Жил бүрийн 3 дугаар сарын 22-ны өдрийг дэлхий нийтээр “Усны өдөр” болгон тэмдэглэдэг. Энэ жилийн тухайд ус тойрсон тулгамдаж буй асуудлыг олон нийтийн анхааралд дахин хүргэх зорилгоор “Ус ба тэгш байдал” уриан дор тэмдэглэж, олон чиглэлийн үйл ажиллагаа зохион байгуулж буйг “Эрдэнэт үйлдвэр” ТӨҮГ-ын Ус хангамжийн цехийн Үйлдвэр техникийн товчооны дарга С.Цогсогбаяр онцолж байна.
-Дэлхийн усны өдрийн энэ жилийн уриа өвөрмөц байна. Усны асуудал дэлхийн хүн төрөлхтөнд хамааралтай учраас тулгамдаж буй асуудлыг энэ удаа онцлон, хөндөж байх шиг..?
-Дэлхий даяар “Усны өдөр”-ийг 33 дахь жилдээ тэмдэглэж байна. Усны тулгамдсан асуудлууд, тэдгээрээс алийг нь ойрын хугацаанд шийдвэрлэх шаардлагатай байгаа эсэхээс шалтгаалаад тухайн жилийн усны өдрийн сэдэв, уриаг тодорхойлдог. Энэ жил “Ус ба тэгш байдал” сэдвийн хүрээнд усны асуудлаар шийдвэр гаргах түвшинд эмэгтэйчүүдийн оролцоо ямар байгаа болон усны талаарх шийдвэр, мэдээллүүд хүн бүрд тэгш хүртээмжтэй хүрдэг үү, гэх зэрэг чиглэлд анхаарлаа хандуулж байна. Энэ өдрийг “Эрдэнэт үйлдвэр” ТӨҮГ-ын Ус хангамжийн цех нь ус хангамж, ариутгал татуургын тусгай зөвшөөрөл эзэмшиж, үйл ажиллагаа эрхэлдгийн хувьд Засгийн газрын хэрэгжүүлэгч агентлаг Усны газар, Хот сууриныг зохицуулах хорооноос өгсөн үүрэг чиглэлийн дагуу тэмдэглэн өнгөрүүлдэг. “Усны өдөр”-ийг угтаж зохион байгуулах ажлын төлөвлөгөө гарган, “Эрдэнэт үйлдвэр” ТӨҮГ-ын Ерөнхий инженерээр батлуулж, уг төлөвлөгөөний дагуу цуврал ажлууд хийгдэж байна.
-Тухайлбал, ямар ажил, үйл ажиллагаа зохион байгуулж байна вэ?
“Усны өдөр”- ийн хамгийн чухал ач холбогдол нь хүн бүхэнд “цэнхэр алт” хэмээгддэг усны үнэ цэнийг ойлгуулах, сануулах, сурталчлан түгээхэд оршдог. Энэ ажлыг бид үйлдвэрийн Хэвлэл мэдээлэл, олон нийттэй харилцах албатай хамтран, өргөн хүрээнд хийдэг уламжлалтай. Энэ жилийн 3 дугаар сарын 11-нд Монгол Улсын Засгийн газрын хэрэгжүүлэгч агентлаг Сэлэнгэ голын сав газрын захиргаатай хамтран, Төвийн бүсийн ус ашиглагч томоохон аж ахуйн нэгж байгууллагуудын дунд сургалт, уулзалт зохион байгуулсан. Мөн Орхон аймгийн Байгаль орчны газрын санаачилгаар 2018 оноос тогтмол зохион байгуулж ирсэн волейболын тэмцээнийг өнгөрсөн жилийн ялагч “Ачит – Ихт” компанийн хамт олон зохион байгуулж, энэ жилийн тэмцээний шилжин явах цомын эзнээр “Эрдэнэт ус, ДТС” ОНӨХК-ийн баг тамирчид тодорлоо. Усны өдөрт зориулсан энэхүү тэмцээнд ус ашиглагч 14 нэгж байгууллага оролцсоноороо онцлог болсон.
Ерөнхий боловсролын сургуулиудын дунд “Ус ба тэгш байдал” сэдвээр рийл, видео контентын уралдаан зарласан. Уралдааны ялагчийг “Усны өдөр”-өөр тодруулж, шагнал гардуулна.
Энэ удаагийн “Усны өдөр”-ийн онцлог гэвэл, сэдэв нь хүйсийн тэнцвэрт байдалд чиглэсэн учраас 3 дугаар сарын 08-нд тэмдэглэдэг “Олон улсын Эмэгтэйчүүдийн эрхийг хамгаалах өдөр”-тэй уялдуулсан. Өрх айл, гэр бүлийн өдөр тутмын усны хэрэглээний шийдвэрийг эмэгтэйчүүд илүүтэй гаргадаг. Усыг хэрхэн хэрэглэх, зөөх, хэмнэх гэх зэргээр усны шийдвэрт эмэгтэйчүүд түлхүү оролцдог хэр нь, усны бодлого тодорхойлох түвшинд эмэгтэйчүүдийн дуу хоолой тэр бүр хүрдэггүй. Ийм учраас тэдний дуу хоолойгоо хүргэх, эрхээ хамгаалах өдөр гэдэг утгаар нь “Усны өдөр”-ийн зарим үйл ажиллагааг холбож, чиглүүлсэн юм. Түүнчлэн, Засгийн газрын хэрэгжүүлэгч агентлаг Усны газарт Байгаль орчин, Ус цаг уурын шинжилгээний газрууд, усны чиглэлээр үйл ажиллагаа явуулдаг сав газрын захиргаад, ус эзэмшигч томоохон аж ахуйн нэгжүүдийн хамтарсан уулзалт хэлэлцүүлэг болох юм. Үүнд бид оролцохоор бэлтгэл хангаж байна.
Нар минутад мандаж минутад жаргана.
Үс засуулвал: 
Суудал: 
