“Манлайлал, авьяас чадварын хөтөлбөр”-ийг хэрэгжүүлэх Дэд ажлын хэсгийн ахлагч, Засвар, угсралтын цехийн Ерөнхий инженер Т.Атарбаяртай уулзаж, ирээдүйн удирдах ажилтнуудыг бэлтгэх хөтөлбөр хэрхэн хэрэгжсэн талаар ярилцлаа.
-“Манлайлал, авьяас чадварын хөтөлбөр”-ийг хэрэгжүүлэх Дэд ажлын хэсгийн ахлагчаар хэзээнээс ажиллаж эхэлсэн бэ?
-Эрдэнэт үйлдвэрт манлайллын хөтөлбөр 2020 оноос “Мастерын манлайлал” хөтөлбөрөөс улбаалан эхэлсэн. 2021 онд Манлайлал, авьяас чадварын хөтөлбөр болоод, 2022 оноос ахисан түвшинд, гурван жилийн хугацаатай хэрэгжүүлэхээр шийдвэрлэсэн байдаг. Миний хувьд 2021 оны “Манлайлал, авьяас чадварын хөтөлбөр”-ийн Ажлын хэсгийн гишүүнээр ажиллаж байгаад 2022 оноос хөтөлбөр хэрэгжүүлэх Дэд ажлын хэсгийн ахлагчаар ажиллаж байна.
-Хөтөлбөр анх хэрэгжиж эхлэхэд ажлаа юунаас эхэлж байв?
-Аливаа байгууллагад удирдах албан тушаалтан, ялангуяа анхан шатны удирдах ажилтны үүрэг, оролцоо маш чухал. Манай үйлдвэрт 1000 гаруй анхан болон дунд, дээд шатны удирдах ажилтан ажиллаж байна. Тэдний манлайллыг бүхий л түвшинд бий болгох, ур чадварыг хөгжүүлэх зайлшгүй шаардлагатай. 2021 онд Эрдэнэт үйлдвэрийн удирдах ажилтнуудын нөөцийг тодорхойлох судалгаа хийгдсэн юм. Удирдах ажилтнуудын насжилт, хүний нөөцийн төлөвлөлт, шилжилт хөдөлгөөний байдал зэрэгт түшиглэн судалгаа хийхэд 2020-2027 онд нэлээд тооны удирдах ажилтан гавьяаны амралтад гарах болон бусад шалтгаанаар ажил үүргээ гүйцэтгэхгүй байх магадлалтай гэсэн дүгнэлт гарсан. Иймээс инженерийн боловсролтой, ажилтны ажлын байранд ажилладаг болон анхан шатны удирдах ажил эрхэлж байгаа залуучууд, инженерүүдийг хөгжүүлж, дараагийн шатанд бэлтгэх хэрэгцээ шаардлага бий болсон.
-Ингээд хөтөлбөрийн оролцогчдоо сонгон шалгаруулах, судалгаа, оношилгоо хийх ажлууд ундарсан уу?
-2021 онд судалгаанд үндэслэн оролцогчдынхоо тоог гаргаад, бүтцийн нэгжүүдийн саналд тулгуурлан квотын дагуу Манлайлал, авьяас чадварын хөтөлбөрт оролцогчдыг шалгаруулж байсан бол 2022 онд ахисан түвшинд, гурван жилийн хугацаанд 100 оролцогч байхаар төлөвлөсөн. 2021 оны хөтөлбөрт амжилттай оролцсон шилдэг 20 залууг ахисан түвшинд хөгжүүлэхээр авч үлдээд, 80 оролцогчийг бүтцийн нэгжүүдийн хүний нөөцийн бодлогод тулгуурласан шийдвэрийг үндэслэн бүрдүүлсэн. Ер нь олон үе шаттай шалгаруулалт хийсэн гэж ойлгох хэрэгтэй. Эрдэнэт үйлдвэрийн бүтцийн 25 нэгжээс 100 залуу сонгогдож, хөтөлбөрийн баг бүрдсэн.
-Анх судалгаанаас ямар чиглэлээр түлхүү хөгжүүлэх шаардлагатай харагдсан бэ?
-Бид 2022 оны төлөвлөгөө гаргахаасаа өмнө гарааны үнэлгээ буюу манлайллын түвшин нь ямар байна, ерөнхий мэдлэг, мэргэжлийн ур чадвар нь ямар байгаа зэргийг онолын түвшинд “Глобал Талент Менежмент” компаниас сургалт, зөвлөгөө авсан аргачлалын дагуу үнэлсэн. Эндээс үзэхэд манай оролцогчид хэдийгээр эзэмшсэн мэргэжилдээ сайн боловч багаар ажиллах чадвар, манлайлах, асуудлыг шийдвэрлэх, өөрийгөө илэрхийлэх, хүнийг ойлгох, харилцааны ур чадвар хангалтгүй, сэтгэл зүйн байдал тогтворгүй гээд олон үзүүлэлт дээр сайжруулах, хөгжүүлэх шаардлагатай байсан. Ингээд бид 2022 онд хэрэгжүүлэх ажлын төлөвлөгөөндөө сургалт авах чиглэлүүдээ тодорхойлж тусгасан. Зөвхөн сургалтаар хязгаарлахгүй, олон талт үйл ажиллагаагаар оролцогчид сурч, хөгжих боломж нь илүү нээгдсэн гэж хэлж болно.
-Ажлын хэсгийнхэн өөрсдөө давхар хөгжих боломж нээгдсэн болов уу?
-Өнгөрсөн хугацаанд Ажлын хэсгийг жил бүр шинэчлэн бүрдүүлж байсан. Бид оролцогчдоо зохион байгуулж, чиглүүлэхээс гадна өөрсдөө бас хамтдаа хөгжсөн. Ямар нэгэн хөтөлбөр хэрэгжүүлэхдээ эхлээд өөрсдөө судална. Аль байгууллага нь илүү үр өгөөжтэй сургалт явуулж байна, сэдэв нь бидний зорилгод хэр нийцэж байгааг судлаад, сургалт зохион байгуулахдаа өөрсдөө хамт оролцоод явдаг. Бидэнд 2021 оны тэргүүн туршлага бий. Зарим сургалтуудаа өөрсдөө ордог. Арга зүйн зөвлөгөөний дагуу өөрсдөө сэдвээ гаргаад, бэлтгээд, давхар хөгжөөд явсан.
-Үзсэнийхээ хэрээр тархи “задардаг” гэдэг шүү дээ. Туршлага судлах үйл ажиллагааг хэрхэн зохион байгуулсан бэ?
-Энэ маш чухал. Бид оролцогчдоосоо тодорхой хугацааны дараа сэтгэл ханамж, сургалтын хэрэгцээний талаар байнга судалгаа авдаг. Тэгэхэд дийлэнх оролцогч өөр байгууллагаас, ижил төстэй уул уурхайн компаниудаас туршлага судлах хэрэгтэй байна гэдэг. Иймээс бид өнгөрсөн хугацаанд туршлага судлах үйл ажиллагааг зэрэгцүүлэн хэрэгжүүлээд явсан. 2022 онд “MCS” групп, Unitel, Energy Resourses, “Оюу толгой” гэх мэт байгууллагын тэргүүн туршлагаас суралцаж, тухайн байгууллага тулгамдсан асуудлаа яаж шийдэж байна, ажилтнууддаа сургалт, хөгжлийн үйл ажиллагааг хэрхэн зохион байгуулдагтай танилцсан. Тэдний мэргэжилтнүүдтэй уулзалт, хэлэлцүүлэг зохион байгуулах, зорилтот сургалтуудаа авах гэхчлэн, аливаа үйл ажиллагааг хослуулаад явдаг.
-Танай хөтөлбөрийн багууд өндөр ач холбогдолтой нөлөөллийн ажлууд нэлээд хийсэн санагдана..?
-Анх 2022 онд 100 оролцогч байх үед 10 багт хуваан ажиллуулсан. Багийг идэвхжүүлэх, нөхөрсөг уур амьсгал бүрдүүлэх үүднээс удирдамжтай, тодорхой хугацаанд зорилго тавиад нөлөөллийн ажил нэлээн хийсэн. 10 баг бүгд өөр өөр чиглэлээр. Үр ашигтай болсноос нь дурдвал, “Санхүүгийн боловсролын ач холбогдол” сэдвээр “Түлхүүр” багийнхан сургалтын материал боловсруулаад энэ чиглэлээр Эрдэнэт үйлдвэрийн ажилтнуудад сургалт зохион байгуулсан. Идэвхтэй оролцсон ажилтнуудад “My fin” аппликейшн ашиглах 500 гаруй мянган төгрөгийн дэмжлэг олгосон байх жишээтэй. Олон баг эрүүл мэндийн чиглэлээр нөлөөллийн ажил хийсэн. Мөн байгаль орчин, нийгмийн сайн сайхны төлөө олон сайхан санал санаачилга хэрэгжүүлсэн.
-Өнгөрсөн хугацаанд манлайлагч залуусаас Эрдэнэт үйлдвэрт ирээдүйд хэрэг болох төслийн санаа шийдэл гарсан уу?
-Өнгөрсөн жил багууд төсөл хийснийг энд ярих нь зүйтэй болов уу. Төслийн менежмент гэдэг өөрөө их том ойлголт. Хамтын ажиллагаа гэхээсээ илүү асуудлыг илрүүлэх, шийдвэрлэх, арга замаа тодорхойлох, хэрэгжүүлэх, үр дүнг тооцох гэх мэтчилэн. Оролцогчдын тоо цөөрсөн учраас зургаан багт хувааж ажиллуулсан. Эрдэнэт үйлдвэрт тулгамдаж буй тодорхой асуудлуудыг шийдвэрлэх зорилгын хүрээнд манай багууд төслөө маш амжилттай хэрэгжүүлсэн. Тухайлбал, ажилтан бүр үйлдвэрийн хэмжээнд зохион байгуулж байгаа бүхий л ажил үйлчилгээг нэг дороос авах, ХАБЭА–н мэдлэгээ дээшлүүлэх, аюулгүй байдлаа хангах, ажилтныг мэдээлэлд ойр болгох, ажлын уялдаа холбоог сайжруулахад нь туслах “Онч апп” аппликейшн зохион бүтээсэн. Эрчим хүчний томоохон хэрэглэгч Эрдэнэт үйлдвэр сэргээгдэх эрчим хүчийг хэрэглэх, ухаалаг хэрэглээнд шилжих боломжийн талаар төсөл байна. Мөн Ил уурхайн авто зам усалгааны зардлыг бууруулах, гүүрэн краны дохиоллыг автоматжуулах гэх мэт төслүүдийг нэрлэж болно. Эрдэнэт үйлдвэр хөрсөн дээрээ буулгаад, хэрэгжүүлээд явбал том үр дүнд хүрнэ гэж найдаж байгаа.
-Цаашид “Манлайлал, авьяас чадварын хөтөлбөр”-ийг үргэлжлүүлэн хэрэгжүүлбэл юунд анхаарах хэрэгтэй вэ?
-Өнгөрсөн хугацааны үйл ажиллагаа, зохион байгуулалтаас үзэхэд цахим, онлайн сургалтын платформ ашиглах нь илүү үр дүнтэй санагдсан. Оролцогч өөрийн боломжит цаг хугацаандаа онлайнаар хичээлээ үзэх, материалаа судлах, даалгавар биелүүлэх, өөрийгөө тестлэн шалгах зэрэг олон боломж цахим платформд байна. Тийм учраас Хүний нөөцийн хөгжлийн цогц дөрвөн хөтөлбөр цахим платформ руу шилжиж байгаа. Манлайллын хөтөлбөр сургалт, хөгжлийн үйл ажиллагаа, үнэлгээ, хөгжүүлэлт гээд олон үйл ажиллагаа давхар явагддаг онцлогтой. Энэ бүхнийг цахим платформд хэрхэн шингээх талаар бодож байна. Багийн ажиллагаа байх ёстой. Түүнээс гадна мэргэжлийн ур чадварыг хөгжүүлэхэд анхаарах ёстой. Өмнө нь бид ерөнхий ур чадварыг нийтлэг байдлаар хөгжүүлэх зорилго агуулсан. Хөтөлбөр цааш үргэлжлэх хэрэгцээ шаардлага бий. Энэ тохиолдолд хөтөлбөрийг үе шаттай хэрэгжүүлэх нь зүйтэй болов уу. Харилцан адилгүй ажлын байранд ажиллаж байгаа, олон мэргэжлийн, мэдлэгийн түвшин өөр өөр хүмүүс хамт суралцахаар нэг хэсэгт нь сонирхолтой, зарим нь өөр хүлээлттэй байгаа анзаарагдсан. Мастеруудыг нэг хөтөлбөрөөр, дараагийн тэргүүлэх мэргэжилтнүүдийг арай өөр хөтөлбөрөөр хөгжүүлэх тал дээр анхаарч, бодлогоо хэрэгжүүлэх нь зүйтэй санагдсан.
-Цаг гарган ярилцсанд баярлалаа.
Нар минутад мандаж минутад жаргана.
Үс засуулвал: 
Суудал: 
