“Эрдэнэс Монгол” нэгдлийн харьяа төрийн өмчит 16 компани оны эхний хагас жилийн бүтээн байгуулалт, өвөлжилтийн бэлтгэл ажлаа тайлагнаж дууслаа. Хэлэлцүүлгийн өмнөх завсарлагаанаар Монгол Улсын сайд, Засгийн газрын Хэрэг эрхлэх газрын дарга С.Бямбацогттой уулзаж, Эрдэнэт үйлдвэрийн тайлан мэдээлэлд ямар үнэлэлт дүгнэлт өгч буй талаар тодруулсан юм.
-Эрдэнэт үйлдвэрийн хагас жилийн тайланг сонслоо. Өчигдөр үйлдвэрлэлийн үйл ажиллагаатай биечлэн танилцлаа. Товчхон хэлэхэд, Эрдэнэт үйлдвэрийн үйл ажиллагаа үнэхээр сайн байна. Үйлдвэрийн газрынхаа бодлого тодорхойлох, төлөвлөх, сайн төлөвлөснөө зохион байгуулж, хэрэгжүүлэх, ажлынхаа үр дүнг тооцож, хяналт тавих тал дээр маш сайн ажиллаж байна гэж би дүгнэлээ. Эрдэнэт үйлдвэр жилд 26 сая тонн хүдэр боловсруулдаг байсан бол 40 сая тонн хүдэр боловсруулах хэмжээнд хүрч, сүүлийн хоёр жилийн дотор 30 орчим хувиар хүчин чадлаа нэмэгдүүлсэн байна. Мөн төсөвт орох орлого, татвар, төлбөр, хураамжаа нэмэгдүүлсэн. Хэдийгээр хүдрийн агуулга буурч байгаа ч борлуулалтын орлогоо бууруулахгүй, хүдэр боловсруулалтаа бууруулахгүй ажиллаж чадаж байна. Өмнө нь 26 сая тонн хүдэр боловсруулдаг байхад 7000 хүн ажилладаг байсан бол өнөөдөр 40 сая тонн хүдэр боловсруулж байхад мөн 7000 орчим хүн ажиллаж байгаа. Энэ хэмжээгээр хөдөлмөрийн бүтээмж бас нэмэгдсэн гэсэн үг. Эдийн засаг, санхүүгийн үзүүлэлтээс харахад Эрдэнэт үйлдвэрийн үйл ажиллагаа сайн байна.
-Худалдан авалтын үйл ажиллагаандаа хиймэл оюун ухаан нэвтрүүлж, хүний ашиг сонирхол, нөлөө орохгүй болгож чадсан нь том дэвшил. Энэ бол Монгол Улсад төдийгүй дэлхийд сайн жишээ болж хэлэгдэхүйц жишиг болсон байна.
-Мөн үйл ажиллагааны тайлангаа илэрхийлж байгаа байдал нь бусад компаниудаас хамаагүй илүү. Төлөвлөдөг, хэрэгжүүлдэг, хяналт тавьж, тайлагнаж чаддаг нь харагдлаа.
-Ажлаа тайлагнахын зэрэгцээ мөн тулгамдсан асуудлаа танилцуулсан. Монгол Улсын сайдын хувьд ямар асуудалд анхаарлаа хандуулж, дэмжлэг үзүүлж ажиллах вэ?
-Эрчим хүчний үнэ тарифын асуудал байна. Эрдэнэт үйлдвэр цахилгаан эрчим хүч үйлдвэрлэж, төвийн эрчим хүчний системд нийлүүлдэг хэрнээ, буцаагаад цахилгааны маш өндөр төлбөр төлдөг. Үүнийг бид анхаарах ёстой. Түүнээс гадна нийгмийн хариуцлагын хүрээнд хэтэрхий их ачаа үүрч байгаа. Олон нийтийн ажилд оролцож байна. Энэ нь үйлдвэрийн газрын санхүүг сулруулдаг юм байна. Мөн Дарханы төмөрлөгийн үйлдвэрээс ган бөөрөнцгийн бэлдэц хэт өндөр үнээр авдаг. Энэ нь Эрдэнэт үйлдвэрийн ашигт ажиллагаанд сөргөөр нөлөөлж байна. Хоёулаа л ашгийн төлөө ажиллаж байгаа төрийн өмчит компани. Засгийн газрын өмнө хүлээсэн үүрэгтэй. Гэтэл нэгнийхээ өмнөөс нөгөө нь илүү ачаа үүрдэг бол шударга биш. Тийм болохоор энэ мэт анхаарах асуудлууд байнаа л гэж харж байна.
-Баярлалаа.
Нар минутад мандаж минутад жаргана.
Үс засуулвал: 
Суудал: 
