“Энэрэл” төвийн хүү, Орхон аймгийн нэгдүгээр сургуулийн 9в ангийн сурагч, оюун ухааны Отелло спортын 5KYU зэрэгтэй тамирчин, Одхүүгийн Энх-Эрдэнэ Итали улсын Ром хотод болох “Отелло”-ийн дэлхийн аварга шалгаруулах 45 дахь тэмцээнд оролцохоор мордлоо. Энэ үед нь бид түүнтэй цөөн хором ярилцсан юм.
-Юуны өмнө дэлхийн аварга шалгаруулах тэмцээнд оролцох болсонд нь баяр хүргэе.
-Баярлалаа. Монгол Улсаа төлөөлөн энэ том тэмцээнд оролцож байгаадаа их баяртай байна. Надад үргэлж тусалж дэмждэг Эрдэнэцэцэг, Эрдэнэзаяа, Мойлоо багш нартаа их баярлалаа. Бас тэмцээнд явах зардлыг дааж буй Эрдэнэт үйлдвэрийн ах эгч нартаа баярлалаа.
-Та энэхүү спортоор хэзээнээс яагаад хичээллэх болсон бэ?
-Би Отеллогоор 2020 оноос хичээллэж эхэлсэн. Аав минь цэргийн офицер байсан. Хэдийгээр алдаж, онож яваа ч их ухаантай, сэргэлэн хүн. Тийм учраас надад ч энэ чанар нь өвлөгдсөн гэж найдаж, оюун ухаанаа илүү сайн хөгжүүлэхийг би үргэлж хичээдэг. Оюуны спорт болох даамаар багаасаа хичээллэсэн. Отеллогийн спорт сонирхлыг минь бүр ч их татсан.
-Энэ спортын онцлог юу вэ?
-Анхаарлаа дээд зэргээр төвлөрүүлж хариуцлагатай байх хэрэгтэй. Нэг л буруу нүүдэл хийвэл тоглоом дуусдаг. Отеллогийн чухал тактик бий. Хамгийн гол нь булангаа авчихвал хашсаар яваад ялах боломжтой.
-Энэрэл төвд Отеллогоор хичээллэдэг хүүхдүүд олон уу?
-Манай төвийн 40-өөд хүүхэд энэ спортоор хичээллэдэг. Би гэрийн даалгавраа хийсний дараа бүгдтэй нь тоглодог.
-Хэр олон тэмцээнд оролцсон вэ? Хамгийн сэтгэл хөдөлгөсөн ялалтаа дурсана уу?
-Томоохон гурван тэмцээнд орсон. Түүнээс Ази номхон далайн аварга шалгаруулах тэмцээнд гуравт шалгарсан. Би хамгийн сайнаараа хичээж, анхаарлаа төвлөрүүлж тоглосон. Олон орны тамирчидтай анх удаа тулсан болохоор жаахан сүрдэж, сандарсан. Гэхдээ тэдэн дунд нэг л хүчтэй өрсөлдөгч байсан. Тоглолтын үеэр зарим найзууд, багш нар маань их үнэтэй тактик, арга заасан. Тэр нь намайг амжилттай тоглоход их нөлөөлсөн гэж боддог. Энэ тэмцээнээс надад Отелло хөлөгт тоглоом бэлэглэсэн. Хамгийн гоё нь би дэлхийн аваргад оролцох эрхээр шагнуулсан.
-Саяхан Монголын Отеллогийн холбооныхон ирж, тавдугаар зэрэг гардуулсан. Сэтгэгдэл ямар байв?
-Би маш их баярласан. Тэр том хүмүүс намайг зорин ирж, зэрэг гардуулсан нь миний хувьд нэр төрийн хэрэг.
-Чиний цаашдын зорилт юу вэ?
-Би олон улс орноор аялна гэж мөрөөддөг. Хүсэл, мөрөөдөл маань эхнээсээ биелж байна. Би Отеллогоор насан туршдаа хичээллэж, дэлхийн аварга болох чин хүсэлтэй. Монгол Улсынхаа, Эрдэнэт үйлдвэрийнхээ нэр хүндийг дэлхийн тавцанд гаргаж, аавынхаа нэрийг сайнаар дуудуулна гэж боддог. Бас уул уурхайн инженер болж, аавыгаа гадаад орноор аялуулах нэгэн мөрөөдөл бий.
-Дэлхийн аваргын тэмцээн удахгүй эхэлнэ. Чамд юу бодогдож байна?
-Энэ тэмцээнд 71 улсын 300 гаруй хүчтэй өрсөлдөгч оролцоно. Насны ангилалгүй энэ том тэмцээнд ялах ялагдахаа мэдэхгүй л байна. Гэхдээ миний хувьд энэ тэмцээнд оролцож байгаа нь хамгийн том амжилт гэж бодож байна. Миний төлөө сэтгэл, зүтгэл гаргасан бүх хүний итгэлийг алдахгүйг хичээж оролцоно.
-Чиний анхны багш хэн бэ?
-Анхны багш маань Эрдэнэцэцэг. Отеллод хөл тавиулсан Уранболор багш маань “Чи их сэргэлэн хүүхэд байна. Отеллогоор тоглоод үз” гэсэн. Тоглоод л шууд миний хичээллэх спорт мөн байна гэж бодогдсон. Тэгээд дугуйланд явж эхэлсэн дээ.
-Дугуйлан хаана хичээллэдэг вэ?
-Эхлээд Хүүхдийн ордонд хичээллэдэг байсан. Ахмадын хороо, Хүүхдийн өдөр өнжүүлэх газар гээд олон газар хичээллэдэг.
-Чи ямар хичээлд сонирхолтой вэ?, “Энэрэл” төвд хичээлээ сайн хийх, өөрийгөө хөгжүүлэх боломж хэр байдаг вэ?
-Би математик, физикийн хичээлийг их сонирхдог. Монгол хэл, уран зохиол гээд л бүх л хичээлдээ дуртай. Би “Энэрэл” төвд орсноосоо хойш хичээлдээ бүр ч илүү мэрийж байгаа. Энд хичээл хийх боломж, нөхцөл дүүрэн байдаг. Би багшийн заасныг анхааралтай сурч, өгсөн бие даалт, даалгаврыг заавал хийж очдог. Энэрэл төвийн багш нараасаа ойлгохгүй зарим зүйлээ асуухад их сэтгэл гарган зааж өгч тусалдаг. Бас хичээлээс гадуур дуртай зүйлээрээ хичээллэн, амжилт гаргах бүх нөхцөл бий. Ийм боломжоор хангадаг Эрдэнэт үйлдвэр, “Энэрэл” төвийнхөндөө их баярладаг.
-Үе тэнгийн найз нартаа хандаж юу хэлэх вэ?
-Гар утас оролдож, үнэт цагаа үрэхийн оронд Отелло тоглож, оюун ухаанаа хөгжүүлээрэй.
-Ярилцсанд баярлалаа. Тэмцээнд нь өндөр амжилт хүсье.
-Их баярлалаа.
Нар 08:22 минутад мандаж 17:01 минутад жаргана.
Үс засуулвал: Өвчин ирнэ
Суудал: Огторгуй
