Жилийн хамгийн чухал ажил болох “их зогсолт” маргааш эхэлнэ. Үүнтэй холбогдуулан хийгдэх онцлог ажлын талаар “Эрдэнэт үйлдвэр” ТӨҮГ-ын Ерөнхий инженер Т.Батмөнхтэй ярилцлаа.
–Жил бүр "их зогсолт" хийх нь ямар ач холбогдолтой байдаг талаар тодорхой мэдээлэл өгнө үү?
-Эрдэнэт үйлдвэр нөөцгүй ажиллагаатай тоног төхөөрөмжүүдийнхээ найдвартай ажиллагааг бүрэн хангахын тулд жилдээ нэг удаа үйлдвэрлэлээ зогсоож их засвар хийдэг. Үүнийгээ бид “их зогсолт” гэж нэрлэдэг. Бид энэ ажилд бүтэн жилийн турш бэлтгэж байж ордог. 2025 оны “их зогсолт”-ын бэлтгэл ажлыг нэгдүгээр сарын 07-ны өдөр Ерөнхий инженер миний бие шийдвэр гаргаж эхлүүлсэн. Гол ажил нь худалдан авалттай холбоотой. Зогсолтын үед шаардагдах сэлбэг хэрэгсэл, тоног төхөөрөмжийг урьдчилан худалдан авах шаардлагатай байдаг. Үүний сацуу үйлдвэрийн бүх цех, нэгжүүд цахилгаан, механик, автоматжуулалт, холбоо мэдээлэл, цацрагийн чиглэлүүдээр үйлдвэрлэлийн хэвийн үйл ажиллагаанд саад учруулахгүйгээр бэлтгэлээ бүрэн хангасан.
–Энэ жилийн “их зогсолт”-оор хэр хэмжээний ажил төлөвлөгдөөд байна?
– Бид энэ удаа 591 багц ажил хийхээр төлөвлөсөн. Үүний 490 багц ажлыг зургаадугаар сарын 28-наас 30-ны хооронд 48 цагийн дотор хийх юм. Маргааш буюу 6-р сарын 28-ны 18:00 цагаас үйлдвэрийн ачааллыг зогсооно. Харин үлдсэн 101 багц ажлыг наймдугаар сард буюу Дулааны цахилгаан станцын “их зогсолт”-ын үеэр гүйцэтгэнэ.
–Ажиллах хүч, гүйцэтгэгч компанийн оролцооны талаар?
-Өөрсдийн дотоод нөөц бололцоогоороо хүн хүчээ хангасан. Гаднаас дөрвөн компанийн 12 бригад нэмэгдэж ажиллах юм. Ажлын байрууд дээр урьдчилсан хэмжилт, шинжилгээ, багаж хэрэгслийн тохируулга, ХАБЭА-н шалгалтууд бүгд хийгдэж дууссан.
–Энэ жилийн “их зогсолт”-ын онцлог юу вэ?
-Цахилгаан хангамжийн томоохон ажил төлөвлөгдсөн. Үйлдвэрлэл, технологийн парк байгуулахтай холбоотой “Оюут”-ын дэд станц барьж байгуулах гэж байна. Үүнтэй холбоотойгоор Хялганатын А, Б шугам дээр өндөр хүчдэлийн шугам давуулах ажлыг хийнэ. Энэ нь стандарт, мэргэжлийн ур чадвар шаардсан онцлог ажил. Түүнчлэн, байгаль орчинтой холбоотой Ил уурхайн карьераас гардаг хүчиллэг усыг шавхах, үйлдвэрийн усан хангамжийн газар доорх шугам хоолойн оношилгоо, засварын ажлууд зэрэг чухал ажлууд хийгдэнэ.
–Цаг хугацааны хувьд энэ жил засвар арай эрт эхэлж байна уу?
– Тийм ээ. Өмнөх жилүүдэд сонгуулийн үйл ажиллагаатай давхцаж, долдугаар сарын сүүлчээр “их зогсолт” хийж байсан. Энэ удаад бүтэн сарын өмнө зогсолт хийж байна.
–Үйлдвэрлэл хэвийн горимд хэзээ шилжих вэ?
– 48 цагийн хугацаанд засварын ажлууд хийгдсэний дараа үзлэг, туршилт, шалгалтууд явагдаад, үйлдвэрээ залгана. Нөөцгүй ажилладаг тоног төхөөрөмжүүд бүтэн жилийн турш доголдолгүй ажиллах ёстой. Тиймээс бүх засварчид, уурхайчид, мэргэжилтнүүд маань амралтын өдрүүдээр үйлдвэрийн найдварт ажиллагааг хангахын төлөө хүчээ нэгтгэж ажиллана.
Нар минутад мандаж минутад жаргана.
Үс засуулвал: 
Суудал: 
