик гэсэн хоёр хэсэгтэй. Практик даалгаварт ган болон пепси трубаг угсрах, монтаж хийх ажил багтсан. Ур чадвар, сэтгэлгээ шаардсан, нэлээд өрсөлдөөнтэй тэмцээн болсон.
-Таны амжилтад багш нарын нөлөө хэр байсан бэ?
-Маш их. Миний багш нар болох Эрдэнэжаргал, Бямбатогтох нар минь мэргэжлийн суурийг сайн тавьж өгсөн. Багш маань өмнө нь мөнгөн медаль хүртэж байсан бол шавь нь 2024 онд алтан медаль авсан. Харин би 2026 онд “Алтан газов” цом хүртлээ. Мөн Соёл, урлагийн цогцолборын сантехникч Т.Шижирбаатар мөнгөн медаль хүртэж, Засвар, механикийн заводын сантехникч Г.Энхбаяр шагналт байрт шалгарсан.
-Цаашдын зорилго, төлөвлөгөөнөөсөө хуваалцахгүй юу?
-Би мэргэжлээрээ 15 дахь жилдээ ажиллаж байна. Цаашид илүү ихийг сурч, ур чадвараа тасралтгүй хөгжүүлж, мэргэжлээрээ бахархаж ажиллана. Сантехник бол барилгын амин судас, шөрмөс. Тиймээс энэ мэргэжлийг эзэмшсэн хүн чин сэтгэлээсээ, хариуцлагатай ажиллах ёстой гэж боддог.
-Танд ажлын өндөр амжилт хүсье.