“Эрдэнэт үйлдвэр” ТӨҮГ-ын Барилга засварын цехийн Бетон зуурмагийн үйлдвэрийн бүтээгдэхүүн сүүлийн үед эрэлттэй байгаатай холбогдуулан тус цехийн Бүтээгдэхүүн үйлдвэрлэлийн хэсгийн дарга Б.Болорсүхтэй ярилцлаа.
-Барилга засварын цехийн Бетон зуурмагийн үйлдвэр хэзээнээс үйл ажиллагаагаа эхэлсэн бэ?
-Манай үйлдвэр 1987 оноос хойш тасралтгүй ажиллаж байгаа, Эрдэнэтийн бетоны ууган үйлдвэрүүдийн нэг. Одоо 38 дахь жилдээ үйл ажиллагаагаа явуулж байна.
-Үйлдвэрийн хүчин чадал ямар вэ?
-Цагт 40–50 м³ бетон зуурмаг үйлдвэрлэх хүчин чадалтай. Өмнөх жилүүдэд бид жилд дунджаар 10–12 мянган м³ бетон зуурмаг үйлдвэрлэж, зөвхөн Эрдэнэт үйлдвэрийн дотоод хэрэгцээг хангаж ирсэн. Харин сүүлийн жилүүдэд гадаад зах зээлд бүтээгдэхүүнээ нийлүүлэх, барилгын компаниудтай хамтран ажиллах чиглэлд анхаарч байна. Үүнтэй уялдан тоног төхөөрөмжийн шинэчлэл хийх асуудал ч яригдаж байгаа. Манайх үйлдвэрлэлийн нөөц, хүчин чадал хангалттай.
-Бетон зуурмаг үйлдвэрлэхэд цементээс гадна ямар түүхий эд ордог вэ?
-Үндсэн түүхий эд нь цемент, угаасан элс, дайрга. Үүн дээр бетон зуурмагийн чанар, зориулалтаас хамаарсан нэмэлтүүд ордог. Манай үйлдвэр байгуулагдсан цагаасаа Хөтөлийн цементийн үйлдвэртэй хамтран ажиллаж ирсэн. 05-ын угаасан хайрга буюу пигесээ Дарханы “Түшиг-Уул”-аас авч хэрэглэдэг. Дайргын хувьд 10-20, 5-10-ыг Эрдэнэтэд үйл ажиллагаа явуулж байгаа Дэлт хошуу, ОТК ХХК-аас тохирлын гэрчилгээ, чанарын гэрчилгээний хамт хавсарган авч үйлдвэрлэлдээ ашиглаж байгаа. Мөн уян налархайжуулагч, хүйтэнд тэсвэрлэлтийн гэсэн хоёр төрлийн нэмэлт хэрэглэдгээрээ онцлог.
-Танай бүтээгдэхүүн стандартын шаардлага хэр хангаж байна?
-Манай бетон зуурмаг MNS EN 206:2017 стандартыг бүрэн хангадаг. B10–B35 ангийн бетон зуурмагийг тохирлын гэрчилгээний хүрээнд үйлдвэрлэж байна.
Гарсан бүтээгдэхүүнээ өөрийн болон хөндлөнгийн лабораториуд болох Дархан-Уул аймгийн Технологийн их сургуулийн Барилгын материалын лаборатори, Орхон аймгийн ГХБХБГ-ын сорилт шинжилгээний лабораторид тогтмол шинжилгээ хийлгэж баталгаажуулдаг.
-Танай үйлдвэрийн давуу тал…?
-Юуны өмнө дэд бүтэц бүрэн шийдэгдсэн. Төмөр замаар түүхий эд татах, бараа материал буулгах, ачих зэрэгт хүндрэлгүй. Материалын ханган нийлүүлэлт тогтмол, нөөц талбай хангалттай, тасралтгүй ажиллах нөхцөл бүрдсэн.
Мөн өвлийн улиралд дүүргэгч материалаа халааж, +30–+35 градусын халуун бетон зуурмаг үйлдвэрлэдэг. Энэ нь хүйтний улиралд бетоны бэхжилтийг түргэсгэж, хөлдөлт үүсэхээс сэргийлэх онцгой давуу талтай.
-Сүүлийн үед ямар бүтээн байгуулалтад бүтээгдэхүүнээ нийлүүлэв?
-Баяжуулах үйлдвэрийн Хүдэр бэлтгэх I шатны бутлуурын шинэчлэлийн ажилд нийт 4300 м³ М400 маркийн бетон зуурмаг “ОТК” ХХК-тай хамтран нийлүүлсэн. Үүнээс 1500 м³ бетон зуурмагийг 48 цагийн дотор тасралтгүй үйлдвэрлэж, хугацаанд нь амжилттай нийлүүллээ. Мөн Хүдэр бэлтгэлийн I шугамын шинэчлэлд 2025 онд 4000 м³, 2026 онд 5000 м³ бетон зуурмаг нийлүүлэх төлөвлөгөөтэй. Одоогоор 36 цагийн дотор 1000 м³ бетон зуурмагийг амжилттай үйлдвэрлээд байна.
-Танай бүтээгдэхүүний үнэ зах зээлийн ханштай нийцэж байна уу?
-2025 оны есдүгээр сард үнийн шинэчлэлт хийж, зах зээлийн ханштай 100 хувь нийцүүлсэн. Өмнө нь бид гадаад борлуулалт хийдэггүй байсан бол одоо гадагшаа болон Эрдэнэт үйлдвэрийн бүтцийн нэгжүүдэд ижил үнээр бетон зуурмаг нийлүүлж байна. Энэ нь манай үйлдвэрийн хувьд шинэ боломж бөгөөд Эрдэнэт үйлдвэр улсын төсвийн 10 орчим хувийг бүрдүүлдэг томоохон аж ахуйн нэгж учраас бидний бүтээгдэхүүн эх оронч худалдан авалтад бодит хувь нэмэр оруулж байгаа гэж үздэг.
-Ярилцсанд баярлалаа.
Нар минутад мандаж минутад жаргана.
Үс засуулвал: 
Суудал: 
