Эрдэнэт үйлдвэрийн удирдах ажилтны даваа гаргийн ээлжит шуурхай зөвлөгөөнийг Ерөнхий инженер Т.Батмөнх удирдлаа. Шуурхайн эхэнд Дулааны цахилгаан станцын дулааны нарийн хэмжүүр, автоматикийн ахлах мастер Д.Амармөрөнд “Хаягдал усыг дахин боловсруулах” сэдвээр техникийн шинжлэх ухааны дэд докторын зэрэг хамгаалсан дипломыг гардуулж, ажлын өндөр амжилт хүслээ.
Өнгөрсөн долоо хоногт үйлдвэрийн хэмжээнд Хөдөлмөрийн аюулгүй байдал, эрүүл ахуйн үйл ажиллагаа хэвийн үргэлжилж, ажилтнуудад хувийн хамгаалах хэрэгслийг хуваарийн дагуу олгож ажилласан байна. Өндөр эрсдэлтэй 13 ажил гүйцэтгэж, бүтцийн нэгжүүдэд зорилтот хяналт шалгалт хийжээ. Мөн 59 ажлын байранд хэмжилт хийж, зөвшөөрөгдөх хэмжээнээс хэтэрсэн 16 зөрчилд албан шаардлага хүргүүлсэн байна. Нийт 462 ажилтныг ХАБЭА-н сургалтад хамруулсан. Галын дуудлага гараагүй.
Байгаль орчны чиглэлээр үйл ажиллагаа хэвийн үргэлжилж, дүйцүүлэн хамгаалах хүрээнд Баян-Өндөр ууланд хийсэн нөхөн сэргээлтийн талбайд гарсан зөрчлийг холбогдох байгууллагуудтай хамтран шийдвэрлэж, дахин давтахгүй байх арга хэмжээг авч ажиллажээ. Үйлдвэрлэл, техникийн хэлтсээс, өмнөх шуурхайн үүрэг даалгаврын биелэлтийг танилцуулж, оны эхний хоёр сард үйлдвэрлэлийн үндсэн үзүүлэлтүүдийн төлөвлөгөө биелснийг мэдээлэв.
Хамтын ажиллагаа, нийгмийн харилцааны бодлогын газрын дарга Ц.Бат-Энх ойрын хугацаанд зохион байгуулагдах спорт, нийгмийн томоохон үйл ажиллагаа, албан ёсны айлчлалын талаар мэдээлэл өглөө. Тухайлбал, гуравдугаар сарын 03-наас 05-ны өдрүүдэд олимпын спортын төрлийн шилдэг тамирчдын тэмцээн буюу Монголын чөлөөт бөхийн холбооны Ерөнхийлөгчийн нэрэмжит шилдэг 8 бөхийн барилдаан Эрдэнэт хотод анх удаа зохион байгуулагдаж, үндэсний телевизүүдээр шууд дамжуулахаар бэлтгэл хангаж байгааг онцлов. Үүнтэй холбоотойгоор Спорт цогцолборын интернэт, техник, эрчим хүчний найдвартай ажиллагааг бүрэн хангахыг холбогдох нэгжүүдэд чиглэл болгов.
Мөн гуравдугаар сарын 06-ны өдөр Монгол Улсын Их Хурлын дарга Н.Учрал Эрдэнэт хотод ажиллах, гуравдугаар сарын 07-нд Эрдэнэт үйлдвэрийн Эмэгтэйчүүдийн холбооны 25 жилийн ойн үйл ажиллагаа зохион байгуулагдах тул бэлтгэл ажлыг нягт хангах шаардлагатайг дурдлаа. Түүнчлэн, Эрдэнэт хотын 50 жилийн ойтой холбогдуулан Соёл, спортын “Эрдэнэт” цогцолборын барилга, тоног төхөөрөмжийн шинэчлэл, худалдан авалтын ажлыг яаралтай эрчимжүүлэх шаардлагатай байгааг онцолж, хариуцлагатай шийдвэр гарган ажиллахыг анхааруулав.
Шуурхайн төгсгөлд Ерөнхий инженер Т.Батмөнх, Үйлдвэрийн газрын үйлдвэрлэл, аж ахуйн үйл ажиллагаа тогтвортой, төлөвлөгөөний дагуу хэрэгжиж байгааг тэмдэглэж, их зогсолтын бэлтгэл ажлыг эртнээс хангах, үлдсэн тендерүүдийг цаг алдалгүй зарлах үүрэг өглөө. Мөн шинэ техник, технологийн нэвтрүүлэлтийн үр ашгийг бодит тоо, баримтаар тайлбарлаж чаддаг байх, удирдах ажилтнууд хариуцсан чиглэлдээ шийдвэр гаргаж, хариуцлага хүлээдэг байх шаардлагатайг онцолсон юм.
Түүнчлэн, баярын өдрүүдээр хариуцлагатай жижүүрүүд үүргээ сайн гүйцэтгэсэнд талархал илэрхийлж, олон нийт, хэвлэл мэдээллийн зүгээс тавьж буй эргэлзээ, асуултад баримттай, үнэн зөв тайлбар өгч, ил тод нээлттэй ажиллахыг нийт удирдах ажилтнуудад санууллаа.
Нар минутад мандаж минутад жаргана.
Үс засуулвал: 
Суудал: 
