Х.ОЛЗБААТАР: Манай агуулахууд 90-100 хувийн бараа материалын дүүргэлттэй байна

-“Эрдэнэт үйлдвэр” ТӨҮГ-ын Тээвэр, ложистикийн төвийн дарга Х.Олзбаатараас бараа материалын ханган нийлүүлэлт, нөөц хийгээд зарим зүйлийг тодрууллаа. 
-Үйлдвэрийн хэрэгцээтэй бараа материал цаг хугацаандаа ирж байна уу. Танай цехийн ажлын төлөвлөгөө хэрхэн биелж байна вэ? 
 -Манай хамт олон оны эхний найман сарын ажлын төлөвлөгөөг цаг тухайд нь давуулан биелүүллээ. Галт тэрэгний хөдөлгөөний болон сэлгээний ажлын хувьд ямар нэгэн зөрчилгүй ажиллаж байна. Мөн хөдөлмөр хамгаалал, эрүүл ахуйн чиглэлээр ноцтой зөрчилгүй ажиллалаа. Оны эхний долоо, найман сар манай цехийн тухайд нэлээн ажлын ачаалалтай байлаа. Эрдэнэт үйлдвэрийн их зогсолттой холбоотой бараа материал, тоног төхөөрөмж, сэлбэг хэрэгсэл их ирсэн. Их зогсолтын дараа ч хөрөнгө оруулалтын чиглэлээр тендерт оролцсон компаниудын бараа материал ирж байна. Эдгээр бараа материалыг бүтцийн нэгжүүдэд цаг тухайд нь хүргүүлж ажиллалаа. Одоогоор бүх агуулахууд 90-100 хувийн бараа материалын дүүргэлттэй явж байна. Мөн их зогсолтоос хойш технологийн материалын тасалдалттай холбоотой бараа материалыг цаг хугацаанд нь шуурхай татан авах явдал манай цехийн хувьд гол ажил байлаа. Замын-Үүдийн боомтоор ачааны урсгал нэлээн их байна. Одоогоор үйлдвэрийн хэрэгцээт хүхэрт натри, 120, 124-ийн ган бөмбөлөг татах ажил нөөц бүрдэх хэмжээнд хүрсэн. Бусад бараа материалын хувьд хангалттай нөөцтэй байгаа. 
-Импортын бараа материалыг улсын хил хүртэл нийлүүлэгч тал хариуцдаг. Энэ талаар..?
-Тийм. Харин улсын хилээс нааш манай тал хариуцаж, үйлдвэрлэлийн технологийн хэрэгцээтэй бараа материалаа тээвэрлэдэг. Эдгээр бараа материалыг өмнө нь дотооддоо зуучлалын байгууллага тээвэрлэж байсан. Бид төмөр замын суурь үнэлгээ дээр нэмж мөнгө төлдөг байсан юм. 2024 оны долдугаар сарын 22-ны өдрөөр тухайн дотоодын тээвэр зуучлагч компанитай байгуулсан гэрээ дуусгавар болсон. Энэ үеэс бид бараа материалаа дотооддоо ямар нэгэн зуучлагчгүйгээр тээвэрлэж байна. Ингэснээр тээвэрлэлтийн зардал хэмнэсэн. Өөрөөр хэлбэл дотоодын тээврийн зардлыг 40-50 хувиар хэмнэх боломжтой. Энэ нь хийж болох ажлыг хийхгүй явсан юм биш. Тодорхой хэмжээнд гаалийн бүрдүүлэлт хийх, шилжүүлэгтэй холбоотой жижиг зардал гардаг. Үүнийг Санхүү, нягтлан бодох бүртгэлийн хэлтэс, Гаалийн албатай хамтраад шийдэж байна. Удахгүй, ажлын хэсэг гарч Замын-Үүд дээр энэ ажлыг шалгаж нягтална. Хилээр орж ирсэн импортын ачаа барааг бага зардлаар татах боломжтой. 
-Намар, өвлийн бэлтгэл ажил хэр хангагдаж байна вэ?
-Манай хамт олны хувьд төмөр замаа, аж ахуйгаа бэлтгэх нэг том ажил байдаг. Үүнтэй уялдуулан төмөр замын зүтгүүрийн бэлэн байдлыг хангадаг. Замын ажил өнгөрсөн таван сараас хийгдээд явж байна. Суман шилжүүлгүүд, дэр модуудыг солих ажил хийгдсэн. Ирэх аравдугаар сарын эхээр төлөвлөгөөний дагуу замын засвар үйлчилгээний ажлыг бүрэн хийж дуусна. Хугацаа дууссан нэг илчит тэргийг Эрдэнэт өртөө рүү оруулахгүйгээр ойр зуур ашиглаж байна. Мөн тендерт шалгарсан компани нэг илчит тэргэнд засвар хийж байна. Удахгүй хүлээж авна. Бусад засвар үйлчилгээг өөрсдийн дотоод нөөц боломжоо ашиглан цаг тухайд нь хийгээд явж байна. Нефт бааз дээр савнуудаа цэвэрлэх ажлыг хийлээ. Мөн гаднын компанийн оролцоотойгоор шугам хоолойг засварлах, будах ажил дууссан. Одоо нэг ажил үлдсэн. Энэ нь төв агуулахын дохиоллын системийг шинэчлэх ажил байгаа. Тендерт шалгарсан компани ажлаа эхлүүлсэн.
-Хөдөлмөрийн хүмүүст урам зориг өгөх чухал байдаг. Танай цехийн ажилтнууд хөдөлмөрөө хэрхэн үнэлүүлж байна вэ?
-Энэ сарын эхээр манай хамт олон мэргэжлийн баяраа тэмдэглэсэн. Материал, техникийн хангамжийн бааз, Төмөр замын цехтэй нэгдсэнийг та бүхэн мэднэ. Хоёр цех нэгдсэнээс хойш бид мэргэжлийн баяраараа ажлаа дүгнэдэг уламжлал тогтсон. Хөдөлмөрийн амжилт гаргасан хүмүүсээ шагнаж урамшуулдаг. Энэ удаа ч манай цехийн зарим хөдөлмөрийн сайчууд яам, тамгын газрын шагнал хүртлээ. 
-Баярлалаа.