Удирдах ажилтны шуурхай зөвлөгөөний тойм

Эрдэнэт үйлдвэрийн удирдах ажилтны даваа гаригийн ээлжит  шуурхай зөвлөгөөнийг Үйлдвэрлэл, техникийн бодлогын газрын дарга П.Батболор удирдлаа. Өнгөрсөн долоо хоногт цагаан тоосны нөлөөллийн бүсэд амьдардаг иргэдийг эрүүл мэндийн үзлэг оношилгоонд хамруулах ажил хэвийн үргэлжилж, одоогийн байдлаар 132 иргэн хамрагджээ. Аюултай хог хаягдлыг дахин боловсруулах, устгах тусгай зөвшөөрөл бүхий аж ахуйн нэгжид 30 тонн хаягдал тос шилжүүлсэн талаар Байгаль орчин, ногоон хөгжлийн хэлтсээс мэдээлэв. 
Энэ сард үйлдвэрлэлийн төлөвлөгөөт үзүүлэлт 100-аас дээш хувиар биелж байна. Уулын цул гаргалт 161 мянган метр куб, хөрс хуулалт 282 мянган метр куб, хүдэр олборлолт 23 мянган тонн, хүдэр боловсруулалт 71 мянган тонноор төлөвлөгөөнөөс давжээ. Хүдэр дэх зэсийн агуулга 0.363, молибденых 0.016 хувьтай байгаа бол технологийн балансаар зэсийн металл авалт 88.65 хувь, молибдены металл авалт 44 хувийн гүйцэтгэлтэй гарчээ. Өнгөрсөн долоо хоногт 22.48 хувийн агуулгатай 5 мянган тонн цэвэр зэс агуулсан 44730 тонн зэсийн баяжмал үйлдвэрлэсэн байна. Молибдены баяжмал үйлдвэрлэл оны эхнээс 159 контейнер үйлдвэрлээд байгаа бөгөөд баяжмал ачилт өнгөрөгч долоо хоногт хэвийн үргэлжлэв. Зэсийн баяжмал ачилтыг 773 вагон ачиж, сарын төлөвлөгөөг давуулж биелүүлэхээр ажиллаж буйг Үйлдвэрлэл, техникийн хэлтэс мэдээллээ. 
Хавар, зуны бэлтгэл ажлын төлөвлөгөөг бүтцийн цех нэгжүүд хуваарийн дагуу хэрэгжүүлж буйгаа мэдээлэлдээ танилцуулсан. Баяжуулах үйлдвэр хавар зуны бэлтгэл ажлын хүрээнд нийт 13 ажил төлөвлөснөөс одоогийн байдлаар 46 хувийн гүйцэтгэлтэй байгаа бол Засвар механикийн заводад 35 хувь, Дулааны цахилгаан станцад  25 хувиар тус тус хангагдаж байна.  
Өнгөрсөн долоо хоногт Хүний нөөц, захиргааны хэлтсээс хоёр сонгон шалгаруулалт зохион байгуулсан байна. Мөн Булган аймагт болж буй Хойд бүсийн зөвлөлийн анхдугаар зөвлөгөөн болон мягмар гаригт Эрдэнэт үйлдвэрт болох “Эрдэнэс Монгол” компанийн Хувьцаа эзэмшигчдийн хурлын бэлтгэл хангаж буйг тус хэлтсээс мэдээлэв. 
Сарын эхний 28 хоногийн байдлаар авч үзэхэд, үйлдвэрлэлийн төлөвлөгөөт үзүүлэлт 4 дүгээр сард 100-аас дээш хувиар биелэх боломжтой байгааг Үйлдвэрлэл, техникийн бодлогын газрын дарга шуурхайн төгсгөлд онцолж, цаашид хэд хэдэн чиглэлээр ажлын уялдаа холбоог сайжруулан, эрчимжүүлж ажиллахыг анхаарууллаа. Тухайлбал, “Их зогсолт”-ын бэлтгэл хангах, тэдгээрийн хангамж нийлүүлэлтийн ажлыг шуурхайлах, ажлын явцаа цаг алдалгүй мэдээлж байхаар холбогдох бүтцийн нэгжийн удирдлагуудад чиглэл өглөө. Түүнчлэн хавар зуны бэлтгэл ажлыг эрчимжүүлж, төлөвлөгөөний биелэлтэд анхаарч ажиллахыг санууллаа.