Эрчим хүч хэмнэх чиглэлээр өнгөрсөн онд үр дүнтэй ажиллан байгаль орчинд ээлтэй, тогтортой хөгжлийг дэмжих бодлого хэрэгжүүлэх, эрчим хүчийг үр ашигтай хэрэглэх, хүлэмжийн хийн ялгарлыг бууруулах үйлсэд шинэлэг санаачилга хэрэгжүүлж, үнэтэй хувь нэмэр оруулсанд нь Эрчим хүчний зохицуулах хорооноос “Эрдэнэт үйлдвэр” ТӨҮГ-ын хамт олонд талархал гардуулав. Хэр хэмжээний хэмнэлт хэрхэн гаргаж ажилласан талаар Эрчим хүчний хэлтсийн дарга-Ерөнхий эрчим зүйч Л.Ариунболдтой цөөн хором ярилцлаа.
-Эрчим хүчний зохицуулах хороо жил бүр хэмнэлт сайн хэрэгжүүлсэн газарт талархал гардуулдаг уу?
-Юуны өмнө 2024 оны эрчим хүч хэмнэлтийн төлөвлөгөөгөө амжилттай хэрэгжүүлж ажилласан үйлдвэрийн хамт олондоо талархал илэрхийлье. Эрчим хүчний зохицуулах хороо жил бүр үүрэг хүлээсэн хэрэглэгчдийн зөвлөгөөн зохион байгуулж, тухайн жилд эрчим хүчний хэмнэлтийн чиглэлээрх арга хэмжээг хангалттай сайн хэрэгжүүлж ажилласан байгууллагууддаа талархал илэрхийлдэг уламжлалтай. 2024 оны эрчим хүчний хэмнэлтийн чиглэлийн үйл ажиллагааг дүгнэх зөвлөгөөн тавдугаар сарын 28-наас 29-ний өдрүүдэд Улаанбаатар хотод зохион байгуулагдлаа.
-Эрдэнэт үйлдвэр Монгол Улсын эрчим хүчний хамгийн том хэрэглэгчийн хувьд Эрчим хүчний хэмнэлтийн тухай хуулийн хэрэгжилтийг хэрхэн хангаж ажилладаг вэ?
-Жил бүр эрчим хүч хэмнэлтийн төлөвлөгөөг цех болгоноор гаргуулан, манай хэлтэс нэгтгээд, чухал гэсэн ажлуудаа оруулаад, үйлдвэрийн газрын нэгдсэн төлөвлөгөө гаргаж, Эрчим хүчний зохицуулах хороонд хүргүүлдэг. Мөн төлөвлөгөөнийхөө хэрэгжилтийг ханган, биелэлтийг нь жил бүр дүгнээд, тайлангаа Эрчим хүчний зохицуулах хороонд хуульд заасан хугацаанд хүргээд явдаг. 2024 оны хувьд тоног төхөөрөмжийн шинэчлэлийн хүрээнд 1.4 сая кВт/цаг цахилгаан эрчим хүч хэмнэсэн, 3 тарифын системийг ашиглан сэлгэн залгалтын цагийг оновчилох замаар 5.4 тэрбум төгрөгийн цахилгаан эрчим хүчний зардал хэмнэсэн. Мөн ISO50001 стандартыг нэвтрүүлэх ажлын хүрээнд 120 гаруй ажилтнуудыг сургалтанд хамруулсан.
-Шинэчлэл хийхдээ эрчим хүчний хэмнэлттэй тоног төхөөрөмжүүд сонгож байна гэсэн үг үү?
-Тийм. Орчин үеийн тоног төхөөрөмжийн гол үзүүлэлт нь эрчим хүчний хэмнэлт байдаг. Түүнээс гадна зардал гаргахгүйгээр шинэ санал санаачилга, технологийн шийдлүүд хийх замаар буюу, жишээлбэл схемийн өөрчлөлтүүд зэргээр эрчим хүчний хэмнэлтийн арга хэмжээг авч хэрэгжүүлж байна.
-Эрчим хүчний хэмнэлтийг хэдэн арга замаар хэрэгжүүлж байна вэ?
-Тоног төхөөрөмжийн шинэчлэлт хийх, шинэ технологи нэвтрүүлэх, горим тохируулга хийх, үйлдвэрийн холбогдох голлох ажилчдыг эрчим хүч хэмнэлтийн сургалтад хамруулах, мэдлэг боловсролыг нь дээшлүүлэх гээд олон чиглэлд үйл ажиллагаа амжилттай явуулдаг. Өмнө нь дурьдсан авч хэрэгжүүлсэн арга хэмжээнүүдээс гадна өнгөрсөн онд 1174,5 сая кВт.ц цахилгаан эрчим хүч хэрэглэхээр төлөвлөснөөс 1152,5 сая кВт.ц цахилгаан эрчим хүч хэрэглэж, төлөвлөснөөс 22 сая кВт/ц цахилгаан эрчим хүчийг хэмнэсэн. Эдгээр ажлыг маань үнэлэн Эрчим хүчний зохицуулах хорооноос талархал илэрхийллээ.
Нар минутад мандаж минутад жаргана.
Үс засуулвал: 
Суудал: 
