Эрдэнэт үйлдвэрийн Соёл, урлагийн цогцолборын өвөл цагийн нээлт энэ сарын 25-нд болохтой холбогдуулан тус цогцолборын Уран сайхны удирдагч Х.Үнэнзоригоос төлөвлөсөн үйл ажиллагаа, бэлтгэл ажлын талаар тодруулсан юм.
-Нээлтийн үйл ажиллагааны бэлтгэл хэр хангагдаж байна?
-Соёл, урлагийн цогцолбор 46 дахь жилийнхээ өвөл цагийн үзвэр, үйл ажиллагааны нээлтээ хийхээр бэлтгэл ханган ажиллаж байна. Бид энэ баасан гарагийн 11:40 цагаас Соёл, урлагийн цогцолборын хойморт залсан байдаг, урлагийн Янжинлхам бурхандаа уламжлалынхаа дагуу хүндэтгэл үзүүлж, үйл ажиллагаагаа эхлүүлнэ. Үүний зэрэгцээ Орхон аймагт ажиллаж амьдардаг утга зохиолын шилдгүүд, яруу найрагчид ирж, найргийнхаа дээжээс уншиж сонирхуулна. Түүнээс гадна энэ салбарт бидэнтэй мөр зэрэгцэн ажилладаг мэргэжлийн урлагийн байгууллагууд болох Хүүхэд залуучуудын театр, Соёлын төвүүд, Орхон аймгийн Соёл, урлагийн газрын хамт олныг нээлтийн үйл ажиллагаандаа урьж оролцуулна. Мөн Эрдэнэт үйлдвэрийнхээ бүтцийн нэгжийн ардын авьяастнууд, урлаг, соёлын үйл ажиллагааг хариуцан ажилладаг арга зүйч нараа урьж байна. Бид алтан үеийнхэн гэж нэрлэдэг, гавьяаныхаа амралтад гарсан уран сайханчдаа бас урьсан байгаа. Тэд маань манай тоглолтод бас оролцоно. Энэ өдөр үйл ажиллагааныхаа төрлүүдийг сурталчлахыг зорьж байна. Эрдэнэт үйлдвэрийн цахим музей болон хүүхдийн дугуйлангийн үйл ажиллагаагаа багш нар маань сурталчилна. Авьяаслаг сурагчид маань улсын болон олон улсын уралдаан тэмцээнүүдэд амжилттай сайхан оролцсон байдаг. Сурагчид маань ээж, аавууддаа, ирсэн зочдодоо авьяасаа үзүүлнэ. Үйлдвэрийн газрын ахмадууд, Эрдэнэт хотын иргэд хүсэн хүлээдэг, Ахмадын нэгдсэн зөвлөлтэй хамтран зохион байгуулдаг “Мөнхийн залуу нас” нийтийн бүжиг болно. Бүх үйл ажиллагааг олон нийтэд нээлттэй толилуулахаар төлөвлөөд, бэлтгэл хангаад ажиллаж байна.
-Нээлтийн үйл ажиллагаа хэдэн цаг хүртэл үргэлжлэх вэ?
-Морин цагт эхлээд, 17:00 цаг хүртэл үргэлжилнэ. Иргэд, олон нийтэд ямар нэгэн төлбөргүйгээр, нээлттэй үйлчилгээ үзүүлэх хөтөлбөр гаргасан. Загвар, гоо зүйн дугуйлангийнхан маань загварын үзүүлбэр тоглолт үзүүлнэ. Манай төгөлдөр хуурын дугуйлангийн сурагчид “Golden piano” олон улсын уралдаанд сүүлийн жилүүдэд маш амжилттай оролцож байгаа. Тэдний шагнал ирснийг энэ баярын өдөр гардуулна. Үүний араас Дуу, бүжгийн “Эрдэнэт” чуулгын уран бүтээлчид, ахмад, дунд, залуу үеийн ардын авьяастнууд, дугуйлангийн авьяаслаг сурагчдын хамтарсан “Цэнгэлийн өргөө” тоглолтыг нээлтэд оролцогчдод үзүүлэхээр бэлтгэж байна. Энэ тоглолт маань 15:00 цагт эхэлнэ. Дараа нь 16:20 цагаас “Мөнхийн залуу нас” нийтийн бүжиг болж, бүтэн өдрийн үйл ажиллагаа өндөрлөх юм.
-Удахгүй “Харанга” хамтлаг тоглолт хийхээр яригдаж байна. Энэ талаар..?
-Соёл, урлагийн цогцолборын үе үеийн нээлтүүд дээр томоохон хэмжээний урлагийн тоглолтууд ирж байсан түүх бий. Оросын холбооны Буриад Улсын Дуурийн театр, БНХАУ-ын ӨМӨЗО-ны Бугат хотын Манхайн театрын уран бүтээлчид бүрэн бүрэлдэхүүнээрээ ирж, тоглолт толилуулж байсан гэх мэт. Манай улсын мэргэжлийн урлагийн томоохон хэмжээний шилдэг бүтээлүүд ч өвөл цагийн нээлт дээр тоглогдож байсан уламжлал бий. Энэ удаа Монголын рок, попын амьд домог “Харанга” хамтлаг 35 жилийн ойн баярын тоглолтоо манай өвөл цагийн нээлттэй хамтатган 11-р сарын 7, 8-ны өдрүүдэд Соёл, урлагийн цогцолборын Их танхимд Эрдэнэтчүүддээ зориулан тоглохоор бэлтгэл хангаж байна.
-Энэ өвөл ямар онцлох үзвэр, үйлчилгээ байх вэ?
-Манай төлөвлөгөөт үйл ажиллагаа хуваарийн дагуу явагдана. Сонгуультай холбоотой урлагийн тоглолтууд нэлээн алсарсан. Тиймээс гаднаас манайд захиалга ирэх нь сүүлийн үед эрчимжиж байна. Саяхан гэхэд “Эмоци” продакшн ирж тоглолоо. Хүлээлттэй байсан нь харагдаж байна. Онцлох үзвэрүүд тухайн үедээ ил болоод явах нь илүү сонирхолтой болов уу.
-Дугуйлангийн хөтөлбөрт энэ жил өөрчлөлт орсон уу?
-Эрэлт хэрэгцээ их байгаа учраас багш нарын тоогоо нэмсэн. Гитар, хийл зэрэг сонгодог хөгжмийн дугуйлангийн эрэлт байна гэж үзээд бэлтгэл хангаж байна. Манайх орчин нөхцөл, материаллаг бааз сайтай, тоног төхөөрөмж байнга шинэчлэгдэж байгаа. Үүнд эцэг эхчүүд сэтгэл хангалуун байдаг. Хүүхдийн баяраар, жилийн турш сурсан мэдсэнээ аав, ээжүүддээ тайлагнах зорилгоор “Сурснаа толилуулъя” нэртэй тоглолтыг тавдугаар сард зохион байгуулсан. Удахгүй болох шинэ жилийн баярыг тохиолдуулан тайзан дээр шинэ мюзикл тавихаар төлөвлөж байна. Энд манай дугуйлангийн хүүхдүүд оролцох юм.
-Ойрын хугацаанд Соёл, урлагийн цогцолбор томоохон уралдаан тэмцээн зохион байгуулах уу?
-11-р сард үйл явдал өрнүүн байхаар байгаа. Үзэгчид маань Соёл, урлагийн цогцолбороор үйлчлүүлэх дуртай цаг үе байдаг. Тиймээс бид томоохон хоёр уралдаан зохион байгуулахаар төлөвлөсөн. Эхнийх нь бид анх удаа Өсвөрийн төгөлдөр хуурчдын “Эрдэнэтийн сонат” уралдааныг Монголын төгөлдөр хуурын төв байгууллагатай хамтран зохион байгуулахаар бэлтгэл хангаж байна. Эхний шалгаруулалт цахим хэлбэрээр явагдана. Ингээд 11-р сарын 3, 4-ний өдрүүдэд Эрдэнэт хотод хоёрдугаар шатны шалгаруулалт явагдаж, Гала тоглолтоор шилдгүүдийг тодруулж, шагнал гардуулах юм. Дараа нь “Намрын угалз” бүжгийн тэмцээнийг 11-р сарын 8, 9-ний өдрүүдэд зохион байгуулна. Хэдийгээр Эрдэнэтийг бүжгийн хот гэдэг ч бүжгийн тэмцээн намар явагдаагүй удсан. Үүнийг тогтмолжуулахаар Аймгийн Соёл, урлагийн газартай хамтран ажиллаж байгаа. Дашрамд, Орхон аймгийн Соёл, урлагийн газрын А.Уранчимэг даргад талархал илэрхийлье. Энэ тэмцээнийг манайх анх удаа өөрийн байрандаа зохион байгуулна. Бүжигт дуртай, хөгжимд хайртай хүүхэд залуус, хэн бүхнийг урьж байна.
-Баярлалаа.
Нар минутад мандаж минутад жаргана.
Үс засуулвал: 
Суудал: 
